1 Anazama vgaregeno'a, anantetira Jisasi'a zamatreno Galili mago kaziga vu'ne, mago agi'a Taiberias tirure hu'za nehaze. 2 Tusi'a vahe krerfamo'za Agrira avariri'za vu'naze, na'ankure krima vase'naza vahe'ma kaguvazana huno zamazeri so'e hige'za nege'za avariri'za vu'naze. 3 Anante Jisasi'a agonarega mrerino amage nentaza disaipol naga'ane Agrane anante umani'naze. 4 Hagi Jiu vahe kinafinti zamare'nea kna (Pasova) muse hu'za ne'za ne kna'zmi atupa hu'ne. 5 Anante Jisasi'a, keganti kegma huno keama hakare vahe krerfa Agritega neageno Filipina asmino, Inantegati bretia miza hanunke'za ama vahe'mo'za negahaze? 6 Ama kema Jisasima hiana Filipina reheno ke'ne, na'ankure Agra inankna zano hni'ana antahi'neno, reheno antahige'ne. 7 Filipi'a ke nona'a amanage huno asmi'ne, 2 hantreti'a silva zgoreti * eiti'a ikamofo mizane mizama hania bretimo'a, mago'mago'mo'ma osi'a neterema haniana ama vea krerfafina knarera huozmantegahie. 8 Agri amagema nentea disaipol ne' Endru, Saimon Pita negna amanage huno Jisasina asmi'ne, 9 Amafi mago osi mofavre emani'neno 5fu'a bali bretigi, tare nozamegi huno eri'neanagi, asi'amo'a inankna huno ama veapina knarera hugahie? 10 Jisasi'a amanage huno hu'ne, ke huge'za mopafi maniho. Anampina trazamo hu'nefi 5 tauseni'a vahe'naza mopafi mani'nage'za, vene'ne age hampri'naze. 11 Jisasi'a breti erino Anumzamofonte nunamu hunteteno, erigorino mani'nare refko huno nezmino, anazanke huno nozamea zamige'za nenazageno zamu hu'ne. 12 Nazageno zamu'ma higeno'a, Agri'ma amage' nentaza disaipol naga'a zamasmino, atraza ne'zama'a eri atru hiho, e'inahinkeno amne zankna osnie. 13 Anage hige'za eri atru hzageno, 5fu'a bali bretima kori'za ne'naza atupa atupa'a, 12fu'a eka'eka kupi eriri'naze. 14 E'ina hige'za veamo'za ana kaguvazama Agrama hiaza nege'za, zamagra anage hu'naze. Ama'i tamage huno Kasnampa nere, ama mopafima henka'a egahie hu'za hu'naza ne' mani'ne. (Diu-Kas 18:15)

15 Ana vahe'mo'za zamagraregati eme azeriza kini kvazmi manisie hu'za azeri otiku hzageno, Jisasi'a antahino keno nehuno, anantetira zamatreno agonarega Agraku mreri'ne.

16 Kinaga sege'za, Agri amage' nentaza disaipol naga'mo'za ana kumara atre'za hagerintega urami'naze. 17 Anante ventefi marerite'za, hagerina tkahe'za Kapenium vu'naze. Hago haninkigeno Jisasi'a zamagrama mani'narega uohanati'ne. 18 Hagerimo'a tusiza huno kranto kranto hu'ne, na'ankure tusi'a zaho'mo atufeno egeno ana hu'ne. 19 Ana nehige'za kuta azotareti tina vakakiza 5fu'o, 6si'a kilo mita naza nevu'za zamagra kazana Jisasi'a hagerimofo agofetu ne-eno ventemofo erava'o hige'za nege'za, zamagra tusi zamanogu hu'naze. 20 Hianagi Jisasi'a anage huno zamasmi'ne, ama Nagragi, korera osiho. 21 Anante zamagra zamagu'areti muse nehu'za, Agrira ventefi avrentazageno, vunaku zamagesa antahi'naza mopare ana ventemo'a ame huno uhanati'ne.

22 Vase'za ko'atige'za, ana hagerimofo ankenare mani'naza vahetmimo'za kazana magore huno onensa vente ramimpintira omne'neanki mago me'ne, anampina Agri amage nentaza disaipol naga'enena Jisasi'a mreorige'za ke'naze. Hianagi Agri'ma amage' nentaza nagamo'za zamagraku vu'naze. 23 Hianagi mago'a ne'one vente rami Taiberias kumateti e'za, Jisasi susu huteno breti zamige'za ne'naza mopa tva'onte ehnati'naz e. 24 Ehnati'za kazama Jisasi'ene, Agri'ma amage nentaza disaipol naga'anema omninage'za nege'za, zamagra osasi vente ramimpi mreri'za, Jisasinku hakre'za Kapenium vu'naze.

