1 Ara bung o Iesu i wararing un ara nubual. Ra i sa wararing rop, ara tagun anun a kum nat na ususer i watungi tano lena, “Labino, un ususer met nama niaring, elar nam o Jon i ususer anun a kum nat na ususer.” 2 Ra o Iesu i len tandet lena, “Ra mot in wararing, mot in wararing lenri,

5 O Iesu i watungi tana nun a kum nat na ususer lena, “Ra taio tagun mot in nan torom tu pasano una labino mirum, ma in saringi lena, ‘Pasang, a nem lako tul in beret munung. 6 Uni ara pasang i wanpat torom iau una nun a inawan ut, ra kalako utna sur an tabori nami.’ 7 Ra a pasano kura urumu in watungi lena, ‘Gong u ubalon iau! Met sa tagar, ma met nama kum nutnutung liklik met sa inep. Kan pirso melet mo sur an los tar tu utna tam.’ 8 A inanos mot, in pirso sur in pitar tar a beret tano, ausur i kibino ra der pasano, awu, i kibino uni ra i sasaring liklik ut.

9 “A watungi tamot, mot in sasaring, ra din tabor mot, mot in sisio, ra mot in sio pasi, mot in pinpidik, ra din papos pas mot. 10 Uni det rop ra det sasaring din tabor det, ma osi ra i sisio in sio pasi, ma osi kai ra i pinpidik, din papos pasi. 11 Osi na pasamot a kum tamtaman a kum nat liklik, ra a nutunulik in saringi sur tin kiripo, in tabori kut nam in nusui? 12 O, ra in saringi sur tin nikiau, in tabori kut nama bukalo? 13 Mot a laulau na taro, ikut mot tasmani ut a wakak na etabor sur mot in tabor a kum nutnutumot nami. Ra mot ser pami lenra, i lingmulus sakit lena, osi ra in saring a Tamamot ra i kis sapat una langit, in tabori ut nama Tokodos na Nion.”

14 O Iesu i lakro ru a laulau na nion ra i ngat gusun ara musano. Ra a laulau na nion ra i pirso gusuni, a musano ra i wasiso maragom. Ma a kunur na taro det kisin. 15 Ikut ara taro tagun det, det watungi lena, “I ser lakro ru a kum laulau na nion nama dekdekin o Belsebul, a labino anun a kum laulau na nion.”

16 A ramano taro kai det lar o Iesu sur in pam tu ukinalong sur in ese i lena, i tagisapat una langit. 17 Ikut o Iesu i sa tasman a nuknukindet, ra i watungi tandet lena, “Ra tu gapman det melet ut det in waim etalai, a gapman ra in rop kut. Ma ra lako taro tagun tu rumu det in waim etalai melet kut, det in nan sarara. 18 Ra o Satan in waim melet kut nam anun a kum tultul, anun a gapman in tur dekdek pepetlai? A watungi lenra uni mot watungi un iau lena, a lakro ru a kum laulau na nion nama dekdekin o Belsebul. 19 Ikut, ra iau, an lakro ru a kum laulau na nion nama dekdekin o Belsebul, anumot a taro, det ser lakro ru a kum laulau na nion nama dekdekin osi? Anundet a pinapam ut in upuaso i lena anumot a etakun i raro. 20 Ikut, ra an lakro ru a kum laulau na nion nama dekdekin o God, in ese i lena a matanitu anun o God i sa wanpat torom mot.

21 “Ra ara dekdek na musano i sa emar pas nam anun a kum utna na inaim, ra i tamtamabat anun a rumu, anun a kum utna in kis wakak. 22 Ikut, ra taio ra i dekdek tano in nanpat toromi ma in winim pasi, in ras ru anun a kum utna na inaim ra i nurnur taru uni, ma in los pas anun a kum utna rop, ma in tabor a taro nami.

23 “O naro ra ka mir tar pasano mir ebar. Ma o naro ra ke warut iau u eben, i lu sarara ru a taro kut.

24 “Ra tu laulau na nion in pirso pas gusun tu musano, in nan una kum nubual ra kalako danim iai, sur in mana, ikut ken sio pas tu nubual sur in mana uni. Ra in watungi lena, ‘An milet melet sur anung a rumu, ra a sa pirso pas gusuni.’ 25 Ra in nanpat, in tama i ra di sa surupu tari, ma di sa ukodos tari. 26 Numur in nan ra in ben melet pas a wonom mawit na laulau na nion, ra det laulau sakit tano, ma det in ruk rop taru una rumu ra, ma det in kis uni. Ma a nilaun anun a musano ra in laulau sakit mo tan a nilaun ra numugu i utur ukai i.”

27 Ra o Iesu i wasiso utmakai, ara ino tagun a kunur na taro ra, i watungi lena, “A ino ra i usus pas ui ma i ugu ui, i dan.” 28 O Iesu i balu i lena, “Ikut det ra det longoro a wasiso anun o God ma det tarom uni, det dan sakit.”

