1 Anama nehazage'za mika veamo'za emeritru nehazageno, rama'a tauseni'a vahe'mo'za titipa hu'za zamagiareti orentrako arentrako hu'naze. Pusantera Jisasi'a rukrehe huno, amage' nentaza disaipol naga'a zamavumro ante'ne, Farisi vahe zamuzmakura havige vaheki kva hiho. 2  Ana hanigeno mago'zamo'a refi'otegahie. Hakare'za oku'a me'nesnia zana, henka'a amate fore hugahie. Hakare zama refitenesnia'zamo'a, amate hanige'za kegahaze. 3  Ina kna kema hanimpima hu'nesana kemo'a, masare eama hanigeza vahe'mo'za antahigahaze. Hagi sumikema oku'a hunaraginte'pinkama hu'nesanana, anagamu nomumpare marerino huama hanige'za antahigahaze.

4  Rone'nimotma, Nagra neramasamue, avufga'ma ahe fri'simofonkura korera osiho. Anama hutesu'za henka'a, mago enena zamagra anara huoramantegahaze. 5  Hu'neanagi Nagra kore kea huneramantoe, anahukna huno tamaheno teve kampi kresimofo korera huntegahaze. Tamagri'ma tamahe frino hanave'areti tevefima tamasga hu'tresimofo korora hunteho. Nagra neramasamue, Agri korera hunteho! 6  5fu'a kisave nama tare kasage zagore netrazanki, Anumzamo'a ana namazgagura agera nokanie. 7  Hagi tamagerafa nehue, tamasenirema me'nea tamazokara maka ko'hampari'ne. Korera osiho! Tamagara rama'a kisave namazga agateretma ra'za mani'naze.

8  Nagra neramasamue, iza'o Nagri nagi nagenkema vahe'mokizmi zmavurema huama hanimofona, Vahe'mofo Mofavremo'a, Anumzamofo ankeromo'kizimi zamurera agi'a huama hugahie. 9  Hu'neanagi mago'mo'ma Nagriku'ma onke'noe huno vahe zamufi hufrakisi'mofona, Anumzamofo ankeromokizmi zamavurera Nagranena, zamagrira ozmagenoe hunahu frakizmantegahue. 10  Hagi iza'o Vahe'mofo Mofavre mago kema huhaviza huntesimofona, kumi'a eri atrentegahie. Ana hugahianagi iza'o Ruotage Avamumofo huhaviza huntesimofona, kumi'a atreontegahie.

11  Hu'neanagi, osi mono nonte kva vahete'ene, ruga'a kva vahetema tamavre'za vnageta, nanege hugahune hutma tamagesa ontahiho. 12  Na'ankure Ruotage Avamumo kema huku'ma hanaza kea rempi huramisigetma ana knafina hugahaze.

13 Tusi'a veapinti magomo'a amanage huno Jisasinku hu'ne, Rempi hurami nemoke, nenfuna asamigeno nerfama erisanti haregaha'e huno anterante'nea zampintira, refako hunamino. 14 Jisasi'a ana kenona huno, kagri'ene negafu amu'nompina, iza kva mani'nenka kezani'a nentahinka refko huzananto huno hunante'ne? 15 Anante amanage huno zamasmi'ne, Kva hiho! Maka'a ruzahu ruzahu agraguke antahizamofona ha' renenteta, kva huta maniho, vahe'mofo mni'zana fenoma erizampina omnene. 16 Nehuno fronka ke zamasmino anage hu'ne, Mago afufenone ne'mofo hozamo'a, so'eza huno hakare'a rga rentene. 17  Ana nemo'a anage huno agesa antahine, nezani'a erintesua nona omneanki nagra nankna hugahue? 18  Nagra nezama erinte nona tagna vazina erira huna kitena, anampi maka nezane, mago'a zani'a erintegahue huno antahine. 19  Anantera nagrani'agura anage hugahue, nagra rama'a kafufima nazama hania zantamina eritru huankina mni fru hu'nena tine nezane nenena musenkase hugahue hu'ne. 20  Hianagi ana ne'ku Anumzamo'a anage hu'ne, kagra neginagi vahe maninane! Meni kenageke frigahananki, maka'za eri atru hu'nanazana iza erigahie hu'ne? 21  E'inahu'za zamagra'aguke nentahiza mopafi fenozmima eritru hanaza vahe'mokizmia fore huzamigahie. Hianagi Anumzamofontera e'inahu vahe'mokizmia fenozazmi omnene vahe mani'naze hugahie.

