1 Yisasi anagala Yelusalemua mainagena amaya hisaya mone amamisaya kea hugahe hue. Kalesia kotega mainaya veamogamina hamapaugeya humainaya kavala tamakaya ania hiho. 2 Nagaya esua kanafina ani monema alitalu hisaya yafena nonahaigi Sotamaahe Sotamaahe alisaya monea ali fako hutama alu vaya amamisaya monea alitalu hute hute hiho. 3 Ani kava nehagena esua yupa tamahaisia vayala hapalisagena avo kaena amamitena humatesugeya avoene monene aliya Yelusalemua ugahae. 4 Ugahagi nagaya visua nagesa hisugenofena amakaya nagaiene ugahae.

5 Masetonia kotega mainaya anagamogamina mogetena tamakaitega egahue. 6 Neena nago kanafina tamakaiene yasima alisia ikatela mainena alulegama ugahe hisugetama nagaila naya hutama ali kate nategahae. 7 Anumayamoa kanalene hisigena nagayama visuana tamaketena aupaa tamatalena visua yafe onahaigi nagoene ayaaya kanagefa tamakaienena maisua nagesa nehavue.

8 Efesusi kumate mainena kavema afulesia kanahe muse hisaya imu kisaya kanamoa falote hutesigena ugahue. 9 Meni kanafina Anumaya Kotia agai kea hamapaisuafe fita yakinateno tusia aliyana namigena nealugeya kasagoya veamoya ani kea nehaviyanagi ani kemona kame vayaa kasagoya vaya mainae.

10 Nagaya Anumaya Koti aliya nealua kava huno Timotia Anumaya Koti aliya nealianagino tamakaitema visiana tamakaife kolia ohuno aipamoa falu nehinageno kanaleya huno maino. 11 “Afa kano maine.” hutama hu-haviya hu-oateho. Falu yapi mainesigetama aya hutama hutesageno nagaya mainolega kanaleya huno eteno esie. Agayaene nagoa nafunaganayaene esayafe amakava mainoe.

12 Apolosia nenafufe nehue nagoa nafunaganayaene “Kolini kumate vuo” huna hamapaite hamapaite nehuanagi “Menia ovisua nagesa nehianagina ougahugi haenagama visua kananiama hanesigena ugahue.” huno humaine.

13 Kayetama mainetama Yisasife havitama lamakupi malenaya yana atafa hutama kolia ohutama lokiya vaitama maiho. 14 Nelama-fugamifena tamahau tamayamopafi nelahainage-tama mukia kavala hiho.

15 Tamakaya Setefanasifena havi-mainae. Kaliki kotega agaiene agaia afamoaene hagoteya amakua aiyahae huteya Yisasife haviya amakupi malenayapiti mukia kanafina Yisasi anagala amaya humainae. 16 Naa kava humaineya Anumaya Koti aliyana tusiya huya nealiya veamogami amaiyaafi maiho.

17 Tamakaya alulega mainetama nahaomaenayanagi menia Setefanasiene Fotunatusiene Akaikusiene nagaitega agena nahanemaeyafe tusia muse nehue. 18 Amakaya tamakaifema me nahapaigeno naipamoa kanaleya higena muse nehue. Muse nehuafe tamakai tamaipamoa ania huno kanaleya humaine. Naa kava nehaya vayafena tusia muse hutama amakia alisaga hiho.

19 Esia kotega alu kumate kumate maineya Yisasife haviya alitalu nehaya veala “Mainafio?” huya hu falu fala hunelamatae. Akuvilaene Palisilaene anakai nopima Yisasife haviya melitalu nehaya veala Anumayamoene ailokaeya maineya “Mainafio?” huya hu falu fala hu nelamatae. 20 Mukia mafi mainaya tafu-taganagaya “Mainafio.” huya hu falu fala hu nelamatae.

Tamakaya Anumaya Koti anaga mainayafe nagoke nagokemogatama tamayana oami aami hutama maiho.

21 Nagoa kea nago kanomona hapaugeno kae-maleneanagi nagaya Polona mamona atupa avona nagaini nayapiti kaena nelamamue.

22 Anumayamofe havino hau ayamopafi nomalea kanomona Anumaya Kotia ali haviya hutesie. “Anumayatimogae aupaa eno.” huna nehue. 23 Anumayati Yisasi kayone yamaa tamakaiene hanesie huna nehue. 24 Yisasi Kalaisiene aigamaena tamakaila naipa nelamamue. Tamage.