1 Anumzamo'a korapara tagehe'mokizmia, kasnampa vahepi huvazino rama'a zupa ruzahu ruzahu kazigati kegaga huzami'ne. 2 Hianagi menima vgare knafina Nemofompi huvazino keaga huramiana, e'i ana Mofavre'amofo azampinti ama mopa erifore hu'nemofo maka'zana erisinti harete'ne. 3 Ne'mofavre'amofompi Anumzamofo msazama'amo'a remsa nehigeno, Agrikna huno mani'neno, Agri'a hanave ke'areti maka'zana erigasefa huno nevuno, kumi'ma eri agruhu eri'zama eriteno, Marerisgahu Anumzamofo azantamaga kaziga monafinka mani'ne.

4 E'ina hu'negu ankerontamimofona zmagetereno ragi e'nerigeno, Anumzamo'ma Agima ami'nea agimo'a makamokizmia zmagaterene. 5 Na'ankure Anumzamo'a ina ankeronku huno, kagra Ne' Mofavreni'a manisnankena, menina, Nagra negafana manigahue? nehuno, ete mago'ane huno, Nagra negafana mani'nenugenka, Kagra Mofavreni'a manigahane? hu'ne. (Sam-Zga 2:7, 2 7:14, 1 Kro-Zam 17:13) 6 Hagi zage mofavre'ama avreno ama mopafima ne-eno'a, atrenkeno ana miko Anumzamofo ankeromo'za mono hunteho hu'ne.

7 Anumzamo'a ankerozga'agura huno, zamazeri zaho kna hugahue nehuno, eri'za vahe'agura zamazeri teve anefakna hugahue hu'ne. (Sam-Zga 104:4)

8 Hu'neanagi Ne' mofavre'agura huno, Anumzamoka, kinia mni'vava hugahane. Kagra ftago kavukavateti kinia maninka kegva hugahane. 9  Kagra fatgo zamofo avesinentenka kasegema rutagre avu'avazana kavesra hunentane. E'ina hu'negu Anumzamo'a kagri Anumzankino, magokama maninaza nagapinti kavreno musezamofo masave frenegante. (Sam-Zga 45:6,7)

10  Hagi Ramoka ese agafarera Kagra'a ama mopamofo trara tro nehunka, monafi me'nea zantamina Kagra'a kazampinti trohu'nane. 11  Zamagra frigahazanangi, Kagra maninka nevananke'za, tavravemo atafareno havizahiankna mikamo'za hugahaze. 12  Kagra zamagrira harontafe eri ragazariankna hunezmantenanke'za, kukena hutreankna hugahazanagi, Kagra saganera osunka manivava hugahane. (Sam-Zga 102:25-27)

13 Hianagi ina ankeronku Anumzamo'a huno, kagra nazantamaga kaziga mani'negena ha' vaheka'a zamazeri kaga tra antaneno hu'ne? (Sam-Zga 110:1) 14 Hagi ankero vahera eri'za vahere, zamagra avamutaminkino Anumzamo'a zamahokeno zmavaresia vahete kegva huzamante'nigu huzmantege'za e'naze.