22 E'i ana agafare Jisasi'a amanage huno amagema nentaza disaipol nagara zamasmi'ne. Tamagra tmavufagura antahintahi hakare osiho. Nane'za neneta manigahune, nankukena antanita tavufa refitegahune. 23  Na'ankure tasimuma erita manizamo'a nezana ageteregeno, tavufamo'a kukenama hu'zana agaterene. 24  Namamofo keho, Zamagra hoza kriza nezana nogafize. Nezama erinte'za nesaza nona omne'neanagi, Anumzamo nezana nezamie. Kagra namamofona agaterenka raza vahera mani'nane. 25  Mago'mo tamagripintira antahintahi hakarema haniazamo'a, asimu'a osi'a erizaza hugahio? 26  Tamagrama ama osizama osanutma, na'a higeta mago'a zankura antahintahi hakare nehaze? 27  Inozamo'ma hageno amosrema neheaza keho. Zamagra mragu'za atiza kukena hatiza nontanize. Hianagi Nagra neramasamue, kini ne' Solomonima avasese ane kukena hu'neanagi, ama inazamofo mosaremo agetereno knarezantfa hu'ne. 28  Hianagi Anumzamo'a meni mesigeno okima eriza tevefima kresnaza inozana e'inahukna huno kukena hunezmanteanki, Osi tamentintine vahera! Anumzamo'a agetereno vahe'mota kukena huormantegosio? 29  Naneza neneta, nati negahune hanaza zamo'a antahintahi hakare oramino. 30  Na'ankure zamentinti osu vahe'mo'za anazankura tusi'za hu'za nehakaze. Hianagi tmagri, Neramafa'a atupama hanaza'zana ko antahino keno hu'ne. 31  Hu'neanagi kotazana, Anumzamofo kumaku haketenkeno, ana miko atupama hanaza zana tamigahie.

32  Onensa sipisipi afu kevumota korora osiho. Na'ankure tamagri Nafatmimo'a, mona kuma'a muse huno tamiku hu'ne. 33  Afufeno tamia zgore atretma, zgo erita amunte omne vahe nezminkeno monafi fenozantamimo'a meno, anazamo'a monafina havizana osuno, kumzafa noseno, havi kfamo'za eri haviza osu kumapi antegahaze. 34  Na'ankure feno zanka'ama menenirega, anantegage kagu'a antegahane.

35  Kukena tamia huta, tro huta mani'neta, tavi tamia rekru hutma maniho. 36  Kva'zmimo arave hu nezantegati esigu kva huza manine'za, kafante eme vagre vagre nehigeza, ame hu'za anagi nentazakna huta kva huta maniho. 37  Kazokzo eriza vahe'mo'za, kva zmimoma esigu kva hu'za mni'nesaza vahe'mo'za muse hugahaze. Tmage hu'na neramasamue, Agra'a ana kva nemo amu'nofi nehuno, kukena'a eri atupa huteno, eri'za vahe'a hanige'za zmaza tununte mni kaginesageno, kavera agra eme zamigahie. 38  Kenege esio, kotu avame esio, zamunte'za kva hu'za maninesageno, eme zmagesia kazokzo eriza vahe'mo'za, muse hugahaze. 39  Hu'neanagi ama'nakea antahiho, mago nomofo nefama e'i knazupa kumzafa vahe'mo'za noni'a tagna vazigahaze huno antahinesuno'a, kvagrino mani'neno zmatresige'za noma'a tagna vaziza uofregahaze. 40  Tamagranena tamavu anteta kva huta maniho. Vahe'mofo Mofavremo'a, omegahie huta hanaza knafi, egahianki kva hutma maniho.

