1 Italima tina takaheta vugahaze hutageta, mago ruotage hu'za empra 100ti'a sondia vahete kva nehia ne' (sensulien) Juliasi kegva hinogu, Poline, ruga'a kina vahera, avaremi'naze. 2 Atramutiti Esia kaziga rama'a vente manitere nehia kumate manitere huno, vunaku nehia ventefi marerita hagerimpi vu'none. Aristakusi'a Tesalonika ra kumapinti nera, Masedoniatikino tagrane vu'ne. 3 Maseno ko'ati zupa Saidon uhanati'none. Juliasi'a knarere huno Polina huntegeno, amane vunka knampa ka'a ome nezmagenka, kzama hu'zana zamagripinti erigahane huno huntegeno vu'ne. 4 Hagi Saidonia atreta Siprusi ti amu'nompi me'nea kuma asogita vu'none. Na'ankure zaho'mo'a tusiza huno himamutino hagerina erivnapene. 5 Silisiane Pamfilia hagerina arugitagita vunazamota, Maira rankumate Lisia provinsifi umani'none. 6 Anante sondia kva ne'mo'a Aleksandriati ventemo, Itali vunaku nehia vente keteno, anampi tavare antegeta vu'none. 7 Akoheta rama'a kna ana'ana huta vu'none. Tusi knazampi Sindasia ehanati'none, na'ankure zaho'mo'a tusi himamu reno kana renkaniregeta mago'anena ovuta, Kriti ti amunompi me'nea mopa asogita Salmoni vu'none. 8 Agatereta tusi amuho huta Lasia kuma tavaonte, Fea Haveni e'none.

9 Rama'a knamo'a tagateretegeno, hagerimpi vuna kamo'a menina hazenke atie, na'ankure Jiu vahe'mo'za kave'ma a'o hukna agateregeno, hampo'na zaho ko atu knafi efrone, Poli'a antahintahi zamino, 10 anage hu'ne, ama ve'nene zage, nagrama nentahuana, amama vuku'ma nehuna kamofona rama'a hazenkefi ufreta rama'a zanti atregahune, feno'zane ventegeropage, tagranena tasimura atregahune huno zamasmi'ne. 11 Hianagi sondia vahete kva ne'mo'a, ventere'ma aze'neria ne' ene, ventemofo nefake ha'a nanekea nentahino, hagi Poli'ma hiankea ontahi'ne. 12 Na'ankure zahoko'atu knafima ventemo'ma umani kumamo'a knarera osu'ne. Rama'amo'za mago'zmarimpa hu'za, knarekita vugahune hu'naze. Zamagesama antahizana Foniksi uhanatigahune hu'za antahi'naze. Kritima ventemo'ma unemania kumamo'a rugaruga asoparega zge ufre kaziga (notwest sautwest) avugosa hunte'negeno zaho ko atu knafina anante umanigahune hu'naze.

13 Kanti sauti kazigati agazone zaho emarerige'za, hago knare hiankita amane vugahu'ne nehu'za, timpi umaniku erinetraza zana anka avazuhu ventefi nenteza, Kriti kaziga vu'za mopa tva'onte vu'naze. 14 Hianagi tusi'a not isti'e hu'za nehaza zahokomo avunenenteno Kriti kazigati tusi himamutino e'ne. 15 Zaho komo'a vente'a eme amasagino azeri rava higeno, ventemo'a azeri agatere'zana osigeta tagrati atronkeno zaho komo taretufeno vu'ne. 16 Kautie nehaza ti amu'nompi mopa asogita tagareta nevuta, tusi amuho hunerantegeta tazama husia onensa ventea avazu huno ne-ea ventea erinteanaga atre'none. 17 Osi ventema erianaga atrete'za, nofi eri'za ra ventere azerisigu kitragote'naze. Vene'ne zgamo'za ventemo Sitisi tinkenare ome hae'zankura tusi kore nehu'za zamazeri knama hanige'za ti avozare'ma akohe'za vanagu, kna'age'zama rente'naza nofira eritrete'za atrageno zaho'mo zamatufeno vu'ne. 18 Maseno ko'atige'za mago'a fenona ventefintira eri atre'naze, na'ankure zaho komo'a tusi hampo'natino ahegantugama huno azeri nakari'za hige'za ana hu'naze. 19 Nampa 3knazupa ventemofo eri'za zantamina mago'a asga hu'za mate'vu atre'naze. 20 Tagra zagene hanafi'enema mika knafima hanatigeta onkonkeno zahoko'mo'ma knare osigeno'a, knare hugahune huta tagesama antahi'nona zamo'a amane zankna hu'ne.