29 Ra a kunur na taro det bukus nanan, o Iesu i watungi tandet lena, “A taro tagun uniri, a sakino taro. Det tamtama sur tu ukinalong, ikut ka din pam taio torom det. Din pam a ukinalong kut elar nam i ra di sa pam tari un o Jona. 30 Uni o Jona i a ukinalong torom a taro Niniwe, lenkutkai ra a Nutun a Musano in nanpat a ukinalong torom a taro tagun uniri. 31 Una bung na warkurai, a kwin tagitong una matmatano tobar in tur ma in takun dekdek a taro tagun uniri, uni i wan ut tagitiro bakbak sur in longoro a mananos anun a King Solomon, ma o naro ra i labo taun o Solomon kuri ut nin, ikut ka mot longoro i. 32 Una bung na warkurai, a taro Niniwe det in tur ma det in takun dekdek a taro tagun uniri, uni det nukpukus una warawai anun o Jona, ma o naro ra i labo taun o Jona kuri ut nin, ikut ka mot longoro i.

33 “Katutaio in ungangon tar tu lam ma in munu tari, o in wop bat tari nama paket. Awu! In ubek tari ut netes una nuna turtur, sur det ra det ruk det in tama a talapor. 34 Arin matam der elar nama lam una pinim. Ra arin matam der wakak, a pinim rop in bukus nama talapor. Ikut ra der laulau, a pinim rop in bukus nama dumirum. 35 Un utumarong ui, sako a talapor ra kura un ui in dumirum. 36 Ra a pinim rop in bukus nama talapor, ma katu dumirum uni, in talapor rop, elar nama lam ra a talaporino i sisio un ui.”

37 Ra o Iesu i sa wasiso rop, ara Parisi i ben pasi sur det in nangon tomo. O Iesu i ruk ma i kis sur in nangon. 38 Ma a Parisi ra, i tama i lena o Iesu ke gos lamano mugu pas, ra i kisin uni. 39 Ra a Labino i watungi tano lena, “Mot a kum Parisi mot gosgos pasi kut a surun a kap ma a pelet, ikut a balamot i bukus nama petutna na ungongos pas a utna tan taio ma a kum sakino petutna. 40 Mot a kum longlong mot! Ka mot tasmani lena, o naro ra i pam a surun a kum utna, i pami utkai a balandet? 41 Mot in tabor a kum sibo na taro nama utna ra kura ubalan anumot a kum kap ma a kum pelet, sur katu dur kura un mot umatan o God.

42 “In laulau doko torom mot a kum Parisi. Mot nuknuk doko sur a kum natnat na warkurai lenri, mot pitar in tekteken nanai torom o God tagun a noino natnat na duwai ra i sangsangnain wakak tagun anumot a kinobot, ikut ka mot pam a tokodos na warkurai torom a taro ma ka mot nem o God. I wakak sur mot in pam a tokodos na warkurai torom a taro ma mot in nem o God, ma gong kai mot dumano ru in tektekene tagun a noino, sur mot in pitari torom o God. 43 In laulau doko torom mot a kum Parisi, uni mot nem a kinkinis na labino sa numugu una kum rumu na lotu. Ma mot nemi kai sur a taro det in pitar a labino urur torom mot una kum nubual na inawan tomo. 44 In laulau doko torom mot, uni mot elar nama kum tungtung na minat ra katu ukinalong un det, ma a taro det wanan sapat netes un det ma ka det tasmani* Ra tu te Juda in nan sapat netes una tamon na minminat in dur umatan o God..”

45 Ara tagun a kum tene ususer tagun a Warkurai i watungi tan o Iesu lena, “Tene Ususer, ra u watungi lenri, u watung laulau met kai.” 46 Ra o Iesu i balu i lena, “In laulau doko kai torom mot a kum tene mananos tagun a Warkurai, uni mot pitar tar a kum warkurai ra i ngangitin sur a taro det in muri, ma mot ut, ka mot warut det uni. 47 In laulau doko torom mot, uni a kum tumtubumot tagun numugu det um doko ru a kum poropet, ma mot utur a kum aim nisan a kum kulam na minat anundet, ikut ka mot mur anundet a wasiso. 48 Lenra mot upuaso i lena, mot mulaot tomo nama kum tumtubumot tagun numugu una nundet a pinapam ra det um doko a kum poropet, uni det um doko det, ma mot, mot utur a kum aim nisan a kum kulam na minat indet. 49 I mo ri a kibino, o God ra i mananos doko i watungi lena, ‘An tulu ru a kum poropet ma a kum aposel torom a taro. A taro ra det in um doko lako taro tagun det, ma det in ukadik lako taro kai tagun det.’ 50 Mot a taro tagun uniri, din pitar a warkurai na minabalu torom mot, una gapin a kum poropet rop ra di sa um doko tar det, turpasi ut una turturkibina rakrakon bual. 51 Turpasi ra di um doko o Abel ma i wan tuk ra di um doko o Sekaraia, i ra i iru epotor nisan a kabulu na tuntun etabor ma a nubual ra i Tabu, tiro urumu una rumu na etabor. A watungi tamot, din pitar a warkurai na minabalu torom a taro tagun uniri una kum utna rop ri. 52 In laulau doko torom mot a kum tene mananos tagun a Warkurai, uni mot rakon ru a ki tagun a matansako sur a mananos. Mot ut ka mot ruk uni, ma mot turbat det ra det nem na ruk.”

53 Ra o Iesu i pirso gusun a rumu ra, a kum tene ususer tagun a Warkurai ma a kum Parisi det kankan doko ma det ting pukpukusi una susut na utna. 54 Ra det kis langlang o Iesu sur tu ngas na wasiso sur det in takuni nami.