1 Un nuk ukai a kum wasiso ri: Una kum tintinip na bung, a kum dekdek na mamaut in nanpat. 2 A taro det in nuk pas det ut, ma det in nemnem sur a mani, ma det in umuman labino, ma det in watung ulabo pas det ut, ma det in emang, ma det in pitarngat torom a kum tamtamandet ma a kum nanandet, ma ka det in lason sur det in watung wakak torom o God ma torom a taro kai, ma ka det in mur a nemnem anun o God. 3 Ma ka det in marmaris, ma ka det in nuk dumano a sakino anun ara, ma det in banlaulau a risan ara, ma ka det in warkurai wakak anundet a nilaun, ma det in waim ma det in banlaulau a taro, ma ka det in nem a wakak ino. 4 Det in usobor a kum paspasandet, det in pam a kum tuptup na petutna, det in ulabo pas det ut, det in nem doko a gasgas tagun a rakrakon bual, ma ka det in nem o God. 5 Det in mur a petutna anun o God una pinindet kut, ikut ka det in nem a dekdekino. Un nan gisen gusun a ngas na taro ra.

6 A kum ngas na musano lenra, det in ruk oros kut una kum rumu, ma det in ungongos oros pas a wardain sur det in mur det. A wardain ra, katu wakak na nuknukindet, ra det pot na marmaris una nundet a kum sakino petutna, ma anundet a kum sakino nemnem i ben raro det. 7 A wardain ri det ser los a etowo a bungbung rop, ikut ka det tasman lar pas a lingmulus ino.

8 A kum ngas na musano lenra, det turbat a lingmulus na etowo, elar nam o Janes ma o Jambres der turbat o Moses. A nuknukindet i laulau doko ma anundet a nurnur ausur i lingmulus. 9 Ikut anundet a pinapam ken lubung, uni anundet a tuptup na petutna in talapor umatan a taro rop, elar nami ra a taro numugu, det tama lele pas a tuptup na petutna anun o Janes ma o Jambres.

10 Ui Timoti, u sa tasman rop anung a kum etowo, a magirang, a kum utna ra a ngara suri, anung a nurnur, anung a kinkinis wowowon, anung a marmaris, anung a tuntunur dekdek una kum ngunungut, 11 anung a kum mamaut, ma a kum ngunungut a taramo i. U tasman rop a kum lamlabino ngunungut ra a taramo i tong una tulu tamon ri: o Antiok, Aikoniam ma o Listra. Ikut a Labino ut i ulaun pas iau gusun a kum utna ri. 12 Ma i lingmulus, det rop ra det laun una Karisito Iesu ma det nem na mur a nilaun elar nama nemnem anun o God, a taro det in banlaulau det ut. 13 A sakino taro ma a kum tene torotoro det in laulau, ma det in laulau sakit. Det in toro a taro, ma det in toro pas det utkai.

14 Ikut ui, Timoti, un tur dekdek una etowo ra di sa ususer tar ui uni, ma u sa nurnur dekdek uni, uni u tasman wakak anum a kum tene ususer, 15 ma u tasman a Buk Tabu turpasi ra u natlik utmakai. A Buk Tabu i utalapor a nuknukim, sur un nurnur una Karisito Iesu, ra o God in ulaun pas ui. 16 A kum du wasiso rop una Buk Tabu i kimkibino ut tan o God, ma i wakak sur in towo a taro, ma sur in upuaso a sakino anun taio toromi ut, ma in ukodos a kum niraro, ma in ususer a taro una tokodos na petutna. 17 A Buk Tabu i waninar a taro anun o God sur det in pam a kum ngas na wakak na pinapam rop.