21 Za'za kna ne'zana one'za manizageno, Poli'a amu'nozamifi otino anage hu'ne, ama vene'nemotma nagrama huanke amage antetma Krititima atretma omazasina amanahu hazenkene tuzampaza zantamima atraza zana otrasine. 22 Hanki menima tamasmisuana korera osiho, na'ankure amama mani'naza amu'nompintira mago'moka fanane osugahananki ventemoke fanane hugahie. 23 Na'ankure meni keragera nagrama Agri vahe mani'nena erizama'a erinentoa Anumzamofo ankeromo'a navuga eme otino, 24 anage hu'ne, Poliga antahio korera osunka amane Sisa avurera ome otio, kagranema ana mika ventefima neaza nagara Anumzamo'a asunku huramanteno tamaza hugahie hu'ne. 25 E'inage hu'negu ama vene'nezga korera osiho, na'ankure nagra Anumzamofonku namentinti nehuankino nasami'nea kante fatgo huno taza hugahie. 26 Hu'neanagi mago ti amunompi mopare atresunkeno zaho'mo ventea atufeno have ome amiteno rukaha hanie.

27 14ni'a kenage'mofo agu'afima zaho'moma tatufeno Adriatiki hageri amu'nompima nevigeno'a, kerage amu'nompina ventefi eri'za vahe'mo'za hago mopare neone hu'za zamagesa antahi'naze. 28 Nehu'za nofi tu'mitare knaza eri renente'za, eri hagerimpi re'za kazana, 40ti'a mita fenkagame urami'ne. Osi'a ogantu'a vuza mago'ane ana nofira erire'za kazana, 30ti'a mita timofo zaza a'mo'a urami'nege'za ke'naze. 29 Have haegahune hu'za tusi zamagogogu nehu'za, ventema umaniku'ma nehige'za erinetrazaza anka 4'a asgahu netre'za, ko'ma atusigu nunamu hu'naze. 30 Anante ventefi eri'za vahe'mo'za ventefinti atre'za fre'naku nehu'za, havige hu'za nofite kna'nentake'za eri netraze nehazage'za osi voti hagerimpi eri atre'naze. 31 Poli'a sondia vahete kva ne'ene ruga'a sondia vahera zamasamino, Ama'na vene'ne zgama ventefima omani'snazana tamagra frigahaze hu'ne. 32 Hige'za sondia vahe'mo'za ana dinkire'ma kinte'naza nofira traga hutrageno hagerimpi mareno vu'ne.

33 Ko'atumasa huku higeno, Poli'a mika vaheku ne'za neho huno nezmasmino anage hu'ne, 14ni'a kna'mofo agu'afina naza fore hugahieha hutma ne'zama onetma mago'zama osutma e'naze. 34 E'inama hu'nagu mago'a ne'zana neho hu'na neramasmue na'ankure, tamagri'ma tamazeri hampo'na hanigetma manisnagu nehue. Na'ankure magore hunka osi hazenkea mago'moka e'oritfa hugahane. 35 Anagema huteno'a, ana mika vahe'zamufi breti erino Anumzantega nunamu hunteno, korino agafa huno ne'ne. 36 Ana huno hakare vahera zamazeri hampo'na huke hige'za zamesite ne'zana eri'naze. 37 Ana miko vahe'ma vente agu'afima mani'nonana, 276'a vahe mani'none. 38 Anahu'za zamesiama'a nezamu nehu'za, ventemo'ma oza hanigu witi'a eri'za hagerimpi matevu atrenaze.

39 Ko'ma atige'za, mago mopa ke'nazanagi ana mopa antahi'za ke'za osu'naze, hianagi timo eri mago huno ufreno knare kahepa ruherafi'nege'za kete'za, knare hanuno'a zahomo vente'a atufeno anante vugahie hu'za antahi'naze. 40 Hige'za vente'ma azerino nemania nofira tgahu'za eri timpi netre'za, ventema azeri ante fatgo higeno nevia apa knonte'ma ki'naza nofira vakane'naze. Anante avugama me'nea selia eri zaho kantega netre'za, hageri ankena kefatago hu'za vu'naze. 41 Ventemo'a have ome amasgino anampi vuno'eno osu'are agi'mo'a runtanigeno, ruga ragati hagerimo'a avunema anteno riga'a rutamana hutre'ne. 42 E'i sondia vahe'mo'za kina vahe zamahe frinaku ke retro hu'naze. Hanki mago'mo'a zanagora aruno tatareno ofregahie hu'za hu'naze. 43 Hu'nazanagi, sondia vahete kva ne'mo'a' Poli'na avare so'e huno aza huno vuku agesa nentahino, sondia vahe'mo'za kina vahera ozmahesaze nehuno, azagama zanago ruga hu'nesamoka ventefintira takaurenka pusante tinkenare vugahaze huno hige'za, 44 mago'amota, zafa atupare azeritma nevusageno, ventemofo atupare aze'nerita vugahaze, hige'za ana'ma hazana knare hu'za mopare vu'naze.