1 Anantera kasefa monane, kasefa mopane ke'noe, na'ankure ese monane, ese mopamo'a fnane higeno, mago'enena hagerina omne'ne. 2 Anantera kogeno Ruotge hu'nea rankumara e'i kasefa Jerusalemo, Anumzamofontegati mona atreno eramino, a'mo'ma vema erinaku'ma retro'ma huno eaza huno e'ne. 3 Anantera antahugeno kini tratetira, ranke huno anage hu'ne, keho, Anumzamofo mono nomo'a vahe'ene nemaniankiza, Agra zamagrane nemanisigeno, Agri vea zmagra nemanisageno, Anumzamo Agra'a zamagri amu'nompina manigahie. 4 Ana nehuno maka zmavunura eri homu huzmante vgaresigeno, mago'ene fri'zana omnenkeno, zmasunku huza zavima atezana omnena, zmatama krizana omnenigeno, ese'ma me'nea zantamina omnegahie.

5 Ana higeno kini tratema mni'nemo'a anage hu'ne, Nagra maka'zana eri kasefa hu'na tro nehue. Nehuno anage mago'ane hu'ne, na'ankure ama kemo'a fatgo huno tamage hu'neanki, fore hugahianki avontafepi krento. 6 Anantera anage huno nasamine, maka zamo'a havgare, Nagrani'a (Alfa) ese agafahu mni'na, (Omega) vgarera mni'noe, ese agafahu ene vgare'enena mni'noankina, iza'o tinku'ma avesinimofona, mizama'a omne asimu eri tima nehanatifintira Nagra ami'nugeno negahie. 7 Iza'o ha'ma agateresimo'a ama anazantamina erisanti haresigena Nagra agri Anumza mni'nena, agra Nagri mofavre manigahie. 8 Hagi koro vahe'ene, zamentinti nosnaza vahe'ene, hi'manage zmavuzmavama nehaza vahe'ene, vahe zamahe nefriza vahe'ene, monko avu'avazamoma antahintahifima nentahiza, monkozama nehaza vahe'ene, avuatga ha' nehaza vahe'ene, havi anumzante mono hunentaza vahe'ene krunage nehaza vahe'mo'za, mizama erisazana, havere tevava nehia teve tirupi manigahaze. E'i nampa 2 fri'zane.

9 Anantera 7ni'a ankeropinti magomo Anumzamofo tusi'a rimpahe vgare knazana 7ni'a zuompafi avite'nea erineno anage huno nasamine, ege'na Sipisipi anentama erisia ara kaveri haneno huno hu'ne. 10 Ruotge Avamumo nagrite hanavetino egeno, ankero vahe'mo navreno tusi'a agonafi ome nante'ne. Jerusalea ruotge hu'nea mona kumamo Anumzamofontegati atreno erami'ne. 11 Anumzamofo tusi'a msamo ana kumara remsa higeno. konariri'amo'a, zgo'amo mrerisa havegna higeno, klasifi kenkro huno negea Jaspa havegna hu'ne. 12 Ana kumamofona tusi'a zaza kegina megeno, 12fu'a kafa megeno, ana kafantamintera magoke magoke ankero vahe'mo'za otitere hu'nazageno, 12fu'a Israeli naga'nofimofo zmagi'a ana kafantamintera krente'naze. 13 Ana kumamofona 3'a kafa, zge hanati kaziga megeno, zge fre kaziga 3'a kafa megeno, ruga raga asoparega 3'a kafa metere hu'ne. 14 Ana rankumamofo keginama hu'neana, 12fu'a havenu trara anteteno, ana haveramimofo agofetu regrino kegina hu'ne. Ana 12fu'a haveramintera, Sipisipi anentamofo 12fu'a aposol nagamokizmi zmagi metere hu'ne. 15 Ana ankeromoma nagranema keagama himo'a, kolire tro hunte'naza azota anteno ke'za (mesarim) erineno, ana rankuma ene, kafantamine ana keginane anteno kenaku eri'ne. 16 Ana rankumama troma hu'neana, ana miko asopa'amo'a magozahu higeno, zaza'amo ene atupa'amo'a magozahu huno ra higeno, ana rankumara kolirema troma hu'nea azotareti anteno (mesarim) huno kegeno, zaza'amo'a 2, 200 kilo mita higeno, mreri'amofo zaza'ane upa'ane, asopa'amo'a magozahu hu'ne. 17 Ana nehuno rankumamofo keginama anteno (mesarim) huno kegeno'a, tapa'amo'a 144 kiubits (66 mitagna) higeno, anama erineno anteno ke'nea azota vahe'mo'zama anteza negaza (mesarim) azotareti, ana ankeromo'a anteno ke'ne. 18 Ana keginama huneana, Jaspae nehia havereti tro nehuno, ana rankumara koliretike trora hu'negeno, kenkro hunoma negea klasigna hu'ne. 19 Ana rankumamofo kegina tra'ama avasesema hunteneana, mrerisa haveraminteti tro hu'ne. Nampa 1nia jaspe nehia havereti tra'a tro nehuno, nampa 2a safie nehia havereti tro nehuno, nampa 3a agetie nehie havereti tro nehuno, nampa 4a emelelie nehia havereti tro nehuno, 20 nampa 5fu'a sadoniksie nehia havereti tro nehuno, nampa 6si'a saldiusie nehaza havereti tro nehuno, nampa 7nia krisolaetie nehaza havereti tro nehuno, nampa 8tia berlelie nehaza havereti tro nehuno, nampa 9nia topasie nehaza havereti tro nehuno, nampa 10nia krisoprasie nehaza havereti tro nehuno, nampa 11nia jasintie nehaza havereti tro nehuno, nampa 12fu'a ametistie nehaza havereti tro hu'ne. 21 Hanki 12fu'a kafana perie nehaza zanteti mago mago kafana hagentetere hu'naze. Ana rankumamofo kana koliretike tro huntegeno, msa huno kenkro hu klasigna hu'ne. 22 Ana rankumapina mago ra mono nona nagra onketfa hu'noe. Na'ankure Hanavenentake Ra Anumzamo'ene, Sipisipi anentamo'ene znagrake ana rankumofo mono nona mni'na'e. 23 Hanki ana rankumamofona zgemo ene ikamo'enena remsa huontene. Na'ankure Anumzamofo msamo remsa nehigeno, Sipisipi anentamo'a ana kumamofo lamu tavikna huno remsa hu'ne. 24 Maka kumate vahe'mo'za ana msare vano nehanageno, mopafi kini vahe'mo'za, ra zamagima e'neriza fenoza zmia eri'za ana kumapi ufregahaze. 25 Ana kumapina hanina onkina msa zamoke mevava hina, kafantamina eriogiza anagintesageno mevava hugahie. 26 Ana hanageno maka kumapi vahe'mo'za, ra zmagima nezamiza zane feno zazmia eriza ana kumapina ufregahaze. 27 Hagi pehena zane, havi anumzante mono hunente'za, havigema nehaza vahe'mo'za, ana kumapina uofretfa hugahaze. Hianagi Sipisipi anentamofo asimu eri avontafe'afima, zmagima me'nenimo'zage ana kumapina ufregahaze.