1 Ana ke hakarema haza'zamo vgaregeno, Jisasi amage nentaza disaipol nagara Poli'a kehige'za emeritru hazageno, zamumro kea anteteno, hufru huno knareki manineho hunezmanteno, atreno Masedonia vu'ne. 2 Ana mopa kazigama vano huno rama'a keretima zamentinti naga zamazeri hanavematiteno, Grisi ehanati'ne. 3 Anantega 3'a ika maniteno, Siria kaziga ventefi vunaku'ma nehigeno, mago'a Jiu vahe'mo'za haenaku ke retro haza nanekema nentahino'a, eteno Masedonia mopafi kampi vunaku Poli'a agesa antahi'ne. 4 Mago'a vahe'mo'za Poli'ene vu'nazana, Beria kumateti ne' Sopati, Perusi nemofoki, Tesalonikati Aristakusi'ene Sekanduskegi, Debe kumateti Gaiusiki, Esia kumateti Timotiki, Tikikusiki, Trofimasi'za vu'naze. 5 Ama ana vene'nemo'za vugote'za Troasi ome tavega ante'naze. 6 Zo'ore bretima Juda vahe'mota nenona kna'mofo amefiga'a hompama vagaregeta, Filipai kumara atreta ventefi mrerita 5fu'a zge ferupi nevuta, Troasi kumate tavega ante'nare uhnatita ana kumate mago sonta umani'none.

7 Ana Sontamofo pusa kna're bretima kori'za (komonion) neku eritruma nehunkeno'a, Poli'a oki vugahue huno agesa nentahi'no keaga nezmasmino, mono kea huvava nehigeno kerage amu'no ase'ne. 8 Anagamu kino mareri'nea nomofo hunaraginte pinka rama'a rampe tvira manenegeta atrua hu'none. 9 Hagi mago nehaza nera agi'a Jutikasi'e, zaho kamofo atupare (windo) marerino mani'neno, Poli'ma keagama huvava huno nevigeno'a, antahirega avukoko higeno, mase himarenefinti, tagufa nonteti anagamuti asaga huramino ahe fri'ne. 10 Hianagi Poli'a uramino agri agumpi umseno azana rugagino anu'nekino tmasunkura osiho hu'ne. Tamagra antria osiho, na'ankure agra ofri'neanki amne mani'ne huno hu'ne. 11 Nehuno Poli'a eteno anagamu marerino, bretima korige'za netageno, za'za kna zamagranena keaga nehigeno ko'atigeno zamatreno vu'ne. 12 Ana nehazavea ofrino mani'nege'za muse nehu'za avare'za nontega vu'naze.

13 Ananteti tagra ventefi umarerita Asosi vunaku nehuta, Polina avarenteta vunaku tagesa antahi'none, na'ankure ama kana agra'a azeri antefatgo huno, agra mopafi vugahue huno agesa antahi'ne. 14 Asosima rutagiha higeta, agrira ventefi avarenentata, Miteleni ti amunompi me'nea ran kumate vunaku vuvava hu'none. 15 Anantetira maseta mago knarera ventefi nevunkeno ko'atigeta, Kiosi tinkenare uhanatita, mago knarera Samosi uhanatita, hagi ana kna'mofo amefiga'a Mailitusi vu'none. 16 Na'ankure Poli'a Efesasia agateregahue huno antahi'ne, na'ankure Esia za'za kna omani'na ko knare'ma hanuna Jerusale nagra mani'nesugeno hompa (pentikos) kna fore hugahie hu'ne.

17 Mailatusi uhanatite'za, Poli'a ke atrezmanteno Efesasi mono nonte kva (elda) vahe'zga eme nageho hu'ne. 18 Ke hige'za agrite ageno, amanage huno zamasmi'ne, Pusante'ma Esia mopare nagiama rentoa zupa, tamagripima maka zupa mani'na e'noana, tamagratmi ko ketma antahi'naze.

