1 Numur o Iesu i wan tuptupukus una kum lamlabino tamon ma a kum natnat na tamon rop, ma i warawai nama Wakak na Wasiso una matanitu anun o God. I wan tomo nama nun a noino ma aru nat na ususer, 2 ma a kum wardain kai, ra i sa lakro ru tar a kum laulau na nion gusun det, ma i sa ulangolango pas det gusun a kum misait. Iri a kum risandet: O Maria, ara risano kai o Magdalen, i ra a wonom mawit na laulau na nion det pirso pas gusuni, 3 ma o Joana a ino anun o Kusa, i a mugumugu anun a kum tultul anun o Erod, ma o Susana, ma a susut kai. A wardain ri det warut o Iesu ma anun a kum nat na ususer, nam anundet a kum ululeng ut.

4 Ra a labino kunur na taro tagun a kum tamon det wanpat tomo torom o Iesu, i watung ara wasiso elelar torom det lena, 5 “A tene minarut i wan sur in sapro a kum pitino wit. Ra i sapro nanan a kum pitino wit, a ramano det puku una kisapi, ra a taro det papas netes uni, ma a kum piko kai det wan ru i. 6 A ramano kai det puku una nubual na watat. Det lubung pat, ra det main melet kut, uni a piso i sengesenge doko. 7 A ramano kum pitino wit det puku epotor una kum kuikui, ra a kum kuikui det lubung tomo nam det, ma det rau bat pas det. 8 A ramano kum pitino det puku una wakak na piso. Det lubung pat ra det wu. Tektekene i wu ara mar na wino.”

Ra i sa watung tar a kum wasiso ri tandet, i watungi lena, “Osi ra arin talngano kura, i wakak sur in longoro nami.”

9 Anun a kum nat na ususer det tingi sur a kukurai na wasiso elelar. 10 Ma i watungi tandet lena, “O God i sa pitar tar a mananos tamot, sur mot in talapor una kum wasiso na pidik una nun a matanitu. Ikut torom a taro gisen a ususer det nama kum wasiso elelar, sur

11 “A kukurai na wasiso elelar ri i lenri, a pitino wit i elar nama wasiso anun o God. 12 A kum pitino wit ra det puku una kisapi, det elar nam ara taro ra det longoro a wasiso, ra o Satan i wanpat, ma i rakon ru a wasiso gusun in balandet, sur gong det nurnur, ma gong di ulaun det. 13 Ra a kum pitino ra det puku una nubual na watat, det elar nam ara taro ra det longoro a wasiso, ra det pam ukai i nama gasgas. Ikut kalako wakakor indet, anundet a nurnur ke tur suanoi. Ra a kum larlar i wanpat torom det, det puku. 14 A kum pitino ra det puku epotor una kum kuikui, det elar nam ara taro ra det longoro a wasiso, ikut a labino nuknuk una kinkinis anundet, a kum ululeng, ma a gasgas tagun a nilaun nin upiso, det rau bat a wasiso anun o God, ra ka det wu lako windet. 15 Ikut a kum pitino ra det puku una wakak na piso, det elar nam ara taro ra det longoro a wasiso, ma a balandet i wakak ma i tokodos, ra det pam ukai dekdek a wasiso ra det muri tuk det wu a windet.

16 “Katutaio in ungangon tar tu lam ma in wop bat tari nama paket, o in ubek tari kai nago utuntudu ina kabulu. Awu! In ubek tari ut netes una nuna turtur, sur det ra det ruk det in tama a talapor. 17 Uni a kum utna rop ra i kis eno, numur in nanpat pupuaso. Ma a kum utna rop ra in parau, numur din tasmani ma in kis taltalapor. 18 Mot in nuknuk wakak una wasiso ra mot longoro i. Osi ra i pam ukai a mananos una wasiso anun o God, din tabor meleti nama labino. Ma osi ra ke pam ukai tu mananos una wasiso anun o God, din rakon ru i utkai asau lik ra i nuki lena i pam ukai i.”

19 O nan o Iesu ma a kum tistisino det wanpat sur det in tama i, ikut ka det pet lar pasi, uni a kunur na taro det tur talilis bat pasi. 20 Ra di inanos o Iesu lena, “O nam ma a kum tistisim kunago det tur nago upiso. Det nem na tama ui.” 21 Ra i balu det lena, “Det ra det longoro a wasiso anun o God ma det muri, det ra o nang ma a kum tistising.”

22 Ara bung o Iesu tomo nama nun a kum nat na ususer, det kas una pot, ra i watungi tandet lena, “Dat nan utong una ara papor tasi.” Ra det wan. 23 Ra det kalabor nanan nama sel, o Iesu i inep dumun. A dekdek na wuwu i ragoti una du tasi, ra a top i walwalkas, ma milau det in iru. 24 A kum nat na ususer det wan toromi, det wangun pasi, ma det inanosi lena, “Tene Ususer, Tene Ususer, dat na iru!” I katutur, i kankan ana wuwu ma a dekdek na top, ma der mana, ra i mililo rop. 25 Ma i watungi tan a kum nat na ususer lena, “Awai i anumot a nurnur?” Det ngara, ma det kisin, det ting etetalai det lena, “Osi na ngas na musano mulus ri? I wasiso torom a wuwu ma a top, ra der mur anun a wasiso!”

