1 O Pol ma o Sailas der wan utong o Ampipolis ma o Apolonia, ra numur der wanpat tong o Tesalonaika. Tiro o Tesalonaika ara rumu na lotu anun a taro Juda kura iai. 2 O Pol i ruk torom det una rumu na lotu elar nami ra i ser pami. Una tulu Bung na Sabat i wasiso tomo nam det una Buk Tabu. 3 I watung palosi ma i upuaso i lena, i sot ut sur a Karisito in los a ngunungut ma in mat ma in katutur melet gusun a minat. Ma i watungi kai lena, “O Iesu ri a inanos mot nami, i ut a Karisito ra o God i tulu ru i urin.” 4 Ara taro Juda ma a susut na te Grik ra det lotu torom o God, ma a susut na mugumugu na ino kai, det nurnur ma det mur o Pol ma o Sailas.

5 Ikut, a nuknukin a ramano taro Juda i laulau doko un der, uni a susut det mur der. Ra det ben pas a ramano kum tene pet laulau tagun a nubual ra a taro det ser wan tomo iai. Det wan tomo, ra det ukatutur a balan a taro. Det kalabor ruk una rumu anun o Jeson, ma det sisio sur o Pol ma o Sailas sur det in ben pirso pas der torom a taro. 6 Ikut ka det sio pas der. Ra det dat pas o Jeson ma a ramano taro kai ra det tar tistisino una nurnur, torom a kum mugumugu tagun a tamon ra, ma det kukukuk lena, “A taro ri det pam purpuruon una kum tamon una rakrakon bual, ra uniri, det sa wanpat bulung nin nisan dat! 7 O Jeson i ben pas det utiro una nuna rumu. Det rop ri det lakai a kum warkurai anun a Sisa, a king anun a taro Rom, ra det watungi lena ara musano kai, a risano o Iesu, i a king.” 8 A taro ma a kum mugumugu det longoro a wasiso ri, ra det balano sungun. 9 Det ungongos o Jeson ma det kai ra di dat pas det tomo nami, sur det in kul pirso pas det. Numur det los pas a mani gusun det ra det palos ru det.

10 Una bung na mirum ut ra, det ra det tar tistisino una nurnur det tulu lakit ru o Pol ma o Sailas utong o Beria. Numur ra der sa wanpat tiro iai, der ruk una rumu na lotu anun a taro Juda. 11 Det ri det wakak tandet tong o Tesalonaika, uni det rakon a wasiso ri nama gasgas, ma det luk wakak a kum wasiso tagun a Buk Tabu una kum bungbung rop, sur det in tama a wasiso anun o Pol, ra i lingmulus o awu. 12 Ra a susut na taro Juda det nurnur, ma a susut na mugumugu na ino Grik, ma a susut na musano kai.

13 Ikut a taro Juda kurong o Tesalonaika det longoro i lena o Pol i warawai una wasiso anun o God tong o Beria, ra det wan utong ma det usungun balan a taro. 14 Uniutra det ra det tar tistisino una nurnur det tulu ru o Pol unago utasi. Ikut o Sailas der nam o Timoti der kis utmakai tong o Beria. 15 A taro ra det ben pas o Pol, det wan tomo nami utong o Atens. Numur i tulu melet det nama wasiso torom o Sailas ma o Timoti sur der in nan lakit toromi.

16 Ra o Pol i kis langlang utmakai sur o Sailas ma o Timoti tong o Atens, i tupunuk doko, uni i tama a tamon ra i bukus nama kum torotoro na god ra det ser lotu torom det. 17 I ruk una rumu na lotu anun a taro Juda, ra i wasiso tomo nama ramano taro Juda, ma a taro gisen kai ra det lotu torom o God. Ma una kum bungbung rop i wasiso kai tomo nam det ra i pastorom det una nubual na inawan tomo. 18 A kum tene mananos tagun a etowo anun a taro Epikurian ma a taro Stoik* A kum taro Atens det ser mur a susut na etowo anun a kum tene mananos tagun numugu. A taro tagun aru kabotaro Epikurian ma Stoik det mur aru ngas na etowo. A kum etowo kut anun a taro, ma ausur i elar nama Buk Tabu. det wasiso tomo nami. Ara taro det watungi lena, “Asau ri a tene wasiso oros ri i inanos dat nami?” Ma ara taro kai det watungi lena, “Kutiro, i inanos dat una kum matok na god tagun tu tamon gisen.” Det watungi lenri uni i warawai nama Wakak na Wasiso un o Iesu ma a nilaun melet gusun a minat.