Esia kaziga e'na tamagrane nemanugeta nagri agafa'a nage'naze. 19 Jiu vahe'mo'za nazeri havizahu kema retro'ma haza zamo'a tusi'a knazamo nagri navufare ege'na anterami'na zavira nete'na, Ramofo erizana eri'noe. 20 Tamagri'ma tamaza hania kea, korera osu'na huama hu'na tamasmugetma antahi'naze. Vahe'pina neramasmi'na, nonte nontera tamasmugetma ko antahi'naze. 21 Jiu vahe'ene Griki vahera hu'ama hu'na tamagu'a rukarehe hutma Anumzante ne-etma, Ranti Jisasinte tamentinti hiho hu'na zamasmi'noe. 22 Hagi menina Ruotge Avamu'mofo ke amage antena, nagra Jerusalemi nevue, nagri navufarera na'a fore hugahio, ontahi'noe. 23 Hankino Ruotge Avamu'mo nagrira nasamino, mika ranra kumapina, kina hu'zamo'ene kna'zamo'enena kavega ante'ne hu'ne. 24 Hu'neanagi navufagura nagesa nontahue, tusi'a zana eri'zani'a erivaga nere'na, Ra Jisasi'ma eri'zama namino vahe'ma zamasmio hu'nea eri'za eri'na Anumzamofo asunku zankura knare nanekea vahera zamasmigahue. 25 Hagi menina nagra antahi'noankitma, azago menima Anumzamofo kumakuma neramasmumota, mago'enena nagri navugosafina onke'tfa hugahaze. 26 E'ina hu'negu, meni nagra huama hu'na neramasmue, miko vahe'mofo koran kumimo'a nagritera ome'tfa hugahie. 27 Na'ankure Anumzamofo miko avesi'zama'a nagra korera osu'na hu'ama hu'na neramasmue. 28 Tamagratmia kegva nehutma, lama afu kevua kegva hiho, Ruotge Avamu'mo tamazeri antegetma kva hu'naze. Agrama magoke Mofavre ama huntegeno koranteti'ma mizama ase'nea Anumzamofo mono nagara zamazeri fatgo hutma kavagri zamantegahaze. 29 Nagrama tamatrena vanugeno'a amefiga, nagra antahi'noankino, mago'a afi' kra esaniazamo lama afu kevua zamazeri savri hugahie. 30 Kagri ka'a nagapinti enena vahe'mo'a otino tamage kea eri ruvahe hu'za rempi hunezmi'za, Jisasima amage' nentaza disaipol nagara zamagrarega zamavrenteku hugahaze. 31 E'ina hu'negu tamavura omase kava hute maniho, tamagesama antahi ankeresazana tagufa zagegfumofo agu'afina hanine zgenena ontagane'na kazigzi hu'na zavira nete'na, mago'mago'moka kavumarora ante'noe. 32 Hagi menina nagra Anumzante'ene, Agri asunku'zamofo kere maniho hu'na huneramantoe. Ama kemo'a tamazeri hanave netina, ruotage'ma hu'za mani'naza nagapi tamagra erisanti haregahaze. 33 Mago'moka silvaguro, Goliguro, kukenagu nagra kenasane nehu'na keaga nosue. 34 Tamagratmi ko antahita keta hu'naze, ina zanku'ma nagri'ene, magoka vano nehuna naga'enema atupa'ma nehunazana, ama anazamo erifore huno neramie. 35 Ana mika zampina nagra ko hugaveri'noe, anahu'ma hunka hanavetinka eri'zama erisanana, hanave'a omane vahera aza nehunka, Ramofo Jisasinkere kagesa antahio, Agra'a anage hu'ne, ami'zamofo asomumo'a, eri'zamofona agatere'ne hu'ne.

36 Poli'ma ana nanekema huvama nereno'a, agra renareno zamagrane nunamu hu'ne. 37 Anampina zamagra tusi zavi'ateza Polina anankempi azeri anuki'za antako hu'naze. 38 Kema huno mago'ene onagegahaze hu'nea kegura, tusi zamasunku hu'naze. Nehu'za ventema me'nerega avare'za vu'naze.