1 E'ina hu'negu ruotage hu'naza mono nerafugata, tagrama huama nehuna Jisasinkura Aposol ne' mareri agaterenea prisi nere hutma antahi amiho. 2 Mosesena tamage huno Anumzamo huhampri antegeno mika vahe'afi mani fatgo huno mni'neankna huno, huhampri ante'nemofonte Jisasi'a mani fatgo huno mani'ne. 3 Hu'neanagi Jisasi'a Mosesena agatereno ra agi erigahie. Nomagi vahe'mo'zama noma ki'naza nomofoma agatere'za ra zamagi enerizankna hugahie. 4 Na'ankure ana miko nona vahe'mo'za negizanagi, Anumzamo mika'zana trohune. 5 Mosese'a mika vahe'afina eri'zana avariri fatgo huno eneria nekino, henkama fore'ma hanizamofo avame'za mni'ne. 6 Hianagi Ne' mofavre'amo Kraisi'a Anumzamofo vahetera kva mani'ne. Hagi tagra ana vahe mani'nonankita, koro osu hankavetita nemanita, fore'ma hanigeta kesuna zanku'ma musema nehunazana otresune.

7 Hu'negu Ruotge Avamumo huno, Menima Agri ageruma nentahisutma, 8  korapa ka'ma kopi tamagehe'mo'za Anumzamofo rehe'za ke'nazankna huno, tamagu'amo'a hankave otino. 9  40ti'a kafu zgefima kaguvazama erifore huge'za ke'nazanagi, tamagehemo'za renahe'za ke'naze 10  E'ina hu'negu, e'i ananknafi vahekura narimpa henezamante'na, anage hu'noe, zamagu'amo'a savri huvava nehige'za, Nagri kana kenira nosaze. 11  Hu'negu narimpa he'zmantena huvempa hu'na, zamagra manifru kumanifina uofregosaze hu'noe. (Sam-Zga 95:7-11, Eks-Uti 17:1-7) 12 Nafuheta kva hu'neta kumi'mo'ene tamentinti osu'zamoma asimu anteno mni'nea Anumzamofonteti'ma, tamavretre zankura magoke magokemotma kva hiho.

13 Hianagi menima knama me'nenire, mago magomotma ozeri hanaveti, azeri hanaveti maka kna nehinkeno, kumi'mofo havigemo'a rehiza huoramanteno. 14 Na'ankure ese'ma Agritema ne-eta, tamentintima hu'nonazama azeri hankavetisuta, Kraisi'ene tragoteta vgaretera uhanatigahune. 15 Avontafemo'a anage hu'ne, Menina Agri ageruma nentahisuta, koma neramagehozama zmefima humi'nazaza huta, Agritera tamagu'a kafana eri'onkiho hu'ne.

16 Zamagra iza'za Anumzamofo ke nentahiza hara rente'naze? Zamagrira Mosese'a Isipitira zamavreno omenemozafi? 17 Hagi Anumzamofona iza'za 40ti'a zage kafufina azeri rimpa he'naze? Zamagra ka'ma kokampima kumi'ma hu'za fri'nazamoze. 18 Hagi inamokizmigu Anumzamo'a hankave ke huno, mani fruhu kuma ni'afina tamagerafa hu'za uofregahaze hu'ne? Zamagra ke'ama amage'ma onte'namoze. 19 Tagra refkoma huta konana zamagra zamentintia osu'nazagu, ama ana vahe'mo'za manifruhu kumapima uofre'naze.