1 O Iesu tomo nam anun a kum nat na ususer det wan kutus una du tasi Galili utong una ara papor sur a papor anun a taro Gerasa. 2 Ra o Iesu i sirok gusun a pot, ara musano, a laulau na nion kura uni, i wan gusun a kum kulam na minat sur in nan barato i. 3 A musano ra, i ser kis una kum kulam na minat. Ma kataio ut i pet lar pasi sur in pam ukai i, ma a sen kai ke sot sur din ker ukai i nami. 4 A susut na dino mo, di ser ker ukai aru lamano ma aru kikino nama sen, ikut i ser rubut a sen ma i ser sak ginogino a kum sen gusun aru kikino. Katutaio ut i dekdek sur in umarom lar pasi. 5 Una kum mirum ma a waspi, i ser kukukuk abit tiro una kum kulam na minat ma una kum tangai, ma in toktok a pinpinino nama watat.

6 Ra i bakbak utmakai, i tama o Iesu, i kalabor ma i kis butkeke nama urur numugu tano. 7 A musano ra i kukukuk nam in labino walngano lena, “Iesu, a Nutun o God, a Labino Sakit, asau ra u nem na pami un iau? Un liliman umatan o God sur gong u ukadik iau.” 8 I wasiso lenri, uni o Iesu i sa watung tari lena, “A laulau na nion, un pirso gusun a musano ri.” 9 Numur o Iesu i tingi lena, “Osi a risam?” Ma i balu i lena, “A risang A Kabo Liur, uni a susut met.” 10 Ra i saring liklik o Iesu sur gong i lakro ru tar det gusun a nubual ra.

11 A kabo liur na boro kura det wangon tiro milau kut una tangai. 12 Ra a kum laulau na nion det saring o Iesu lena, “Un tulu met utiro torom a kabo liur na boro, sur met in ruk utiro un det.” 13 O Iesu i mulaot ru det. A kum laulau na nion det pirso gusun a musano, ma det ruk taru una kum boro. A kum boro det kalabor pirso una palis sur a du tasi, ra det kongo rop. Det rop det elar nama ru arip.

14 A taro ra det ser tabor a kabo liur na boro ra, det kalabor ma det inanos tiro utamon ma tiro utkai una kum natnat na tamon. Ra numur a taro det wan sur det in tama asau ra i wanpat. 15 Ra det wanpat torom o Iesu, det tama a musano ra a kabo liur na laulau na nion numugu det sisiop taru uni. Kura mukut i kis taru, i sa pipis pas ma a nuknukino i sa talapor melet. Ra a taro ra det ngara doko. 16 Det ra det sa tama tari, det inanos a taro una kum utna ra i wan pat una musano ra a kum laulau na nion kura uni, ma una kum boro kai. 17 Numur a taro det saring o Iesu sur in nan gisen gusun anundet a papor.

18 O Iesu i kas utiro una pot, ra a musano ra numugu a kum laulau na nion kura uni, i saring o Iesu sur in nan tomo nami. 19 O Iesu ke tarom tano, ikut i lena, “Un nan utiro una num a tamon torom a kum kukum, ma un inanos det una labino utna ra a Labino i sa pam tari un ui, ma una nuna marmaris torom ui.” 20 Ra a musano ra i wan, ma i inanos a taro tiro o Dekapolis* O Dekapolis a kukuraino a noino lamlabino tamon., una labino utna ra o Iesu i sa pam tari uni. Ra a taro rop det kisin.

21 O Iesu i kas una pot ma i wan melet utiro una ara papor du tasi. A kunur na taro det wan tomo ma det tur talilis pasi tiro una usalin. 22 Ara mugumugu tagun a rumu na lotu, a risano o Jairus, i wanpat tiro. I tama o Iesu, ra i kis butkeke sa numugu tano, 23 ma i saring dekdeki lena, “A nutunglik, a ino, i sa ling na mat. Aiap, dar in nan ma un ubek a lamam sapat netes uni, sur in langolango ma in laun.”

24 Ra o Iesu i wan tomo nami, a kunur na taro det muri, ma det bukus talilis pasi.

25 Ma ara ino kura, i misait nama gap elar nama noino ma aru kilalo. 26 I taramo a labino ngunungut ulaman a kum dokta, ma i urop tar anun a kum utna ra i ulengi un det. Ikut ke langolango, a misait i labo nanan kut. 27 I longoro a saksakutna un o Iesu, ra i wan tiro ubalan a kunur na taro, numur tan o Iesu, ma i tulan anun a saket. 28 I pami lenra, uni i nuki lena, “Ra an tuki kut anun a saket, an langolango.” 29 Uniutra a gap i tuk, ra a ino i taramo a pinino i langolango ma ke taramo melet a ngunungut.

30 Uniutra, o Iesu i taramo a dekdek i wan gusuni, i tupukus torom a kunur na taro ra i iting lena, “Osi ra i tulan anung a saket?” 31 Anun a kum nat na ususer det balu i lena, “U tama a kunur na taro det talilis bat pas ui, ra u iting pepetlai lena, ‘Osi ra i tulan iau?’ ” 32 Ikut o Iesu i tamtama utmakai sur osi ra i tulan tari. 33 A ino ra i tasman a misait i sa rop gusuni, i wan ra i puku sa numugu tan o Iesu. I ngara ma i neneder, ra i inanosi nam asau ra i sa pam tari. 34 O Iesu i watungi tano lena, “Nutunglik, anum a nurnur i sa ulangolango pas ui. Un nan nama malmal. Anum a misait i sa rop gusun ui.”

35 Ra o Iesu i wasiso utmakai, a ramano kum musano ra det wan tagitiro una rumu anun o Jairus, a mugumugu tagun a rumu na lotu, det wanpat. Det lena, “O nutumlik i sa mat. Gong mo u ubalon a tene ususer.” 36 O Iesu ke nuk pas asau ra det watungi, ikut i inanos a mugumugu tagun a rumu na lotu lena, “Gong u ngara. Un nurnur kut.”

37 Ke madek taio sur in muri, ikut i mulaot sur o Pita, ma o Jems der sino nam o Jon detul in muri. 38 Ra det wanpat tiro una rumu anun a mugumugu ra, o Iesu i tama det ra det tala, det ugaia ma det domos. 39 I ruk ra i watungi tandet lena, “Ilai ra mot tala ma mot ugaia nama tinangis? A ino lik ri ausur i mat, i inep dumun kut.” 40 Ra det urongon kut uni.

I tulu pirso ru det rop, ikut i ben pas a taman a ino lik ma o nano ma anun a tulu nat na ususer, ra detul wan tomo nami. Ra det ruk torom a ino lik. 41 O Iesu i pam a laman a ino lik ra i inanosi lena, “Talita koum!” A kukuraino i lenri, “A ino lik, a watungi tam, un katutur!” 42 Uniutra, a ino lik i katutur ma i wan. Det tama i ra det kisin doko. I elar nama noino ma aru kilalo anunu. 43 O Iesu i turbat dekdek det sur gong det inanos tar taio un asau ra i sa pam tari. Ma i inanos det sur det in tabor a ino lik ra, nam lako utna na inangon.