1 Hagi Farisi mono vahe'mo'zane kasere ugagota hu'naza vahe'mo'za Jerusale kumateti' e'za, Jisasinte emeri atru nehu'za, 2 Jisasi amage'ma nentaza Disaipol naga'mo'za zmazana sese osu'za bretia nenage'za ke'naze. 3 Na'ankure Farisi vahe'ene, mika Jiu vahe'mo'za, zmagehe'mofo zamavu zmavama avaririza, zamazana sese huso'e osune'za ne'zana nonaze. 4 Maketi kumapinti ne-e'za, zamagra ne'zana onene'za zmazana sese hute'zage ne'zana nenaze. Hagi zamagra rama'a zmagehemofo kasegea eri'naze, kapuma kavoma tinkavoma nezama anteno ne' zamtamima sesehu agruma hute'za, ne'zama ne'zana azenerize. 5 Hagi Farisi vahe'mo'zane, kasere ugagota hu'naza vahe'mo'za Jisasi antahige'za, nahige'za kamagema nentaza disaipol vahekamo'za tagehe'i avu'avamofo kea amage onte'za, ne'zama nenakura zmazana sese nosaze? 6 Jisasi'a anage huno zamasmi'ne, Aisaia'a fatgo huno krunage vahere huno krenteneana, tmagriku hu'ne, Ama vahe' mo'za zamagiteti nagi hentesga nehaze, hianagi zmagu'amo'a nagritera omaneno, afete'are me'ne. 7  Amegati nezama'a omane mono hunenante'za, vahe'mofo kasege rempi nehaze. (Aisa 29:13)

8  Anumzamo'ma hiho hu'nea kasegea netretma, vahe'mofo zmuzma'mofo ke azeri hanavetita amage nentaze. 9 Anage huno mago'ane zmasami'ne, Anumzamofo kasegema eritre kaziga knare hu'naze. Hanki tamagehe'i avu'ava'mofo amagera nentaze. 10  Na'ankure Mosesi'a anage hu'ne, Negafane negreranena antahiminka agoraga'a manio, hagi iza'o nefama nererama agoraga'a omanino, huhaviza huntesimofona, ahe friho hu'ne hutma nehaze. 11  Hianagi tamagra anage nehaze, aza'o nefama nerera asamino, nagrama tanaza hu'zama ante'noana, Anumzamofo ami'naku ante'noe huta nehaze. 12  Ana nehutma, ana ne'mofona atrageno nefane nereranena mago'zana aza nosie. 13  Tamagri tami tmavu tmava'za rempima huzamiza'zamo Anumzamofo ke'mofo hanavea eri netreta, rama'a ama anahu'zana nehaze.

14 Maka veaku Jisasi'a ke hige'za ageno anage huno zamasmi'ne, tamagra nanekeni'a nentahita antahi ama hiho. 15  Magore huno fegiatima vahemofo agu'afima ufresiazamo'a, azeri pehena osugahie. Hianagi vahe'mofo agu'afinti atiramino esiazamo, azeri pehena hugahie. 16  [Kagesa antahinamoka antahio.] 17 Anage huteno, ana vahe zamatreno Jisasi'a nompi mrenerige'za, amage'ma nentaza disaipol naga'mo'za, ana fronka ke'mofo agafa'agu antahige'naze. 18 Jisasi'a anage huno zmasami'ne, tamagrira knare antahizana omane'nefi? Tamagra antahi amara nosazo, nankanzamo'ma fegiatima vahe'mofo agu'afinka ufrezamo'a, vahe'mofona zmazeri pehena nosie. 19  Na'ankure anazamo'a tumopina novie. Hanki rimpafi uramiteno, anantetira rifa kerifi nevie. (Jisasima anagema hu'nea kemo'a, mafka ne'zamo'a agru hu'ne.) 20 Jisasi'a anage huno zmasamine, vahe'mofo zmaguafinti atiramiazamo, zmazeri pehena nehie. 21  Vahe'mofo agu'afintima efore'ma nehiana, havi agu'agesa antahizane, monko avu'ava'zane, kumzafa se'zane, vahe ahe frizana ne-e, 22  arave hu'nea a'ene vene monko avu'ava hu'zane, agraguke antahizane, havi avu'ava'ene, vahe'mofo krunage hunte'zane, vahe'mofo kumipi avrente avu'avazane, vahe'mofo zanku kenunu hu'zama, knare vahe'mofo havige hunte'zane, neginagi avu'ava hu'zane, avufga eriantesga hu'zane, 23  ana mafkazana vahe'mofo agu'afinti atiramiazamo vahera azeri pehena nehie.

24 Jisasi'a otino ana mopa atreno Taia kuma kaziga vu'ne. Vuno mago nompi ufreno, vahe'mo'za emenine huza ontahisaze nehuno umanine, hianagi frakigara osu'ne. 25 Ana hianagi mago mofara havi avamumo agu'afi fre'nea mofa'mofo nerera'a Jisasi'ma emani'nea ke nentahino, ame huno eno agafi eme prihuno, 26 ana ara Sairofonesia kuma Griki megi'a vahepinti a'kino, Jisasinku muse hugantoanki havi avamura ome hunto huno asami'ne. 27 Jisasi'a anage huno ana aku hu'ne, mofavremofo bretima erita kramofo amizamo'a knarera osu'neanki, atregeno mofavremo kotazana nemu huteno. 28 Ana a'mo'a anage hu'ne, Ramoka tamage hananagi, itaretima mofavre'mo'za nenazageno, ankrama hermiama'a kramo'za zogi'za ne'naze. 29 Anante Jisasi'a anage hu'ne, e'inahu kenona hanku vuo, havi avamumo'a mofaka'amofo agu'afinti hago atiramino vu'ne. 30 Higeno noma'arega vuno ome keana, mofa'amofona havi avamumo ko atreno vigeno, sipare mase'negeno ome ke'ne.

31 Anante Jisasi'a Taia kumara atreno, Saido kumapinti rugitagino Dekapolisi kaziga, Galili tirutega uhanatige'za, 32 mago agesa ankani neregeno kea nosia ne' avare'za e'za, Jisasinku muse hugantonanki kazana agofetu anto hu'naze. 33 Jisasi'a veara nezmatreno ana ne' avareno znagrake umanine'ne, agesa gampi azana nevazino, avetu aheno azankonu aganefunare avako nehuno, 34 kesga huno monafi negeno ra asimu nenteno, Efata huno hu'ne, (ana kemofo agafa'a ruhagro huo hu'ne.) 35 Ame huno ana ne'mofo agesamo'a ru hagro higeno, agefunamo'a oza higeno, knare huno kea hu'ne. 36 Jisasi'a amazama huazana vahera ozmasmiho huno nezmasamiana netre'za, ete mago'ane vahera huama hu'za zmasaminaze. 37 Hagi tusi zamagogo fege'za, Agra mika' zana knare'za nehie hu'za nehu'za, zamagesa anknire'naza vahe erinkro huzmantege'za, knare hu'za kea nentahize. Hagi zamagnefu'na kna hu'nea vahe zamazeri so'e hige'za knare hu'za kea nehze hu'za hu'naze.