1 Nafu'nafaheta, amama nagrama navufa nagu'vazi kema nehua kea antahiho. 2 Zamagrama antahizama, Aramu (Hibru) kefinti kema nehige'za nentahi'za, mago'ane zamagasasankea eri anterami'naze. Anante Poli'a anage hu'ne, 3 nagra Jiu nere, Tasis kumate Silisia ksenante'ne. Hianagi ama ran kumapi ra hutena Gamalieli hikanaga avonona hu'na, tagehemofo kasegemo hu'nea kante ante'na Anumzamofo avu'avara hanaveti'na avariri fatgo hu'noe. Tamagrama nehazaza hu'na Anumzamofona amage ante'na vu'noe. 4 Nagra amanahu hu'na, zamentinti vahera nezamahe'na, zamahe fri'za nehu'na, vene'ne a'nenena kina rezamante'na zamare'na kina nompi ome zamante'noe. 5 Ugagota prisi ne'mo'ene, maka kanisol (senhidren) vahe'mo'za, amama nehuazankura tamage hu'za tamasmigahaze. Zamagra mago'a avona kre'nami'za erinka Damaskasi nemniza kafuhe'intega vuo hazage'na, nagra kina ome rezmante'na zamare'na e'na, Jerusale zamata hoza zamihogu kantega vu'noe.

6 Nagrama vuvava hu'na Damaskasi urava'o nehugeno'a, feru'naza monafinkati msa'nentake tvi'mo ame' huno remsa hunante kagine. 7 Anante nagra traka hu'na mopafi evuramugeno, mago ageru nentahugeno anage huno nagriku hu'ne, Sol, Sol, na'a higenka Nagrira nazeri havizana nehane? 8 Nagra ke nona'a, azage Ra'moka? hu'na nehugeno, Agra anage huno nasami'ne, Nazareteti Jisasi'na nazeri haviza nehane huno hu'ne. 9 Nagrane vu'naza vahe'mo'za ana msa ke'nazanagi, nanekema hunamia kea antahi ama osu'naze. 10 Ana hige'na nagra na'a hugahue Ramoka? hu'na antahigogeno, Ramo'a nagrikura anage hu'ne, Otinka Damaskasi vugeno, maka'zama hugahane hu'na huhampri kante'noa'zana kasamino. 11 Na'ankure tavi'mofo msamo navurga erihaviza hige'na navua onkoge'za, magokama vu'nona vahe'mo'za Damaskasia nazante navazu hu'za ufre'naze.

12 Ana kumate mago nera mani'neana agi'a Ananaisi kasegemofo avariri fatgo nehige'za, anampima nemni'za maka Jiu vahe'mo'za, knare nere nehaza ne'mo, 13 mani'nore eme otino nagriku anage hu'ne, Soliga nenafuge, kavurgamo'a so'e huganteno! Higeno ame' huno navumo'a hari hige'na kesga hu'na ana ne' ke'noe. 14 Anante agra anage huno nasami'ne, tagehe'mokizmi Anumzamo ko kagrira huhampriganteno, Agri avesi'za antahinka kenka nehunka, Fatgo Hu'nea Ne' Jisasi negenka, Agra'a agipinti'ma hania kea antahigahane. 15 Na'ankure Agrama kagri'ma eri kaverigenka, negenka nentahinka hu'nana kea, huama hunka maka vahera zamasmigahane. 16 Na'a higenka avega antenka mani'nane? Otinka mono ti nefrenka, agihanta nevazigeno kumi ka'a sese huganteno hu'ne.

17 Ana hutege'na ete rukarahe hu'na Jerusale kumate e'na, ranmono nompi nunamu nehu'na ava'nagna'za kogeno, 18 Ramo'a negogeno anage huno nasami'ne, Hantaka'a Jerusalea atrenka ame' hunka vuo, na'ankure Nagri nagenkema kagrama hanana kea ontahigahaze. 19 Nagra kenona'a anage hu'noe, Ramoka Kagrite'ma osi mono nompi mono nehu'za, zamentintima nehaza vahe'ma kina nompi zamare nente'na, zamazeri havizama nehu'na zamahe'noazana ko antahi'naze. 20 Kagri kema huama nehia ne'ma Stivenima ahe'za korama'a erimegi atraza'zana, nagrani'a tava'onte mani'nena, mago narimpa nehu'na, ahe'naza vahe'mokizmi anakare ku'zamirera kava hu'nogeza ahe'naze. 21 Anante Ramo'a anage huno nasami'ne. Vuo! Na'ankure afete hugante'nugenka megi'a vahepi ke'ni'a erinka ome zamasmigahane hu'ne.

22 Ana vahetamimo'za antahime nevazareti'ma, megi'a vaheku'ma agrama kema hiana nentahi'za zamagerura eri mago hu'za ranke hu'za, ama mopafintira azeri atreho! Agra ama mopafi manigara osu'ne! 23 Rankege nehu'za, kukena'zami zafima netare'za, kugusopa kate'za zahopi mate vu'naze. 24 Ana'ma haza'zanku Romu sondia kva ne'mo'a, Polina ete avaretma sondia vahe kumapi ufreho huno huzmante'ne. Agra zamasmino kao akaruteti trohunte nofi knonu sefu kno Polina ome nehetma antahigeho, Jiu vahe'mo'za nanke agafare amanahu rankea Polina hunentafi, huno huzmante'ne. 25 Knoma ahenaku azama azeri antesga nehazageno, Poli'a anante otino mani'nea sondia kva ne' (sensulien, hantretia sondia vahete kva nera), asami'ne, Knare hu'negu hazenke'a omane Romu vahere huno maninesia vahera ke agafa'a eri fatgo osu'nesiazantera ahegahazafi? 26 Sondia vahete kva ne'mo, ana kema nentahino, ugagota sondia nete vuno, kema hianke ome asamino, anage hu'ne, kagra na'a huntenaku nehane? Na'ankure ama'na nera Romu nere huno mani'nea nere. 27 Anante ugagota sondia kva ne'mo otino eno Polina anage huno antahige'ne, Kagra nasamio Romu ne' mani'nano? higeno agra hu'ne, ozo. 28 Ana ugagota sondia kva ne'mo, kenona'a anage hu'ne, Nagrama Romu vahe mani'nakura rama'a zgo mizase'na mani'noe. Hianagi Poli'a kenona'a huno nagri'enena ama mopare nere huno nenfa'a mani'neno, ome kasenantege'na, Romu nere hu'na mani'noe, 29 Polima sefu ami'za nehaza vahe'mo'za ame hu'za atre'za mani ogantu ogama nehazageno, ugagota sondia kva ne'mo antahiama Poli'ma Romu ne' mani'nege'za anakinte'naza zankura kore hu'ne.

30 Maseno ko'atigeno Romu sondia vahete ugagota kva ne'mo'a, Na'a agafare Jiu vahe'mo'za kea Polina hunte'naze antahino keno hunaku kazufe netreno, prisi vaheku'ene kanisol vahe'zga ke hige'za atru hu'naze. Anante Polina avareno eramino zamuga eme ante'ne.