1 Tamagra neginagi Galesia vahere, Nagra Jisasima rugeka zafare ahegeno fri'nea kea ko huama hugeta antahi'nazanagi, ina ne'mo antahintahitamia tamazeri savrira nehie? 2 Nagra mago'za tamagripintira kena erifore hu'za hue. Tamagrama Ruotge Avamuma eri'nazana, kasegemofo erizanteti eri'nazafi, ke nentahita tamentinti nehuta eri'naze. 3 Tamagra negi nenazafi? Avamumo eri agafa hu'nea eri'zana, tamagratami hanavereti erivgare'za nehazo? 4 Nagrama nagesama antahuana tamagrama ko'ma knazama eri'nazana, amane eri'nazo? Nagrama nagesa antahuana amne knazana e'ori'naze. 5 Anumzamo'ma Ruotge Avamu'a neramamino, kaguvazama tamagripima erifore hu'neana, Mosese kasege avaririzageno anara hu'nefi? Anumzamofo ke nentahita, Agrite tamamentinti hzageno anara hu'ne?

6 Avontafemo'a anage hu'ne, Abrahamu'a amentinti higeno, Anumzamo'a fatgo nere huno agrikura hu'ne. (Jen-Agf 15:6) 7 E'ina hu'negu antahita ketama hanazana, zamentintima haza vahe'mozage, Abrahamu mofavre mni'naze. 8 Avontafepina anage huno krente'ne, Anumzamo'a megi'a vahera zmentinti hanageno zmavregahie huno hu'ne. E'ina hu'negu Anumzamo'a anage huno Abrahamuna knare musenkea asmino, maka mopafi vahe'mo'za kagripinti asomura erigahaze huno hune. (Jen-Agf 12:3) 9 E'ina hu'negu iza'o amentintima hanimo'a, amentinti ne'ma Abrahamuma ami'nea asomura erigahie.

10 Na'ankure kasegema avaririzante Anumzamo'a muse hunantegahie hanimo'a, kazusifi mani'ne. Anumzamofo avontafepina anage hu'ne, mika vahe'mo'za mika kasegema amage'ma ontesnamo'za kazusifi manigahaze hu'ne. (Diu-Kas 27:26) 11 Hagi mago vahe'mo'e huno kasegema amage'ma antezampintira Anumzamofo avufina fatgo vahera omnigahie. Na'ankure fatgo vahera zamentintima hanagu manigahaze. (Hava 2:4) 12 E'inahukna hianagi, kasegemo'a amentinti hu'zana omnene, iza'zo e'inahu hu'za kasegemofo amage'ma nentesazamo'za, ana kasegere manigahaze. (Lev-Pri 18:5)

13 Kasegemofo kazusifintira Kraisi'a mizaseranteno taza hu'neankino, ana kazusia Agra'a erino taza hu'ne. Na'ankure anage huno avontafepina krentene, maka vahe'mo'za keka zafare'ma hanti'nesamo'za kazusifi mani'naze hu'ne. (Diu-Kas 21:22, 23) 14 E'ina hanunkeno Abrahamuma huhampritenea asomumo'a, Kraisi Jisasimpinti megia vahepina nevanigeta, tagra huvempa hu'nea Avamura tamentinti hanuta erigahune.

15 Nenfugate, Nagra vahe'mo'zama maka knama nehaza zmavuzmavate hunte'na tamasamiza hue, vahe'mo'ma mago'zama hu'naku mago rimpama hu'za kema hagerafinesaza kea, mago vahe'mo'a rugea huntege, eri atrege osugahie. 16 Korapara Anumzamo'a Abrahamunku'ene agripinti fore hania mofavregu huvempa kea hunte'ne. Agra kagri mofavreramine huno osu'ne. Agra rama'a mofavre raminkura osu'ne. Magoke mofavregu huno anage hu'ne, kagripinti fore'ma hanimo'ema hu'neana, e'i Kraisinku hu'ne. (Jen-Agf 17:7) 17 Hanki Nagrama nehuana amanage nehue, esera Anumzamo'a Abrahamu'ene huvempa hutegeno, 430ti'a kafuzge evutegeno, henka kasegea efore hu'neankino, kasegemo'a Anumzamo'ma huvempama hu'nea kea eri otregahie. 18 Na'ankure erisanti haregahaze hunesiazamo kasegefima manenesiana, huvempa hu'nea kefina omnesine. Hianagi Anumzamo'a Abrahamuna huvempa hunte'ne.

19 E'inama hu'nesiana, na'a agafare kasegea ami'ne? Kasegema zami'neana vahe'mo'za kefozama nehazaza keama hnazegu zami'ne. Hianagi ama ana kasegema avaririzamo'a memevuno, Anumzamo huvempama hu'nea Mofavrema esia knare ome vgaregahie. E'i anazamo'a mago'ane ruzahu hu'ne. Anumzamo'a ankero vahera kasegea zamige'za, Anumzane, vahe'mofone amuno ne' Mosese ami'naze. 20 Tare vahe'moke kema hagerafinaku'ma hanunkeno'a, amuno ne' mni'nenkene anara hugaragi, Anumzamo Agra'a huvempa Abrahamuna hunte'ne.

21 Kasegemo'a Anumzamo huvempa hu'nea kene mago znarimpa osu'napi? A'o, anara osu'ne! Hagi maka kasegemo'ma kasefa tasimuma tamisiana, tagra ana kasegege amage'nenteta Anumzamofo avurera fatgo vahera manusine. 22 Hianagi Anumzamofo avontafemo'a anage hu'ne, Kumi'mo'a maka vahera kina huzmante'negu, Anumzamo'ma huvempa hu'neazama erisazana magoke kana, Jisasi Kraisinte zamentinti hanamo'za erigahaze.

23 Hianagi amentintima omenegeno, kasegemo kina rerantegeta manita neonkeno tamentinti hu'zana efore hu'ne.

24 E'ina hu'negu kasegemo'a kvagriranteno Jisas Kraisi knare ehnati'neankita, tagrama tamentinti hanuta Anumzamofo avurera fatgo vahera manigahune. 25 Hianagi tamentinti hu'zamo fore'ma hu'nea knafi mni'nonankino, kasegemo'a kegva kriorantegahie.

26 Na'ankure tamagra maka'mota Jisas Kraisinte'ma tamentintima nehuta, Anumzamofo mofavre mani'naze. 27 Na'ankure tamagra maka'mota Jisas Kraisinte mono tina nefreta, Kraisina kukena hiaza nehaze. 28 Hanki Jiu vahero Griki vahera omnita, kazokzo vahe'ene amne vahera omnita, veo aro omni'naze. Na'ankure tamagra maka'mota Kraisi Jisasimpina magoke mani'naze. 29 Hagi tamagrama Kraisi vahe'ma mni'nenuta, tamagra Abrahamu negehogata mni'neta, erisanti haregahazema huno Anumzamo huvempa hunte'nea vahera manigahaze.