41 Pita'a anage huno antahige'ne, Ramoka ama fronka kea tagrikuke nehampi, maka vaheku'ene nehane? 42 Anante Ramo huno, knare antahizanteti eri'zama'a erifatgo nehania ne'mofo kva'amo'a, huntenkeno mago'a eri'za vahe'a kva krinezmanteno, nezama nesaza zana kna fatgore refko huzamisia vahera iza'e? 43  Ana kazokzo eriza ne'mo'ma eri'zama enerino mani'nenigeno, kva'amo'ma eme kenimo'a, asomu erigahie. 44  Tamage hu'na neramasmue. Ana nera kva'amo'a huhamprintenkeno, maka zama'a kegva hugahie. 45  Hianagi ana kazokzo eri'za ne'mo agu'afi huno, kvanimo'a zaza kna maniteno egahie nehuno, agafa huno eri'zama eneriza kazokzo eri'za vene'nene, a'enene nezmaheno, nezana neneno, aka ti neno neginagi nehuno, 46  kva'amo egahie huno antahiominesia knarema esuno'a, eme aheno rutaneteno, zamentinti osu vahe'mo'za manisaza kumapi antegahie. 47  Hanki ina kazokzo eriza ne'mo'ma, kva'amofo avesizama keno antahino hu'neno, ana avesimofonte kva osuno, amagema ontesimofona rama'a zampi azeri haviza hugahie. 48  Hianagi iza'o antahino keno osu'neno, knaza erigaza hu'nesimo'a, osia knokeve erigahie. Maka vahe'ma rama'ama zminemofompintira, mago'ane rama'a ante agofetu hu'za amisazegu hugahie. Hagi izano antahimino rama'a ami'nenimofompintira, mago'ane rama'a erinaku agesa antahigahie.

49  Nagra ama mopa teve taginteku e'noe. Nagri'ma navesiana tevea rukru hanie! 50  Hianagi tusi'a knazamo navega ante'neankina ti freankna hu'na, ana kanazampina ufretena atiramisugeno, ana knazupa vgaregahie! 51  Tamagrama tamegsama antahizana, ama mopafina rimpa fru'za erina enofi? A'o, amu'notamifina atane'za eri'na e'noe. 52  Meninena mago nompi 5fu'a naga mani'nenamo'za amuno zmifina atane'za fore hanigeno, tagufamo'za refko hu'za taremokiznia ha' reznentena, taremokea tagufamokizmia ha' rezmantegaha'e. 53  Famo tremokea refko huke, nefa'a nemofo ha' rentena, nemofo'a nefa ha' rentegahie. Anazanke huno nerera'a refko huno mofa'amofo ha' rente'na, mofa'amo'a nererana ha rentegahie. Mago a'mo'a nenoferona ha' rentesigeno, nenofero'a, vemofo nererana ha' rentegahie.

54 Hagi Jisasi'a anage huteno, tusi'a veara anage huno zmasami'ne, kazageno hampomo zge ufretegama reraga higeta, ame huta ko arugahie nehazageno, kora nerie. 55  Hanki mago kaziga asoparegati (sauti) zahoma erigeta, zge ha hugahie nehazageno, ana nehie. 56  Tamagra tavre vahere! Tamagra mopafine monafinema fore hiazana refko hutma negaze. Hianagi menima ama knafima fore'ma hiazana na'a higetma refko hutma nonkaze?

57  Hagi nahigetma tamagra'a refko hutma fatgoma hu'neazana nonkaze? 58  Na'ankure magomo naneke huganteku kavreno kanisol vahete nevanigenka, karankama nevanuta, ko keaga hunka agranena erifatgo huo. Anama osnanana ana ne'mo kavreno ke refkohu nete vanigeno, kavreno kina nonte kva nete kantena, kina hugantegahie. 59  Nagra anage hu'na neramasamue, ana kina nompi mani'neta, zgoma miza segahaze huno hurmantenesiama'a miza sevgareteta atiramigahaze.