1 Yisasia agaiaene tokaeya nemaiya anagafe mage huno humaine kefo yama huo huno ayemavataga hisaya yana falote hugahianagi kefo yama hisaya kate tamavaleno visia kanomofena “Kefo kava nehananagika kana yana aligane.” 2 Ani kanomoa nagoa osi anaganihe “Kefo yama huo.” huno hisiana tusia kefo kava nehianagina tusia kana ya amigahue. Ala yafakefaleti ani kanomo ageyafi maleya nofi kiteya hage lipi hagayu hutalesayana ani kana yana afa avamete kana ya haneanagi nagaya tusia kana ya amigahue. 3 Amigahuanagi tamakaya kaye ho. Negafua kefo yama hinageka “Naa kavala ohuo.” huka kemakio. Amakigeno agayama agua aiyahaema hinageka aigeateka kefo yamaa ataleto. 4 Negafua nagoke yupa sevenia (7) kanalema kefo yama hugateteno ani kefo yafe “Nagua aiyahae nehue.” huno hisigekahena kagaya ania huka sevenia (7) kanale aigeateka kefo yamaa ataleto huno humaine.

5 Yisasiene tokaeya nemaiya anagamoya Anumayamofe mage hae “Kagaife havita tagupi maleta tametiti nehuna yana kagaya nagoene alika ayaaya hulato.” huya hae. 6 Hageno Yisasia mage hie “Tamakaya nagaifena havitama tamakupi maletama tamametiti nehaya kavala osi masatati yosamo alaga kanoa hanea avamete hutama osia havitama tamakupi malesayana ma yosahe mage hutama hapaigahae ‘Ma yosamoga kagaya aepa muki tagasi huka ala tipi hageka haiyo.’ hutama hapaisageno tamakai kea akave malegahie.” huno hamapaiye.

7 Tamakaipiti nago kanoa aliya nealia kanoamoa hoya aliyapi, afu kava aliyapi, ani aliyana alino hano huno esigenoa ala kanomoa ani aliya kanohe mage huno hapaisio “Kagaya aupaa me maifalu huka maineka kavela no.” huno hapaisio? 8 Aao ani kea ohugahianagino mage huno hugahie “Kagaya kavenia talo tala hunateka kenakaa faiteka kavenia alika me namigena hagotena netesugeka kagaya haenaga negane.” huno hugahie. 9 Anima hapaiya kema akave malenea yafena ala kanomoa “Kanale kava hanafe musekaa nehue.” huno hisifi? Aao ania ohugahie. 10 Tamakaya ania hutama mukia tamahapai-mainoa aliyana alitama avaya ayetetama mage hutama hiho “Tagaya kanale aliya anaga omainone. Tagaiti aliyanagita ago alune.” hutama hiho huno humaine.

11 Yisasia Yelusalemu ukahe viana Sameliaene Kaliliene amunopi katega umaine. 12-13 Nago kumate uvayi higeya tenia (10) fugita kali nealiya vayala aluale heti-maineya ala kefiti mage hae “Yisasiga ala kano mainanagi tagaila kahau hulato.” huya hae.

14 Hageno Yisasia amaketeno mage hie “Tamakaya mono nopi kava vayate utama tamaugafa momaveliho.” huno higeya ani vayatega nevageno katega amaugafamoa eteno kanale humatene.

15 Kanale humategeya vafiti nagoke kanomoa augafa ageana kanale higeno eteno katega viaamo ala kefiti muse huno Anumaya Koti agi alisaga humaine. 16 Huteno Yisasite aiyafi mepe huno maineno aiyale alisoso nehuno “Kagaifena tusia musekaa nehue.” huno hie. Aiyale alisosoma hia kanoa Sameliati kanoe.

17 Yisasia ani kanoa ageteno mage hie “Nagesa havuana tenia (10) vaya ago alina kanale humatenofi? huna huanagi nainia (9) vayala hanate mainagekae? 18 Naa higeya ani vayayaga Anumaya Koti agia melisaga ohae? Mani nagoke kanoa alu kotegati emainea kanomoa agaiage Anumaya Koti agia melisaga nehie.” huno hie. 19 Yisasia ani kanomofena mage huno hapaiye “Kagaya hetika vuo. Nagaifema havika kagupi maleka kametiti hana yamo kagaila alino kanale hugate.” huno hie.