19 Det ben pasi, ra det wan nami usapat una nubual na kiwung di watungi nam o Areopagus, ma det watungi lena, “Met nem na longoro anum a matok na etowo. 20 A utna ra u wasiso uni i senene doko torom met, ra met nemi sur met in mananos una kukuraino.” 21 Det watungi lenri, uni a kum te Atens ma a kum usiro kai ra det kis tiro iai, det ole a kum bungbung nama wasiso tomo una kum matok na etowo, ma a longlongoro suri.

22 O Pol i katutur epotor tandet una Areopagus ra i watungi lena, “Mot a taro Atens, una kum pinapam ra mot pami, a tama i lena mot a kum tene lotu mot. 23 Uni, ra a wan tuptupukus nin, a tama wakak a kum toktok ra mot lotlotu torom det, ma a sa tama tari kai ara kabulu ra di tuntun etabor uni, a tumtumus uni i lenri, ‘Torom a god ra ka di tasmani’. O naro ra mot lotu toromi, ikut ka mot tasmani, i kut ri, an warawai nami torom mot. 24 O God ut ra i pam a rakrakon bual ma a kum utna ra det kis uni, i a Labino anun a langit, ma a rakrakon bual, ma ke kis un tu rumu na lotu ra a taro det pami. 25 Ma ke sibo sur taio in waruti, uni i ut i tamtabor a taro rop nama nilaun, a wuwu na nilaun, ma a kum utna rop. 26 O God i ukis tar a mugano musano. Ra tagun a musano ra, a kum kabotaro rop det wanpat taguni ma det kis una rakrakon bual rop. Una nuknukino ut i nuki lena det in kis awai, ma nangisin det in nanpat ma nangisin det in rop melet. 27 O God i pam a kum utna ri sur a taro det in sisio suri, ma kutiro det in tamtama tuptupukus suri ma det in sio pasi. Ikut, o God ke kis bakbak gusun dat rop taktakai. 28 Elar nami ra di sa watung tari lena, ‘Dat laun, dat wan tuptupukus, ma dat utur ukai a nilaun, i kibino ut tan o God.’ Elar nama numot a kum tene pak kelekele ra det watungi lena, ‘Dat kai a kum nutnutunu ut.’

29 “Ra dat a kum nutnutun o God, ke wakak sur dat in nuki lena o God i elar nama toktok na gol, o a siliwa, o a wat, ra a taro det nuk pat pasi ma det pami nama lamandet. 30 Una kum kilalo numugu, o God ke nuknuk una kum petutna anun a taro ra ka det nuk pasi. Ikut uniri, i pitar a warkurai sur a taro rop una rakrakon bual det in nukpukus. 31 Uni i sa kubus tar a bung, sur in warkurai a rakrakon bual nama tokodos na warkurai. Ma i sa pilok tar a musano ra in pam a warkurai ra. I ukatutur melet pas a musano ra gusun a minat. Una nun a pinapam ra, i ulingmulus pas anun a pipilok torom a taro rop.”

32 Ra det longoro a wasiso una nilaun melet gusun a minat, ara taro tagun det, det urongon laulau uni, ikut ara taro kai det watungi lena, “Met nemi sur un wasiso melet torom met una utna ri.” 33 Ra o Pol i pirso pas gusun a kiwung. 34 Ma a ramano taro det nurnur, ra det mur o Pol, iri det: O Dionisius, i ara tagun a taro na kiwung Areopagus, ma ara ino, a risano o Damaris, ma a ramano taro kai.