1 O Pol i tamtama tokodos torom a taro na kiwung, ra i watungi lena, “A kum tistising, tuk una bung ri, iau, anung a nilaun i talapor umatan o God, ma in balang ke takun iau un tu utna.” 2 Uniutra o Ananias a mugumugu na tene etabor torom o God, i tulu det ra det tur milau o Pol sur det in pasor a wano. 3 Ra o Pol i watungi tano lena, “O God in pasor ui, ui u elar nama papor rumu ra di pen tari nama kabang, ikut tiro ubalano i laulau rop. U kis sur un warkurai iau elar nama wasiso na Warkurai, ikut ui ut u lakai a Warkurai ra u itula sur din pasor iau.” 4 Det ra det tur milau i det watungi lena, “Pepetlai, u nemi sur un watung laulau a mugumugu na tene etabor torom o God?” 5 Ra o Pol i balu det lena, “A kum tistising, ka tasmani lena, i a mugumugu na tene etabor torom o God, uni di sa tumus tari una Buk Tabu lena, ‘Gong u watung laulau tu mugumugu anun anum a taro.’ ” Kisim Bek 22:28

6 O Pol i tasmani lena, a ramano taro tagun det, a kum Sadusi, ma ara taro kai a kum Parisi, ra i kakabo una kiwung lena, “A kum tistising, iau a Parisi, ma a nutun a Parisi. Uniri di takun iau uni a nurnur una nilaun melet anundet ra det mat.” 7 Ra i sa watung tari lenra, a kum Parisi ma a kum Sadusi det turpas a wasiso na kankan, ra a taro na kiwung det tapagol. 8 Uni a kum Sadusi det nurnur lena katu nilaun melet gusun a minat, ma kalako ensel, ma kalako nion, ikut a kum Parisi det nurnur un detul rop. 9 Ra a labino purpuruon i turpasi, a ramano kum Parisi, det ra a kum tene ususer tagun a Warkurai, det tur, ma det engaras dekdek, ma det watungi lena, “Ka met sio pas tu sakino utna ra a musano ri i raro uni. Dat in lai mo? Sako ra tu nion, o tu ensel i sa wasiso taru toromi.” 10 Ra i sa labo a wasiso na engaras, ma det sa turpas a inaim, a labino mugumugu anun a kum tene inaim i ngara, sako det in dat ngagos tar o Pol. Ra i tulu ru a taro na inaim, sur det in nan ma det in dat pasi gusun a taro, ma det in ben pasi utiro una rumu anun a taro na inaim.

11 Una mirum utra, a Labino i wanpat torom o Pol, ra i watungi tano lena, “Gong u ngara, un tur dekdek. U sa wasiso talapor taru un iau nin o Jerusalem, lenkutkai ra un wasiso talapor un iau tong o Rom.”

12-13 Una bung palu na kobot, a ramano kum te Juda, elar nama wat na noino ma i puku, det wasiso tomo pas ra det liliman lena, ka det in nangon, ma ka det in inum, tuk ut ra det sa um doko tar o Pol. 14 Det wan torom a kum lamlabino tene etabor torom o God, ma a kum mugumugu tagun a lotu, ra det watungi lena, “Met sa liliman taru sur ka met in nan tu utna tuk ut ra met sa um doko ru tar o Pol. 15 Met nemi sur mot tomo nama taro na kiwung, mot in pitar ru tu wasiso torom a labino mugumugu anun a kum tene inaim ma mot in toro pas o Pol gusuni, sur in tulu ru i torom mot. Mot in watungi lena mot nem na longoro tu wasiso talapor melet tano. Ra met, met in um doko ru i kut una kisapi ra kabaut i wanpat torom mot.”

16 Ikut a laban o Pol i longoro a wasiso na epak ri, ra i wan utiro una rumu anun a kum tene inaim, ra i inanos o Pol uni. 17 Numur o Pol i kabo pas ara mugumugu anun a kum tene inaim, ma i watungi tano lena, “Un ben a barman ri torom anumot a labino mugumugu, uni i nem na inanosi nam ara wasiso.” 18 Ra i ben pati torom a labino mugumugu, ra i watungi lena, “O Pol, o naro ra di ukarabusi, i kabo pas iau toromi, ra i saring iau sur an ben tar a barman ri torom ui, sur in inanos ui nam ara wasiso.” 19 A labino mugumugu i pam pas a laman a barman, ra i ben eno pasi, ra i tingi lena, “Asau ra u nemi sur un watungi tang?” 20 Ra i watungi lena, “A kum taro Juda det sa epak pas sur det in toro pas o Pol gusun ui, sur un tulu ru i markan torom a taro na kiwung, sur det in longoro tu wasiso talapor melet gusuni. 21 Gong u tarom tandet, uni a wat na noino ma i puku na taro det sa parau taru suri. Uni det sa liliman taru lena, ka det in nangon ma ka det in inum, tuk ut ra det sa um doko ru tar o Pol. Ra uniri det kis langlang sur anum tu nimulaot.” 22 Ra a labino mugumugu i turbati lena, “Gong u inanos tar taio lena u sa inanos tar iau una utna ri.” Ra numur i tulu ru i.

23 A labino mugumugu anun a kum tene inaim i kabo pas aru mugumugu toromi ra i watungi lena, “Mur in waninar aru mar na tene inaim, ma a wonom mawit na noino tene inaim ra det kas una kum os, ma aru mar na tene inaim ra det los a kum bele, ma mot in nan una lisu na du bung miri una mirum utong o Sisaria. 24 Mur in ben lako ru os, sur o Pol in nan nami. Mot in tamtamabat wakaki tuk mot in nanpat nami torom o Peliks, a labino mugumugu tagun a gapman.” 25 Ra i tumus a pas lenri toromi:

26 Iau o Klodius Lisias, a tumtumus torom ui o Peliks a labino mugumugu tagun a gapman.

A marmaris torom ui.

27 A musano ri, ra a tulu ru i torom ui, a kum taro Juda det pam ukai pasi, ma milau det in um doko i. Ikut met nama kum tene inaim, met wanpat, ma met ulaun pasi, uni a sa tasman tari lena i a te Rom. 28 A nemi sur an tasman asau a kibino ra di takuni, ra a beni torom anundet a taro na kiwung. 29 Uniri a sa talapor lena, di takun orosi kut una nundet a kum warkurai tagun a lotu, ma ke pam tu sakino utna ra in karabus uni, o din um doko i uni. 30 Ikut, ra di inanos iau lena det sa epak sur a musano ri, sur det in um doko i, a tulu lakit ru i torom ui. Ma a taro ra det takuni, a sa inanos tar det lena, det in nan torom ui nama nundet a etakun uni. I kut ra ma i rop.

31 Ra a taro na inaim det ben pas o Pol una mirum utong o Antipatris, lenutra di sa watung tari tandet. 32 Ra una bung numur, a taro na inaim ra det kas una kum os, det wan saksakit nam o Pol, ma ara taro na inaim kai det milet melet usapat o Jerusalem. 33 Ra det wanpat tiro o Sisaria, det pitar tar a pas torom o Peliks, a labino mugumugu tagun a gapman, ra det pitar tar o Pol toromi. 34 O Peliks i luk tar a pas, ra i ting o Pol lena, “Ui tagun osi na papor?” Ra i sa tasmani lena o Pol a te Silisia, 35 i watungi lena, “Una bung ra a taro ra det takun ui det in nanpat nin, an longoro maragom anum a wasiso.” Ra i itula sur din tamtamabat o Pol una rumu anun o Erod.