25 Ome hakre'za hagerimofo kantu kaziga Jisasima azeri fore nehu'za, amanage hu'za Agrira antahige'naze, Hurami ne'moka (Rabbai) Kagra nazupa amarera e'nane? 26 Jisasi'a kenonazmia anage huno zamasmi'ne, Tamage hu'na Nagra neramasmue, tamagra Nagriku nehakra'zana, kaguvazma hua zantekura nohakraze. Hagi tamagra bretima nazageno tmu'ma hia zanteku nehakraze. 27  Fanane hania ne'zantera eri'zana e'oriho. Hagi fanane osu manevava hanaza ne'zanku nentahita eri'zana eriho, e'i ana ne'zana Vahe'mofo Mofavremo tamigahie. Na'ankure Nefa, Anumzamo azanko avoma'a retro huno Agri hugnare hunte'ne. 28 Anankere zamagra anage hu'za Jisasina asmi'naze, tagra naza huteta, Anumzamo'ma hania eri'zana erigahune? 29 Jisasi kenona'a huno zamasmi'ne, Anumzamofona amanahu eri'za erihogu avenesie, Agri'ma huntegeno e'nemofonte tamentinti hiho. 30 Anankere zamagra Agri asmi'naze, Kagra na'a avame'zana nehnanketa negeta, tamage huta Kagritera tamentinti'a hugahune? Kagra nankna'za hugahane? 31 Tagri tfahe'za ka'ma mopafi mana ne'za ne'naze, hu'za krente'naze, Agra monafinti breti neho huno zami'ne. (Eks-Uti 16:4-36) 32 Anante Jisasi'a zamagrira zamasmi'ne, Nagra tamage, rfa hu'na neramasmue, Mosese'a monafinti bretia agra ontami'ne, hagi menina tamage bretia Nagri Nenfa monafinti neramie. 33  Na'ankure Anumzamofo bretia e'i ama monafinti erami'neankino, miko mopafi vahera zamasimu zamigahie. 34 Zamagra anante Jisasina asmi'naze, Ramoke, e'i ana bretia maka'zupa tmivava huo. 35 Jisasi anage huno zamasmi'ne, Nagra asimu eri bretia mani'noe, aza'o Nagrite esnimo'a aga'zankura osugahie. Hagi aza'o Nagriku amentinti hanimofona tinkura mago'ene ave'ositfa hugahie.

36  Hianagi Nagra neramasmue, tamagra ko Nagrira nage'nazanagi, tamagra tamentintia nosaze. 37  Maka vahe'ma Nenfa'ma, Nagri'ma nenmia vahe'mo'za Nagrite egahaze, hanige'na Nagrite'ma esimofona Nagra vuo hu'na retufe otregahue. 38  Na'ankure Nagra monafinti erami'noe, Nagra navesi'za hunaku ome'noe, hagi hunantege'na e'nomofo avesite erinaku e'noe. 39  Anumzamo hunantege'na Nagra e'nomofo avesira anahu hu'ne! Nagri'ma maka vahe'ma nami'nefintira mago'moe huno fnane osugahie, hagina vgare knarera zamazeri otigahue. 40  Na'ankure Nenfa avesi'zana amanahu hu'ne, maka'mo'za Nemofo nege'za Agrite zamentinti huntesamo'za manivava zamasimu erisage'na, vgamaresia knarera Nagrani'a azeri otigahue.

41 E'igu Jiu vahe'mo'za Agrikura ke hakare hu'naze, na'ankure Agrama huno Nagra ana breti monafinti erami'noe hiazante zamarimpa haviza nehige'za ke hakare hu'naze. 42 Zamagra anage hu'naze, ama Jisasi'ma, Josefe nemofo, nefane nereranema negona nepi? Nankna huno menia monafinti Nagra e'noe huno nehie? 43 Jisasi'a ana kemofo nona'a, amanage huno zamasmi'ne, Tamagra tamarimpa havizana osutma ke hakare osiho. 44  Mago'mo'a Nagritera omegahie, Nenfa'ma hunantege'na e'nomo agu'a avazu hanigeno Nagrite esige'na, vgare kna zupa azeri otigahue. 45  Kasnampa vahe'mo'za amanage hu'za Avontafepina kre'naze, Ana hanigeno Anumzamo maka'mokizmia huzmasmigahie. (Aisa 54:13) Maka'mo'za Nenfa ke nentahi'za rempi hanamo'za Nagrite egahaze 46  Mago mo'e huno Nefana onke'ne, Anumzane mani'neno e'nemo Agrake Nefana ke'ne. 47  Tamage hu'na Nagra neramasmue, aza'o amentinti hanimo manivava asimura erigahie. 48  Nagra'ni'a manivava hu'mofo bretia mani'noe. 49  Tmagehe'za ka'ma mopafi mana nete'za zamagra fri'naze. 50  Ama'ina bretia monafinti ermi'neankino, mago'mo'ma nesuno'a ofri manigahie. 51  Nagra ksefa mani'zamofo breti monafinti eramino'e, mago'mo ama ana bretima nesuno'a, agra manivava hugahie, E'i ana bretia Nagri navufa me'ne, ana navufamo maka mopafi vahe manivava asimu zamigahie.

