1 Jisasi'a Jodani timpi mono ti fretegeno, Ruotage Avamumo agu'afi efre viteno avareno ka'ma kopi vu'ne. 2 40ti'a zgeferupi Satana mago agi'a hankromofo kvamo, ne'za a'o huno mni'nea kna'afi Jisasina revatga hu'ne. Anama nehigeno Jisasi'a agaku hu'ne. 3 Sata'a amanage huno Jisasinku hu'ne, Kagrama Anumzamofo mofavre mani'nesnunka ama havegura breti fore huo hunka hugeno breti fore hino. 4 Jisasi'a ana kemofo nona'a amanage hu'ne, avontafepi anage huno krentene. Vahe'mo'za breti nesafintikera zmasimura e'origahaze huno krente'ne. (Diu-Kas 8:3) 5 Sata'a Jisasina avareno zaza agonare marerino, maka ama mopafima me'nea ranra kumatamina ame huno averi'ne. 6 Ana huteno Sata'a amanage huno asami'ne, maka'zana nagrike kvafi me'neakina, ama ana makazana kamigahue. Na'ankure ama ana mikazana, izano aminaku'ma hanumofona amane amigahue. 7 E'ina hunegu Kagrama krenarenka mono hunantesankena, ama ana makazana kaminugeno kagriza segahie huno higeno, Jisasi'a ananke nona'a anage huno hu'ne, 8  avontafepi anage huno kre'ne, Kagra ranka'a anumzamofo monora hunentenka, agri eri'zanke erigahane huno krente'ne. (Diu-Kas 6:13)

9 Anante Sata'a Jisasina avareno Jerusale kumate vuno, ra mono nomofo amumpare ome nenteno, amanage huno asami'ne, Kagra Anumzamofo mofavre mani'nenunka fenamufi takauro, 10 na'ankure avontafepi anage huno krente'ne, Anumzamo'a ankero vahe'a huzmantenke'za kva hugantesageno, 11  Havemo kagia taga hu'zanku zamazampi kavresga hanageno, kagia taga osugahie huno krente'ne, (Sam-Zga 91:11-12) 12 Jisasi ana kemofo nona'a anage huno asami'ne, avontafepi anage huno krente'ne, Ranka'a anumzamofona rehenka onko huno hu'ne. (Diu-Kas 6:16)

13 Sata'ma mika revatga huvagareteno, henka'a kankamuma fore hanigeno revatga hanigu atreno vu'ne.

14 Jisasi'a ete Galili mopare Avamumofo hihamufi vigeno, agenke'amo ana mopafina vuno eno hu'ne. 15 Ana nehuno Jisasi'a, agafa huno osi mono no zimifi mono kea nehige'za, agi erisga hu'naze.

16 Hagi Jisasi'a nenama hu'nea kumate Nazarete eno, nehiaza huno mni fruhu knazupa (sabat) osi mono nompi marerino avontafe hamprinaku o'netige'za, 17 Kasnampa ne' Aisaia avontafe eri'za eme nemigeno, eri vakanereno, hakreno amanage huno kre'nea ke hampri'ne, 18  Ramofo avamumo nagrane emanine. Na'ankure agra huhampri nanteno, zamunte omane vahepi knare musenkea huama huo huno hunante'ne. Agra hunanteno huama hugeno, kinafi maninesaza vahemo'za katufe'za nevnageno, zamu suhu vahemo'za negesageno, vahemo'za zmazeri haviza nehanaza nagamoza fru hu'za nemnisagena, 19  Ramo tamaza huno tmazeri so'ema hiazankura huama hu'na tmasaminaku e'noe. (Aisa 61:1-2)

20 Anage huno hampriteno, ana avontafe regazarino, avontafemofo kva ne' nemino manige'za, ana osi mono nompi mani'namo'za zamua Agri kete'za mani'naze. 21 Ana huteno agafa huno zamasmi'ne, Amama hamprugetma antahiza kemofo avufa'a meni fore nehie. 22 Hagi maka vahe'mo'za knare kema hia kegura antri nehu'za, mago'ene ontahige antahige nehu'za, ama Josefe mofavre omaninefi? hu'za nehazageno, 23 Jisasi'a anage huno zmasami'ne, tamage hutma huvame kea hunantegahaze. Tusa ne'moka kagra kavufa kazeri knare huo! nehuno anage hu'ne, Kapeniam kumate kaguvazama erifore hu'nanketa antahi'nonanki, e'i anazana kumaka'are huo hutma hugahaze. 24  Tamage hu'na neramasamue. Magore huno kasnampa vahe'mofona kuma'afinti vahe'mo'za ke'a antahi omigahaze. 25  Hianagi tamage hu'na neramasamue, Israeli vahepina rama'a kento'ane Ilaija knafina mani'nageno, monafinti 3'a kafugi 6si'a ikana kora origeno, tusi aga ateza maka mopafina fore hu'ne. 26  Ana hu'neanagi Ilaijana huntegeno Israeli mni'naza kento a'nerera ovu'neanki, rurega kento ate huntegeno Sarafat kumate Saidoni mopare vu'ne. (Jem 5:17-18, 1 Kin 17:1-16)

