1 Ama ana Melkisedeki'a Salemi vahe'mokizmi kini ne' mani'neno, marerisa Anumzamofo prisi ne' manine. Hagi Abrahamuma kini vahe'ma ha'ma huno zamagatereteno, nevigeno'a karanka Melkisedeki'a tutagiha hunteno asomura huntene 2 Higeno Abrahamu'a maka'zama erino e'nefintira, nazantrema'a kevu erinteno, refako huno mago kevua Melkisedekina ami'ne. Hagi Melkisedeki'e agimofo agu'agesamo'a, fatgo avu'avazamofo kini nere hu'ne. Nehuno Salemi kini nerema hu'nea agu'agesamo'a, rimpa fruzamofo kini nere hu'ne. 3 Nerera'ene nefakea omanine, agigo azankomo'a omanigeno, kasente kna'a omanegeno, fri'nea agenke'a omanegeno, Anumzamofo mofavregna huno prisi ne mani vava hu'ne.

4 Melkisedeki'a ra ne' mani'neanki antahiho. Abrahamu tagigomo agranena ra ne' mni'neanagi, hapintima eri'noma e'nea zantamipintira nazantrema'a kevu refko huteno, anampintira knare'zantfama hu'nea kevua magora Melkisedekina ami'ne. 5 Mosese kasegemo'a maka'zama antenesafintira 10ni'a nazantrema'a kevu refko hu'nesageno, mago kevua prisi vahe'mo'za erigahaze huno krente'ne. E'i anazana zmagra'a nagapinti ene erigahaze hu'ne. Na'ankure zamagranena Abrahamu naga mni'naze. 6 Hianagi Melkisedeki'a Livai nagapintira omani'neanagi Abrahamu'ma nazantrema'a kevu refko hutenefintira, anampintira mago knare'zantfama hu'nea kevua eri'ne. Hagi Melkisedekia Abrahamuna asomura hunte'ne, ko'ma rama'azankuma huvempama hunte'nea nere. 7 Hianagi mago kea huontegosune, asomuma nemia ne'mo'a asomu eneria nera agaterene. 8 Prisi vahe'ma nazantrema'a kevu refko hunteneta mago kevuma refakoma huta nezamuna vahe'mo'za fri vgare'naze. Melkisedekia zmagatereno ra vahe manine, na'ankure agrikura huama hu'za manino vugahie huno hu'ne. 9 Livai nagamo'za nazantrema'a kevu refko hunte'nafinti mago kevua eneriza vahe'mo'za ko Abrahamupi Melkisedekina zmagra nazantrema'a kevu refko huntenafintira mago kevua ami'naze. 10 Na'ankure Melkisedekima Abrahamuma tutagihama hunteno, nazantrema'a kevu refko huno mago kevuma ami'neana, agripintira Livai vahe'mo'za zahufa forera osu'nazegeno'e.

11 Mosese kasegemo'a huno, Livai nagapintike prisi vahera manigahie huno hige'za mni'nazanagi, ana prisi vahe'mo'za mago vahera zmazeri knarera osu'nazagu mago Melkisedekikna prisi ne'ma fore'ma haniana, Aron nagapinti rompage, ru nagapinti fore'ma hanigeno knarera hugahie hu'ne. 12 Ana hu'negu prisi eri'zamoma zahema nehanageno'a, tra ke mo'enena anahukna huno zahe hugahie. 13 Na'ankure menima keagama nehuna prisi nera, kre sramanavu itare, kre sramna nevaza prisi vahepinti rompage ru nagapinti fore hugahie. 14 Nagrama nehuana Rantimo'a Jiu nagapinti e'ne. Hagi Mosese'a ana nagapinti prisi vahera fore hugahie huno osu'nea nagapinti fore hu'ne.

15 Ama ana miko zantamimo'a eriama huno, magora Melkisedeki kna prisi ne' menina efore nehie hu'ne. 16 Jisasi'ma prisi ne'ma mani'nena tagehe'mo'zama nehazaza huno Livai nagapinti prisi nera omani'neanki, manivava asimumofo hankave prisi ne' mani'ne. 17 Avontafemo'a agrikura huno, Melkisedeki kna hunka manivava prisi nere hu'ne, (Sam-Zga 110:4)

18 Ama ana kanteti erizama'ama omane hankave'a omane korapa kesegea retufeganti atrene. 19 Na'ankure kasegemo'a ana mikozana eriknarera nosie. Hianagi knare'zama fore hugahiema huta amuhama hunemunazamo noma'a e'nerino Anumzamofonte tavreno urava'o nehie.

20 Anumzamo Agra'a huvempa huno, Kraisi Agrake prisi nera mika zupa manigahie hu'ne. Hianagi mago'a prisi vahe'ma fore'ma hazageno'a, e'inahukna huvempa kea Anumzamo'a huozmante'ne. 21 Huvempa kema hu'neana, Nagra Ramo'na, huvempa ke hugantoankina antahintahini'a zahera osugahue. Kagra manivava prisi ne' manigahane hu'ne.

22 Na'ankure Anumzamo huvempama hunte'negu, Jisasi'a knare hagerafi huvempa kema tamigahue hu'nea Ne' mani'ne.

23 Rama'a vahe'mo'za prisi eri'zana eri'naze, na'ankure zamagra nefrizageno, rumo'za eri'zazmia eritere hu'naze. 24 Hianagi Jisasi'a manivava prisi ne' mni'nigeno, Agri prisi eri'zamo'a mevava hugahie. 25 E'ina hu'negu Agrite'ma etenoma, Anumzamofontema esimofona magoke zupa agu'vazinkeno mni vava hugahie. Na'ankure Agra manivava hu'neno, Anumzamofontega nunamu huno zamaza nehie.

26 E'inahukna ugagota prisi ne'mo tazeri knarera hugahie. Na'ankure Agra ruotge huno kumi'a omanegeno kumi'mo magore huno azeri haviza osu'ne. Menina kumi vahepinti azeri ruotge higeno, monafinka ragi erino mani'ne. 27 Agra ruga'a prisi vahe'mo'zama nehazaza huno mika kna kresrama vuvava nosie. Zamagra kumikura kresramana vute'za, vahe'mokizmi kumikura kre sramana nevazanagi, Jisasi'a magoke zupa Agra avufga eme aguza runo, maka vahe kumikura keka zafarera fri'ne. 28 Na'ankure kasegemo'a hanavezami omane ugagota prisi vahe huhamprizmante. Hianagi Anumzamo huvempa hunte'nea kemo'a kasegemofo amefi'a e'neana, Agri'a Ne'mofavremo mikazana emeri knare'zantfa nehuno manivava hugahie.