1 Henka'a Jisasi'a mago'ene Taeberias mago agi'a Galili tiru ankenare, amate efore huzmerige'za amage' nentaza disaipol naga'amo'za ke'naze. Ama'amokizmire efore hige'za ke'naze. 2 Saimon Pita'ma, Tomasi mago agi'a Didimasi'ma, Natanael Kana kumateti ne'ene, Zebedi nemofokegi, tare amage' nenta'a disaipol netrene atru hu'za mani'naze. 3 Saimon Pita zamasmino, nagra nozame kuko atreku nevue higeno, tagra anazanke huta magoka vugahune, nehu'za ventefi mreri'za vu'naze. Ana kengera magore hu'za nozamea avazu osu'naze.

4 Anante ko'ma atigeno, nanterana Jisasi'a tinkenare oti'neanagi, amage nentaza disaipol naga'mo'za, Jisasi'e hu'za keso'e osu'naze. 5 Anante Jisasi zamasmi'ne, Mofavre nagare tamagra nozamea avazu osu'naze, tamageo? Huno zamantahigege'za, zamagra ke nona'a izo avazu osu'none, hu'za hu'naze. 6 Agra zamasmino, kukon tmia eritma ventemofo tmaga kazigati omo atretma, mago'a nozamea avazu hugahaze. Hige'za ana kukoma atrete'za, avazu hu'zanku kasgeke hu'naze, na'ankure rama'a nozamemo ana kukompi frevitege'za ana hu'naze. 7 Jisasi'ma avesi nentea disaipol ne'mo Pitanku anage hu'ne, antu e'i Ramo'e! Saimon Pita'ma antahiama Rane higeno'a, amega kukena'a eri hankre'ne, (na'ankure timpi eri'za erinaku agra atova hutre'nereti ana hu'ne), timpi tkaureno nagosa runo ti ankenarega vu'ne. 8 Hianagi mago'a amage' nentaza disaipol naga'mo'za osi ventefi e'naze, na'ankure mopa afete'are omne'negeze. Hagi 100ti'a mita zaza'a hu'nege'za nozame zgamo avi'ma te'nea kukona avazu huzma e'naze.

9 Zamagrama tinkenare e'za eme kazana tanknuza (sakol) teve hegre'nare, mago nozamene, breti'ne ana tevere menege'za ome ke'naze. 10 Jisasi, zamagriku huno, Menima azeri'za nozamefinti mago'a eritma eho. 11 Higeno Saimon Pita'a ventefi mrerino ana kukona avazu huno tinkenare e'ne. Ranra nozamea 153'amo avite'ne, mago'a rama'a nozamemo kukompina ufre'neanagi, ana kukona tagato osu'ne. 12 Jisasi'a zamagriku anage hu'ne, Eta nantera ne'za eme neho. Hianangi amage' nentaza disaipol nagapinti mago'mo, Kagra azage, hu'za antahige'zankura koro hu'naze, na'ankure zamagra Rane hu'za ko antahi'naze. 13 Jisasi eno breti emerino zamagrira nezmino, nozamea anazanke huno zami'ne. 14 Fri'nefinti Jisasi'ma otino zameri'neana, tagufa (3) zupa amate efore huzmerige'za amage' nentaza disaipol naga'mo'za ke'naze.

15 Nantera ne'zama nehna hutageno, Jisasi'a Saimon Pitanku huno, Saimon, Joni nemofoga, kagra ama vahe'zga zamagterenka Nagrikura kvesinenantampi? Huno antahi'gegeno, Ozo Ramoka, Kagra antahi'nane, nagra navesi negantoe. Jisasi'a asmino, sipisipi nagani'a ne'za zamio. 16 Jisasi'a tare zupa mago'ene asmi'ne, Saimoni, Joni nemofoga, Nagrikura kve'nesio? Ozo, Ramoka, Kagra antahi'nane nagra Kagrira navesi negantoe, Jisasi agriku hu'ne, Sipisipi zga'ni'a kegva huo. 17 Jisasi'a tagufa zupa ana kege huno asmi'ne, Saimon, Joni nemofoga, Nagrikura kvesi nenantano? Higeno Pita'a arimpa kna hu'ne, na'ankure tagufa zupama Nagrikura kve'nesio? Huno antahigea zankure. Pita'a Agriku hu'ne, Ramoka, Kagra maka'zana antahi'nane. Nagrama navesi negantoana Kagra antahi'nane. Higeno Jisasi ke nona'a asmino, Sipisipi zga'ni'a ne'zana zamio hu'ne. 18  Tmagerfa hu'na negasmue, Kagrama kahefa'ma mani'nantera kenakarera kamu'nofi hunka kvesi'zante kana vano hu'nane, hianagi ranafa resunka, kzana rutaresanke'za rumo'za kagrira kukena hugante'za, ovuku hanantega kavare'za vugahaze. 19 (Menima Jisasi'ma hu'neana, Pitama henka frino Anumzamofoma ra agi ami'nia zanku huama hu'ne.) Ana kema Agra huteno, Jisasi'a Pita asmino, Namage anto! Huno asmi'ne.

20 Pita'a rukrahe huno keana, Jisasi avesi avesi hunentegeno amage' nentea disaipoli ne'mo znavaririno e'ne. Ana nera Jisasi ahihi'zafi umase tragoteno ne'zama nenafima antahigeno, Ramoke, iza Kagrira vahe zamazampina kazerino antegahie? Huno antahige'nea ne' e'ne. 21 Pita'ma ana ne' negeno'a, Jisasina antahige'ne, Ramoke, ama nera nankna hugahie? 22 Jisasi ke nona'a agri asmino, Nagrama, Agriku mani'nesige'na ete'na esuema hanua knarera, kagri'zana omne'neanki, na'ane hugahane? Kagra namage anto! 23 Higeno anama hu'nea kemo'a Jisasinte zamentinti nehaza nagate vuno eno higeno, ama'na disaipol nera ofrigahie hu'naze. Hianagi Jisasi'a, agrikura ofrigahie huno osu'ne, hianagi frisio manisio Nagrama mani'nesigena e'tena esue hanuazamo'a kagri'zana omne'neanki, na'ane hugahane? huno hu'ne.

24 Ama'na disaipol ne'mo agra'a amazana huama huno ana zantamina kre'ne, higeta tagra antahita agri kegura (testimoni) tamage huta nehune.

25 Hagi hakare ruga'a zama Jisasi'a hu'nea zana me'ne, ana maka'zama avon tafepima kre'neresina, nagrama antahuana ama mopafina avon tafemo'a titipa higeno, anama kraza avontafe ante kankamuna omneresine.