1 A kum tistising, ra a wanpat torom mot nama wasiso talapor un o God, ka wasiso nam a ngas na wasiso ra a uman labo pas iau nami, ma ka wasiso nam a ngas na wasiso ra a kum tene mananos det ser wasiso nami. 2 Ra a kis tomo nam mot, ka nem na nuknuk un tu utna gisen, awu. A nuknuking i kis kut un o Iesu Karisito ma una nun a minat un in nanai kutus. 3 Ra a wanpat torom mot, katu dekdeking, a ngara ma a neneder doko. 4 Ra a wasiso ma a warawai, ka wasiso nama wasiso na mananos anun a taro, ma ka wasiso nama ngas na wasiso ra in dat a nuknukin a taro, awu. A dekdekin a Tokodos na Nion i ulingmulus anung a wasiso, 5 sur anumot a nurnur un o Karisito ken kibino pas una mananos anun a taro, awu, una dekdekin o God ut.

6 Ikut, met wasiso na mananos ut epotor nisan a taro ra det tur dekdek una nurnur. A mananos ri, ausur taginin una rakrakon bual, ma ausur tan a kum mugumugu taginin upiso, ra anundet a warkurai in rop kut. 7 A mananos ri met wasiso nami, i a mananos anun o God, a wasiso na pidik, ra numugu i bakit utmakai. Una nun a mananos, i waninar tar a kisapi sur in pitar a minamar torom dat. I sa waninar tari numnumugu utmakai ra ke ukis utmakai a rakrakon bual. 8 Katu mugumugu taginin una rakrakon bual i tasman a mananos ri. Ra gunuk det sa tasman tari, ka det in sak wat a Labino tagun a minamar un in nanai kutus. 9 Ikut, i elar nam a wasiso ra di sa tumus tari una Buk Tabu lenri,

10 Ikut a Nion o God i upuaso a kum utna ri torom met. Uni a Tokodos na Nion i tasman a kum utna rop. Lingmulus, i tasmani ut a kum ninunuk na pidik anun o God. 11 Osi ra i tasman a nuknukin taio? A nion a musano sot kut, ra i kis uni, i tasmani. Lenkutkai ra, kataio i tasman a nuknukin o God. A Nion o God sot kut i tasmani. 12 Ma met, ka met utur ukai a nion taginin una rakrakon bual, awu. O God i tabor met nama Tokodos na Nion, sur met in tasman lele a kum etabor rop ra i tabor oros tar met kut nami. 13 Met wasiso una kum etabor ri, ikut ka met wasiso nama kum wasiso na mananos anun a taro, awu. Met wasiso nama kum wasiso ra a Tokodos na Nion ut i ususer met nami. Met watung palos a kum etowo na nion torom a taro ra a Tokodos na Nion i kis un det.

14 Ikut, osi ra a Tokodos na Nion ke kis uni, ken utur ukai a kum etowo, ra i wanpat gusun a Nion o God. Uni a kum etowo ra, a kum longlong na utna kut toromi. Ma ken tasman lele a kum etowo, uni a Tokodos na Nion ke kis uni sur in utalapori toromi. 15 Osi ra a Tokodos na Nion kura uni, in tasman lele a kum utna rop ra i wakak o ke wakak. Ikut, kataio in pet lar pasi sur in lar a musano ra Tokodos na Nion kura uni. 16 Elar nama Buk Tabu i watungi lena,