20 Nagoa Falasia vayamoya mage huya havigae “Na kanafi Anumaya Kotia aepa heno kava yagaigahie?” huya hageno Yisasia mage huno humaine “Anumaya Kotima kava yagaisia kanama falote hisiana tamaulagamoa oagesia kava huno egahie. 21 Veamoya ‘Malega hane. Amualega hane.’ huya ohugahagi haviho Anumaya Kotia tamakaipi ago kava yagaino maine.” huno hie.

22 Yisasia agaiaene tokaeya nemaiya anagafe mage huno hamapaiye “Haenagaa nago kanama falote hisigetama mage hutama hugahae ‘Ikapinagati emainea kanoa vayamo atenea nafanemona nagoke yupa kanoa agesune.’ hutama hugahayanagi afaa oagegahae. 23 Oagegahagi nagoa veamoya ‘Amugalega mainegi ageho.’ nehuya ‘Malega mainegi ageho.’ nehuyama hisagetamahena amakavela oviho. 24 Ikapinagati emainoa kanoa vayamo natenea nafanemona etena esua yamoa maa hugahie ikamoa nago kaiyaga aupaa aulumayamoma nehia avamete huno mukia kotega aivasa nehinagena nagaya etena egahue. 25 Egahuanagi hagoteya meni kanafima mainaya veamoya nagaifena ‘Kahaoteyakae.’ huya hunatesageno tusiya huno nagata aigahie. 26 Nagaya ikapinagati emainoa kanoa vayamo natenea nafanemona etena esua kanafima mainaya veamoya nayoma Noama mainea kanafima mainaya veamoya humainaya kavala hugahae. 27 Noama mainea kanafina kavela neneya tina neneya anema aliyamoene vele uyamoene mukia kanafina ani yafekeya amakesa havi havi huya mainageno Noaa ala tipi kalefi haisaga humaigeno tusia lina hogino mukia ani veanea alino haviya higeya ago fali hano humainayane.

28 Lotima mainea kanafina ani kava huya kaveene tiene neneya nagoa yaamia miya nehuya hoya aliyaamia nealiya noamia negiya mukia kanafina ani yafekeya amakesa havi havi humainayane. 29 Ani amakesale mainageno Lotia Sotomua neataleno umainea kanalela Anumaya Kotia ikapinagati tusia himanaage ata nelea yafayaga komopa hia kava huno asaga hulavino mukia veanea hamaegeya fali-mainayane. 30 Nagayama ikapinagati emainoa kanoa vayamo natenea kanomona etena esua kanafima mainesaya veamoya nayona Loti mainea kanafima mainaya veamoya humainaya kavala ania hugahae.

31 Yisasima esia kanafina nagoa veamoya kumatega mainesaletila afenoyaamia alisaya yafena eteya nopinaga ohaisae. Nagi ania huya hoyafinaga mainesaya veamoya eteya noamilegama hanesea afenoya alisaya yafena ovisae. 32 Tamakaya Loti amoma hutenea kavafena tamakesa aikalo hinagetama havilama hutama haviho. 33 Nagoa veamoya hamaimuma hanesigeya ‘Mai yatia atafa hutalako huligahune.’ huya amakesama havisayana ani kanale mai yaamimoa fanane hugahianagi nagoa veamoya ‘Kanalelagita maisuna yatiene tahaimuene Yisasife tagesa nehavita afaa atalegahune.’ huya hisagenoa kanaleya huno mai yaamia aligatimatesigeya maige maige yana aliteya agola maigahae. 34 Tamahanepauve nagayama etena esua yupa ani kegela tole vekalatana nagoke sipale faeana mainesaagenofena Anumaya Kotia nagoke avalegahianagino nagola alitaye-talegahie. 35-36 Tole atalana tokaeana aliya nealisaageno Anumaya Kotia nagoke avalegahianagino nagomona alitaye-talegahie.” huno hie. 37 Higeya mage huya havigae “Anumayamogae mani kavala hana kumate falote hugahie?” huya havigageno Yisasia mage huno hamapaiye “Afumoma fali-mainesia kefafina hakikimoya yage yage huya alitalu hunemaiyanagi ikapinagati kanomona ania huna mukia veamogami amunopi egahue.” huno hamapaiye.