27  Hanki Israeli mopafina, rama'a fugo namuma zmare'nea vahera kasnampa ne' Elisa knafina mani'nazanagi, mago'mofone huno ana vahepina fugo namumo'a vgareonte'neanki, Siria ne' Nemaninke ana fugo namumo'a vgarentene. (2 Kin 5:1-14)

28 Anage hige'za, osi mono nompi mani'naza maka vahe'mo'za nentahiza tusiza hu'za zmarimpa ahente'naze. 29 Zamagra oti'za Jisasina ra kumateti retufe'za, kuma zmimofo zava ankinare aretufe atrenaku vu'naze. 30 Hianagi Jisasi'a amu'no zimifinti nezamatreno vu'ne.

31 Ana huteno Kapaniamu rankumate Galili kaziga uramino umani'neno, mni fruhu knarera (sabat) mono kea rempi huzami'ne. 32 Zamagra rempima huzamia kegu zmagogogu hu'naze. Na'ankure hanave'a me'nea vahe'mo'ma nehiaza huno rempi huzamine. 33 Hanki osi mono nompina agru osu havi avamumo agu'a fre'nea vahemo mani'neno, ranke huno kezati'ne. 34 Ee! Tatregeta mani'maneno Nazareti Jisasiga, Kagra tazeri haviza hu'naku ne-eampi? Tagra antahi'none, Kagra izage, Kagra Anumzamofona Ruotge hu'namoke! 35 Hianagi Jisasi'a kesuno kea osu atrenka atiramio! Higeno havi avamumo ana nera amuno zimifi rutraka hunetreno, azeri haviza osu atiramino vu'ne. 36 Ana nehige'za mafka vahe'mo'za antri nehu'za zamagogogu nehu'za ke ohumi ahumi hu'za anage hu'naze. Nankna hihamu'ane ke ama ne'mo'a nehie? Na'ankure agi me'nea vahe'mo nehiaza huno tusi'a hihamu hanave'areti, agru osu havi avamura huntegeno ke'a antahino atineramie! 37 Ana higeno Jisasi agenke'amo ana mopa kagiafina vuno eno huvgare'ne.

38 Jisasi ana osi mono nompinti atiramino Saimon nompi ufre'ne. Saimoni nenemo avufga teve ha kri erino mase'nege'za, aza haniegu Jisasi asami'naze. 39 Jisasi'a ana a'te vuno, teveha kri huntegeno fanane higeno, ame huno ana a'mo'a otino ne'za kre'zmante'ne.

40 Zage uramino kinaga sege'za, ruzahu ruzahu kri eri'za mase'naza vahe'mokizmi, naga'zmimo'za zamavre'za Jisasinte e'naze. Ageno magoke magoke'mofona azanu zamako hutere nehigeno, ana krizmimo atre zamante'ne. 41 Ana hukna huno rama'a vahepinti, havi avamutamina huzmantege'za atinerami'za ranke hu'za, Kagra Anumzamofo mofavre! Hu'neanagi Agra zmazeri korino, e'inage osiho huno hu'ne. Na'ankure Kraisi'e hu'za zamagra ko antahi'nazageno'e.

42 Jisasi maseno ko' atigeno ka'ma moparega vu'nege'za, vahe'mo'za hakre'za ome ke'za erifore nehu'za tagrane manigahanki, tatrenka ovuo hu'za kazigzi hu'za antahige'naze. 43 Hianagi Jisasi'a anage huno zmasami'ne, Nagra Anumzamofo kuma'mofo knare musenkea aruga'a kumapine huama huna vugahie. E'ina agafare Anumzamo'a hunantege'na ama mopafina e'noe. 44 Ana nehuno mago'ene Judia osi mono nontamimpi vuno, vahera mono kea ome zmasamino vano hu'ne.