26 O Iesu ma a kum nat na ususer det sot una papor anun a taro Gerasa, tiro un ara papor du tasi tagun a papor Galili. 27 Ra o Iesu i sirok gusun a pot, ara musano tagun a tamon ra i wan barato i. A kum laulau na nion kura uni. I sa suanoi, ma ke ser pipis, ma ke kis kai un tu rumu, i ser kis kut una kum kulam na minat. 28 Ra i tama pas o Iesu, i kukukuk, ma i puku pirso taru nisan aru kikino, ma i kukukuk nam in labino walngano lena, “Iesu, a Nutun o God a Labino Sakit, asau ra u nem na pami un iau? A saring ui, gong u ukadik iau.” 29 I wasiso lenri, uni o Iesu i sa wasiso dekdek taru torom a laulau na nion sur in pirso gusun a musano ri. A susut na dino a laulau na nion i solsolongi. A taro ra det ser tamtamabati, det ser ker ukai aru lamano ma aru kikino nama sen, ikut i ser rubut det kut, ma a laulau na nion i ser ungongos pasi usapat una kum nubual kalako taro uni.

30 O Iesu i tingi lena, “A risam osi?” Ma i balu i lena, “A risang A Kabo Liur,” uni a susut na laulau na nion det sa ruk taru uni. 31 Ma det saring o Iesu sur gong i tulu ruk tar det un in labino tung ra katu tuktukino.

32 A kabo liur na boro kura det wangon tiro una tangai. Ra a kum laulau na nion det saring o Iesu sur det in ruk taru una kum boro. Ra i mulaot ru det. 33 Ma a kum laulau na nion det pirso gusun a musano ra, ma det ruk taru una kum boro. A kum boro det kalabor pirso una palis sur a du tasi, ra det kongo rop.

34 A taro ra det ser tabor a kabo liur na boro, det tama a utna ri, det kalabor ma det inanos tiro utamon ma tiro utkai una kum natnat na tamon. 35 Ra a taro det wan sur det in tama asau ra i wanpat. Det wanpat torom o Iesu, det tama a musano ra a kabo liur na laulau na nion det pirso pas gusuni. Kura mukut i kis taru nisan aru kikin o Iesu, i sa pipis pas ma a nuknukino i sa talapor melet. A taro ra det ngara doko. 36 Det ra det sa tama tari, det inanos a taro lena o Iesu i sa lakro ru a kum laulau na nion gusun a musano ra. 37 Ma a taro rop tagitiro una papor anun a kum Gerasa det saring o Iesu sur in nan gisen gusun det, uni det ngara doko. Ra o Iesu i kas melet una pot ma i wan.

38 A musano ra a kum laulau na nion det sa pirso taru gusuni, i saring o Iesu sur in nan tomo nami. Ikut o Iesu i tulu ru i kut lena, 39 “Un milet melet sur anum a rumu, ma un wasiso una labino utna ra o God i sa pam tari un ui.” Ra i milet melet, i wasiso una tamon ra, una labino utna ra o Iesu i sa pam tari uni.

40 O Iesu i milet melet, a kunur na taro det gas pasi, uni det rop det kis langlang ut suri. 41 Ara musano, a risano o Jairus, a mugumugu tagun a rumu na lotu, i wanpat ra i kis butkeke sa numugu tan o Iesu. I saring dekdeki sur in nan usa una nun a rumu, 42 uni ara nutunulik kut, a ino, anun a kilalo a noino ma aru, i sa ling na mat.

Ra o Iesu i wan, a labino kunur na taro det talilis bat pasi. 43 Ara ino kura i misait nama gap elar nama noino ma aru kilalo, [ma i sa urop tar anun a mani una kum dokta], ikut kataio i ulangolango lar pasi. 44 I wan numur tan o Iesu, ma i tulan tar a sinisir na saket anunu, ma uniutra a gap i tuk. 45 Ma o Iesu i iting lena, “Osi ra i tulan iau?” Ra det rop det ipul, o Pita i watungi lena, “Labino, ko tama a labino kunur na taro ri det talilis bat pas ui?” 46 Ikut o Iesu i watungi lena, “Ara pasandet i sa tulan tar iau, uni a tasmani lena, a dekdek i sa wan gusun iau.” 47 A ino i tasmani lena di sa sio pasi, ra i neneder pat, ma i puku sa numugu tan o Iesu. Umatan a kunur na taro rop, i inanos o Iesu una kibino ra i tulan tari, ma i inanosi kai lena uniutra i langolango. 48 Ma o Iesu i watungi tano lena, “Nutunglik, anum a nurnur i sa ulangolango pas ui. Un nan nama malmal.”

49 Ra o Iesu i wasiso utmakai, ara i wan tagitiro una rumu anun o Jairus, a mugumugu tagun a rumu na lotu, ra i watungi tan o Jairus lena, “O nutumlik i sa mat. Gong mo u ubalon a tene ususer.” 50 Ra o Iesu i longoro a wasiso ra, i watungi tan o Jairus lena, “Gong u ngara. Un nurnur kut, ra din ulaun melet pasi.”

51 Ra i wanpat una rumu, ke madek taio sur in ruk tomo nami. I ben pasi kut o Pita, o Jon ma o Jems, ma a tamana ino lik ma o nano kai. 52 A taro rop det kukukuk ma det domos, ra o Iesu i watungi tandet lena, “Gong mot domos. A ino lik ri ausur i mat, i inep dumun kut.” 53 Ikut det urongon kut un o Iesu, uni det tasmani lena, i sa mat. 54 Ra o Iesu i pam a laman a ino lik, ra i inanosi lena, “Nutunglik, un katutur.” 55 Ra a niono i milet toromi, uniutra i katutur. Ra o Iesu i inanos det sur det in tabor a ino lik ra, nam lako utna na inangon. 56 O tamano ma o nano der kisin doko, ikut o Iesu i turbat der sur gong der inanos tar taio un asau ra i wanpat.