52 Anage nehige'za anante Jiu vahe'mo'za nentahi'za, zamagra ke hugantigma hu'za anage hu'naze, Inankna huno ama ne' mo'a Agra avufa tamisigeta nenaku hunkeno nehie? 53 Ananku Jisasi'a anage huno zamasmi'ne, Tamage rfa hu'na neramasmue, Vahe'mofo Mofavre'mofo avufane, korane onesutma tamasimu eritma mani'zana tamagripina omnegahie. 54  Mago'mo, Nagri navufa neneno, Nagri kora nesimo'a manivava asimu erisanige'na, Nagra vgare knazupa azeri otigahue. 55  Na'ankure Nagri navufgamo'a tamage ne'zane, higeno Nagri koramo'a tamage ti me'ne. 56  Mago'mo Nagri navufa neneno, Nagri korama nesnimo'a, agra Nagripi manige'na, Nagra agripi nemnue. 57  Mani'nea Nenfa, Nagrira hunante'ne, na'ankure Nenfa'ma mani'negu Nagra mani'noankino, aza'o Nagri'ma nesimo'a, Nagra mani'nogu agra manigahie. 58  Ama'i monafinti ermi'nea breti me'ne. Tmagehe'za ka'ma mopafi nete'za fri'naza ne'zana omne'ne, aza'o mago'mo ama bretima nesimo'a manivava hugahie. 59 Ama naneke zga Kapenium Jiu vahe osi mono nompi (sinagog) mani'neno Agra'a rempi huzami'nea naneke.

60 Anazanku hu'za hakare'a Jisasi amage nentaza disaipol naga'mo'za, ama ana nanekema nentahi'za, ama kna'nentake naneke nehianki, iza agesa anteno antahigahie? hu'za hu'naze. 61 Hianagi Jisasi'ma hiankemo amage' nentaza disaipol nagara zamarimpa eri haviza hzageno, nezmageno, Jisasi amanage huno zamantahige'ne, Amama hua nanekegu tmarimpa kna nehazo? 62  Inankna hugahie, Vahe'mofo Mofavremo'ma negesageno ko'ma mani'nerega ete marerisigetma na'ane hugahaze? 63  Avamu'mo asimura neramie, tavufgamo'a mago'zana eri fore osugahie. Kema nagrama tamagrima neramasmua kemo'a, avamu ene ksefa mani'zane me'ne. 64  Hianagi mago'amota tamentintia nosaze. Na'ankure ese agafareti Jisasi'a zamentinti osnaza vahera, nezmageno iza'o komoru hanige'za Agri'ma ahe simofona agu'a ko ke'ne. 65 Anante Agra anange hu'ne, ama'na agafare nagra tmagrira tmasmi'noe, mago'mo'a Nagritera omegahie, Nenfa'ma avare namisimoke'za egahie.

66 Ana kema hiazanku Agri amage nentaza disaipol nagapintira ruga'amo'za atre'za, Agranena vano osu'naze. 67 E'igu Jisasi'a 12fu'a naga'a zamantahige'ne, Tamagrane natretma vunaku nehazafi? 68 Saimon Pita'a ana kemofo nona'a Agri asmino, Rantimoka izante katreta vunaku hunkenka nehane? Kagri kemo manivava asimura nemie. 69 Tagra tamentinti nehuta Kagrira antahita keta hu'none, Kagra magoke Anumzamofo Ruotge' ne', hugantegenka e'nane. 70 Jisasi'a ke nona'a zamagri zamasmi'ne, Nagra 12fu'a nagara huhampri tmante'noe, hianagi mago'moka havi avamu mani'nane. 71 E'i anagema hu'neana Saimon Iskarioti nemofo Judasinku hu'ne, na'ankure 12fu'a nagapinti, agra mago zmimoma henkama komoru huno Jisasima ha' vahe zmazampi avrezamisigeno ahesamofonku hune.