1 A longoro i lena a pamuk na petutna kura i kis epotor torom mot. Ara tagun mot i pam a sakino tomo nam a ino anun o tamano. A taro ra ka det nurnur, ka det ser pam a sakino petutna lenra. 2 Ikut mot, mot ulabo pas mot uni! Ilai ra ka mot tangis na maimai uni? Ma ilai ra ka mot rakon ru a musano ra gusun mot? 3 A lingmulus, una pining a kis gisen gusun mot, ikut una niong a kis tomo ut nam mot. Ma a sa pitar tar a warkurai un o naro ra i pam tar a sakino petutna ra, elar nami ra a kis tomo ut nam mot. 4 Ra mot in nanpat tomo una risan anundat a Labino o Iesu, ma an kis tomo ut nam mot una niong, ma a dekdek ina Labino o Iesu kai in kis tomo nam mot, 5 mot in pitar tar a musano ra ulaman o Satan, sur din banlaulau a pinino, ma o God in ulaun pas a niono una bung ra a Labino in nanpat melet.

6 Ke wakak ra mot ulabo pas mot ut. Pepetlai, ka mot tasmani lena ra lakalik nat na is kut, in ulabo rop pas a palawa? 7 Mot in rakon ru a is ra i sa turai, sur mot in elar nama matok na palawa ra kalako is uni. A lingmulus ut, kalako is un mot. Uni di sa pitar tar o Karisito sur anundat a etabor torom o God, elar nama sipsip ra di etabor nami una labino bung na lotu na Wanlakai.* Ra a taro Juda det waninar sur a labino bung na lotu na Wanlakai, det rakon rop ru a is gusun a kum rumu anundet, ma una wonom mawit na bung det wan a beret ra kalako is uni. A tumtumus anun o Pol una petutna ra a taro Juda det ser muri, i a wasiso elelar sur a taro na lotu tiro Korin det in rakon rop ru a kum sakino petutna anundet. 8 I wakak sur anundat a nilaun in elar nama taro ra det pam a labino bung na lotu na Wanlakai. Gong dat pami nama is ra i sa turai. I ra a sakino petutna ma a dur na petutna. Dat in pami ut nama beret ra kalako is uni. I ra a tokodos na petutna ma i lingmulus.

9 Una ara pas munung ra a sa tumus tari torom mot, a sa inanos tar mot lena, gong mot lason tomo nama taro ra det pam a kum pamuk na petutna. 10 Ausur a kukuraino lena, gong mot lason tomo nama taro tagun a rakrakon bual, ra det ser pam a kum pamuk na petutna, o a kum muk, o a kum tene wolong, o det ra det ser lotu torom a kum torotoro na god, awu. Uni ka dat in nan gisen lar pas gusun det, uni dat lalaun tomo ut nin una rakrakon bual. 11 Ikut a tumtumus torom mot, sur gong mot lason tomo nam det ra det watungi lena det a kum tistisindat una nurnur, ikut det ser pam a kum sakino petutna lenri: Det ser pam a kum pamuk na petutna, det ser nemnem sur a kum utna ra det in tene gongon nami, det ser lotu torom a kum torotoro na god, det ser mang laulau a taro, det a kum tene ininum ma a kum tene wolong. Ma gong kai mot wangon tomo nam a ngas na taro lenra.

12-13 Sur asau ra an warkurai a taro, ra ausur det tagun dat a taro na lotu? O God ut in warkurai det. Ikut in wakak sur mot in warkurai det ut ra tagun dat a taro na lotu. Mot in pami elar nami ra di sa tumus tari una Buk Tabu lenri, “Mot in lakro ru a sakino musano gusun mot.” Lo 17:7