1 Senkeria kumateti dikeni mono eriza e'neria nersaro Fibina knare'za huntesazegu nehue. 2 Muse hutma Anumzamofo nagapina ragi me'nea vahekna huta Ramofompina nevareta, nazankuro atupama haniazana aza hihogu nehue. Hagi ana a'mo knare huno nagri'ene rama'a vahe'mokizmi tza nehia aki, knare huta aza hiho.

3 Krais Jisasimpima magokama eri'zama e'nerunamokiznia Prisirane Akuilakizania muse keni'a znasamiho. 4 Tamage nagrikura znasimu atresna'aza neha'e, nagrakera keke hunoznantoanki, ana miko megi'a mono naga'mo'za musenke hurantaze. 5 Anahukna huta nozni'afima atru nehaza mono nagara musenke huzamantoe. Esia kazigati, kotama Kraisinte agu'a rukrahe hu'nea roneniamofo, Epenetusi musenke huntoe. 6 Maria tamagriku huno hanavetino eri'zama eneria a'mofona musenke hugantene hutma asamiho. 7 Nagri'a nagapinti Antronikasi ene Juniake, nagrane magoka kina hu'namokizni musenke huznantene hiho. Aposol nagamo'za ke'za antahiza hu'naza netrene. Znagra kota Kraisintera znagu'a rukrehe hutakena, nagra henka nagu'a rukrehe hu'noe. 8 Ampliatusina, Ramofompi navesinentua ronenimofona musenke hunteho. 9 Magoka Kraisi eri'za e'neruna ne' Ubanusina musenke hunentena, knare roneni'a Stekisina musenke huntoe. 10 Kraisi eri'za tamage huno eneria ne' Apelesi musenke hunentena, Aristobulusi nompi nemniza nagara, musenkea huzmantoe. 11 Nagri nagapinti ne' Herotionina musenke hugantene hutma asamiho. Nasisusi nompi, Ramofonte mni'nazana nagakura musenke huramante huta zmasamiho. 12 Ramofonte eri'za hanavetike eneri'a atre Traifena ene Traifosakigiznia musenke huranantene huta znasamiho. Ramofonte tusi'za huno hanavetino eri'zama enerige'na navesinento'a a'mofo Pesisinena musenke hugante'ne huta zmasamiho. 13 Rufusina Ramo, Agri'a suzane huno huhamprinteno avrenemofone, agri nerera'a nagri'enena nenareraza hu'nea ara musenke hugantene huta asamiho. 14 Asinkritusima, Flegonima, Hemesima, Patrovasima, Hemasi'zanema nemaniza tafuhe'ine, tasarahehe'ina musenke huramantene huta zmasamiho. 15 Filogusima, Juriama, Nereusi ene nesaro a' ene, Olimpasi ene, ana miko Anumzamofonte mani'naza nagatega musenke huramantene hutma zmasamiho. 16 Maka Kraisi mono nagamo'za tmagri'tega musenke atrazageno vie. Fatgo huno ruotge hu'nea avu'ava hutma agi hene, agona ahene hutma maniho.

17 Nafu nagnahete, hankavetina ama kea neramasamue, Amu'notamifima atane'zama avrenente'za, koma rempi huramigeta antahi'naza ke'ma, havigeretima eme rempi huramiza tamentintima eri kragogo negiza vahekura, kva hunetma mani kore hutma ogantu'a maniho. 18 Na'ankure e'i ana vahe'mo'za Rantimofo Kraisi eri'zana e'norizanki, zamagra'a knare zankuke nentahize. Haga huno masave ke zmireti, fatgo zmavu'zmavama nehza nagara zamarevatga nehaze. 19 Kema amage nentaza tamavutmavamofo nanekea maka vahe'mo'za antahivgare'naze. Hianagi tmagrikura musezanimo'a avite'ne. Hianagi nagri'ma navenesiana, knare antahintahizanteti tamagra knare'ma hu'nesia avu'ava nehutma kefozana osiho. 20 Arimpa fru Anumzamo'a kofa huno Satana, kagafi azeri antefenka anteno rehapatigahie. Rantimofo Jisasi Kraisi asuntgizamo'a tamagra ne mesie.

21 Magoka eri'za eneru'a ne'mo Timoti musenke atreramante. Anahukna hu'za nagri nagamo'za, Lusiusima, Jesonima Sosipeta'zanena musenke hurmantaze.

22 Nagra Tertiusina, Poli ke nehigena ama avoma kre'noa ne'mo'na musenke Ra'mofompi hurmantoe.

23-24 Kaiusia noma'afi nagri ene mono kevu nagamota tavrentegeta muse huta amafi nemnuna ne'mo, tamagritega musenke atreramante. Erastusi'a rankumamofo zgore kegva hu'nea rankva ne'mo ene Kuatusi'a, mono nerafu, tmagritega musenke atrermantaze. [Rantimofo Jisas Kraisi asomumo maka tamagrane mesnie.]

25 Anumzamo'a tmagrira knare musenkema neramasamua kante tmazeri hankavetise. E'i Jisasi Kraisi knare musenkene, vahe'mota tmavresigu korapa oku'a retro hunte'nea naneke neramasamue. 26 Hianagi manivava Anumzamo huzamantege'za, kasnampa vahe'mo'za avontafepina krente'naze. Ama ana kemo'a megi'a vahete eama hige'za, maka kaziga vahe'mo'za negaze. Hu'negu zamagranena nege'za zamentinti nehu'za amage antesazegure. 27 Agrake, knare antahizane Anumzamo, Jisas Kraisimpi, ra agi'a erivava hugahie. Tamage.