6
Aposolo vayamoya aliyaamiletila kasagoya kana ya ali-mainae.
1 Anumayamoene ailokaeta aliyana nealita mage huta ali lamakafa nehune. Anumaya Kotia kayone yamaa ago tamamigetama ali-mainagi afa kavala ohutama akave maleme maleme haiho. 2 Anumayamoa agaia avopina mage huno hu-maineane
“Naguamoa kanale nehigena nahavigaya kea havuanagi tamaugafama aligatisua kanale tamaya hugahue.” huno hu-maineane.
Hu-maineanagina tamahanepauve meni kanafina Anumaya Kotia aguamoa kanale nehigeno tamaku tamamena aligatisiafe nehaigi tamakua aiyahae hiho.
3 Aliyatihena “Haviya hie.” huya ohisaya yafe tagaya kefo yana nohune. Havigu kefo yama hisunana veamoya nelageya amakua aiyahae ohugahae huta lagaya tagu tametela kava neyagaune. 4 Anumaya Koti aliya vaya mainone huta mukia maa kavala nehune. Vayamoya aliya haviyama hulatayana tokiya vaita mailava huta mainone. Kana yama falote higeta mailava huta mainonafe tamakaya “Kanale aliya vayaa mainae.” hutama hisaya yafe tagutela kava neyagaune. 5 Neyagaunageno maa yana falote humaine kayoteti nelahaeya nofi hulatenae. Mukia veamoya alakenake huya tahaegahe humainae. Tusia aliya nealita taula ofaonageno tusia tagate-maine. 6 Naa hulatayanagi oniyaage kavala ohune. Anumayamo kea havilama hulineta mailava huta maineta veala ali kayone humateta amaya nehune. Alu Aotage Avamula taguafi maineno laya higeta lamage huta veafena tahau tayamopafi nelahaiye. 7 Nelahaigeta kelamage kea huta Anumaya Koti tokiyaleti aliyana nealita vayamoya ati kevema tamaga amayapina nealiya hauga amayapina halegula aye haiteya kamema nehaya avamete huta fatago kavakeya nehuta Satanienena tua nehuta Anumayamo aliyana nealune 8 Nagoa veamoya tagia alisaga nehayanagi nagoa veamoya tagia ali haviya hunelatae. Nagoa veamoya kamugea hatageya vainelayanagi nagoa veamoya huya kanale hunelatae. Tagaya tama kavakeya nehunanagi tagaifena “Havige huya ayelavataga nehae.” huya nehae. 9 Nagoa veamoya tagaifena “Afa vaya kana humainae.” huya nehayanagi Anumaya Kotiene nagoa veanene “Aao amaki hanea vaya mainae.” huya nehageya nagoa veamoya tatafa huya tahayayanagi ageho ofalinone. Anumaya Koti kema nehunafenagiya hamai vailateya tahayayanagi ofalinone. 10 Nagoa yafena tahauna hunanagi mukia kanafina taipamoa kanale nehigeta musena nehune. Afeno yatia omaleanagi Yisasi kema huhaleta nehunafenagita nagoa veamogamina tusia kanale yana neamamune. Nagoa yatia omaleanagi afeno yaamima hanea vaya kana huta mainone. Ani yamoa tagaipina falote higeya veamoya tagaila nelagae.
11 Kolini kumate mainaya nelafugatama tamakaifena aluya huno nelahaigeta nago kea fala okinonagi fatago huta tamahapai-mainone. 12 Tamahanepaunageno tamakaifena lahaiyanagi tamakaya tagaifena otamahaiye. 13 Nagaini nafane kana hutama mainayafe tamakaila taguama tamamuna avamete hutama anonatia tagaila tamakua tamiho.
Tagaya Anumaya Kotina alu aotage nomaa mainone.
14 Aliya aligaheno anemoya vema aligaheno vemoya anema aligaheno naama hinutamahena Anumaya Kotina amakaveno huneataya veanenena ailo okaeho. Ailokaetama maisayana hanaa huno fatago humainea yaene kefo yamoenena ailokaeana maigae? Hani yamoa hale yamoenena ailokaegao? 15 Ifi Yisasi Kalaisiene Satanienena ailokaeana nagoke anaipale maigao? Ifi Anumayamo akave nomalaya veanene Yisasife haviya amakupi malenaya veanene ailokaeya maisayana nagoke amaku amakesale omaigahae. 16 Ago fali-mainaya veafe “Anumayati maine.” huya amakisana nevaiya yaene Anumaya Kotima mainea noene aliya nagopi malesayana kanale hugahio? Anumaya Kotia haimuene kanoa tagai tagupi maineafe Anumaya Koti avopina mage huno hu-maineane
“Nagaya amakupi mainena amakaiene vaiyatete nehuna Anumaya Kotiami maisugeya nagai anaga maigahae. 17 Ani yafe kefo yana neataletama alule mainetama oniyaage kefo yana ohisagena nagainilega tamavalena tamategahue. 18 Lamatenena tamakaila nelamafana maisugetama nagai nafane munaneyaga maigahae. Nagaya mukia tokiyamona aepaagina mainoe. Anumayamona, mani kea nehue.” huno higeya kae-malenayane.