1 Anumzamo'a eri'za vahe'araminte kofta huno fore'ma haniazana, oku'a me'nea ke Jisasi'a ankero ne'a amino huntegeno, eriza ne'are Joninte emeri ama hu'ne. 2 Joni'a Anumzamofo kea huama nehuno, Jisasi agenkene makazama ke'nea zamofo kea huama hu'ne. 3 Ama kasnampa kema hamprinaza vahe'ene, antahi'naza vahe'ene, ana kema amage'ma antenaza vahe'mo'za asomu erigahaze. Na'ankure anazama fore'ma hania knamo'a, hago kofta nehie.

4 Nagra Joni'na, ama naneke Esia kaziga 7ni'a mono nonte nagamotarega kreneramue. Hagi korapa mni'neno, menima mni'neankino, henkama mani'nia Anumzamo, Agra'a asuragizane, rimpa fruzana tamina, fru hutma manigahaze. 7ni'a Avamutamima Anumzamofo kini tramofo avugama nemanizamo'za, zamagranena zmasu ragiramante'za, tmazeri fru hanigeta, fru hutma nemnisageno, 5 Jisas Kraisi fatgo huno, Anumzamofo ke'a huama nehimo, Agra'a fri'naza vahepintira ugagota huno ese oti'nemo, maka mopafi vahe'mokizmi kini vahe kegva huzmante'nea ne'manin'eankino, Agra kumitifima mani'nonkeno, avesiranteno korama'areti mizaseno katufe tantenegu agi'a erisaga hanune. 6 Agra'a vahe tazeri retro huneranteno, Anumzamofo eriza erisuna prisi vahe tavareno retro hurante'neankino, Agrake'za maka kna ra agi'a e'nerino hanavea erino, manivava hugahie. Tamage. 7  Keho, Agra hampompi ne-eankino, (Dan 7:13) maka vahe'mo'za negesageno, keka zafare'ma krugruma renaza vahe'mo'zanena negesageno, maka ama mopafi vahe'mo'za zavi krafa hugahaze. Hanki e'ina hu'zana fore hugahie. Tamage. 8  Nagrani'a ese agafahu manina (Alfa), vgare mni'noe (Omega). Korapa mni'nena, menina mni'noankina, henka egahue huno hanavenentake Ra Anumzamo'a hu'ne.

9 Nagra Joni'na neramafu'na Anumzamofo kumaku'ma knama enerita Jisasinte'ma kazigazi huta magoka nevumo'na, navre'za ti amunompi Patmosie nehaza mopa, me'nere ome nante'naze. Na'ankure Anumzamofo kereku'ene, Jisasi agenkema huama'ma nehua zanku anara hu'naze. 10 Hanki Ramofo knazupa, nagra avamupi mni'nena nentahugeno, namefigatira mago agerumo'a ra ufereaza huno anage hu'ne, 11  Amama kana zantamina avontafe krenka, 7ni'a kumate me'nea mono nontaminte atregeno vino. Efesasima, Smenama, Pegamamima, Taitariama, Sadisima, Fildafiama, Ledosiama hunka krezamio.

12 Anagema huno hige'na, rukrehe hu'na ke'ma hia vahe ke'nakuma huana, 7ni'a tavi rekru hunte'naza azota kolire tro hunte'nea me'negena ke'noe. 13 Ana lamu tavimofo amu'nompina, Vahe'mofo Mofavregna ne'mo, efeke zaza kukena antaninegeno agia ruhananegeno, kolire tro hunte'naza nofinu afupinti rutahera higeno, asoparega kreramino vu'nege'na ke'noe. 14 Hagi Agri asenimo'ene azokamo'a efenentake huno efeke hampokna higeno, avurgamo'a teve anefakna hu'negena ke'noe. 15 Ana Ne'mofo agamo'a brasima tevefima krefizo hazageno, masanentake nehiankna nehigeno, agerumo'a rama'a timofo agasasa kemo'ma hiaza hu'ne. 16 Ana ne'mo'a azantmaga 7ni'a hanafi azerinegeno, tare kaziga asane kazimo agipintira atiramino egeno, Agri avugosamo'a zgemo remsa hiankna huno hanavenentake huno remsa hu'ne.

17 Nagrama ana ne'ma nege'na, agafi traka hu'na fri vahekna hugeno, tamaga azanu nagofetu nenteno anage hu'ne, Korera kagra osuo, Nagrani'a ese agafahu mani'na, vgarera mani'noe. 18  Kasefa hu'na mni'nomona ko frite'na, oti'na mani'noanki, keho, henka'a ofri'na manivava hugahue. Fri'zane, fri vahe'mofo kumate ki nofira Nagra azeri'noe. 19  E'ina hu'negu makazama menima kana zane, menima me'neazane, henkama fore'ma haniazanena avontafepi krento. 20  Kagrama 7ni'a hanafi'ma tamaga nazampima me'negenka negenka, kolire tavima rekru hunte azotama ke'nanana oku'a agu'agesamo'a amanahu hu'ne, 7ni'a ofuna, 7ni'a mono kumate ankero vahetami ke'nane, tavi'ma rekru hunte azotama, kolire tro huntenegenka 7ni'a ke'nanana, 7ni'a mono kuma me'negenka ke'nane huno nasamine.