1 Ana amefiga'a, Poli'a Anten kumara atreno Korinti vu'ne. 2 Anantega mago Jiu ne' ome keno erifore hu'neana, Pontusi kasente'naza ne' agi'a Akuila'e, mensin'tfa nenaro Prisila ene Italiti ena'e. Na'ankure Sisa Klaodiasi'a mika Jiu vahe'ma Romu nemani'za vahera atretma viho huno huzmantegeno Poli'a zanagri ome zanage'ne. 3 Na'ankure agrama mago'zahu eri'zama e'nerigu huno magopi zanagri'ene mani'neno eri'zana eri'ne, (na'ankure zamagra mago kna eri'za antahine'za nofiteti seli no nehatiza nagare). 4 Nehuno mika mni fruhu kna (Sabat) zupa atru nehu'za mono nehaza osi mono nompi, marerino mono naneke huno, Jiu vahe'ene Griki vahera masevenke huno zamarimpa eri vakaneno zamasmi'ne.

5 Masedoniati Sailasi'ene Timotike eramike akeno, Poli'a agafa huno mika Jiu vahera zamazeri atru huno mono kege'za maka kna nezamasmino, Jisasi'a, Agra'a tazahuno taguvazi nere huno eriama huno zamasmi'ne. 6 Ana nehigezama ha'ma rente'za krunagema huntaza vahera anakre ku'a (saket) zafino kugusopa rupopo nehuno anage huno zamasmi'ne, tamagri kora kumimo'a tamagritami tamasenire megahie! Nagripina mago knazani'a omane'tfa hugahie. Amareti agafa huno vaniana, Jiu vahe'rompage megi'a vahete vugahue. 7 Huno nezamasmino Poli'a anante osi mono nontetira atreno, mago megi'a nera agi'a Taitus Jastusi'e nehaza ne'mo, Anumzante mono hunentea ne'mofo nontega atru nehu'za mono nehaza nomofo asopare me'negeno vu'ne. 8 Atru nehu'za mono nehaza nonte kegva nehia nera (presitent) Krispusi'e nehaza ne'ene, mika agri kvafi nemaniza vahe'mo'za Ramofonte zamentinti hu'naze. Ana nanekema nentahi'za, rama'a Korinti vahe'mo'za zamentinti hu'za mono ti fre'naze. 9 Ramo'a kerage ava'nagna zampi anage huno Polina asami'ne, korera osuo, keaga huvava nehunka, keagama hu'zana azeoritfa huo. 10  Na'ankure Nagra kagrane manigahuankino, kahe frikura mago'mo'a kagri kavufarera azana onte'tfa hugahie, na'ankure ama'na rankumapina Nagri vahera rama'a mani'naze, nehigeno ke'ne. 11 Higeno anampina mago kafugi sigisi'a ika mani'neno, ana vahera Anumzamofo keaga rempi huzami'ne.

12 Kalio'ma, ugagota ra kvama (Gavana) Akaea kumatema mani'nege'za, Jiu vahe'mo'za oti'za mago antahintahi eri retro hu'za, avare'za ke refakohu trate (koti nonte) vu'za, 13 anage hu'naze, ama ne'mo'a ruzahu huno tagri tra kemo'a osu'nea kante, vahekura mono antahiho huno nezmasmie nehazageno, 14 Poli'ma agi'reaka hu'na ke hanuanki huno higeno, Kalio'a amanage huno Jiu vahera zamasmi'ne, mago'a hazenke zankuro, tusi'a havi kefo zanku Jiu vahe'motmama hanazana, knare hanige'na, nagra tamagri kerera hagerfigahue. 15 Hianagi amama hunentaza kemo'a tamagra kegu'ene tamagigu'ene, tamagratmi kasege eri hankave netizanki tamagratmi erifatgo hiho. Nagrira nave'osigu ama'na naneke'a erifatgo osugahue. 16 Anante kema refakohu tratetira agra'a zamahe natitrene. 17 Anante mika'mo'za mono nonte kva nehia ne' Sosteni azeri'za kema refkohu tramofo avuga agafa hu'za hae'naze. Ana hu'nazanagi Galio'a ana zankura agesa ontahi'ne.

18 Mago'a rama'a knama Korinti kumate Poli'a maniteno'a, afuhe'mokizmia hufru huno mani'neho hunezmanteno, votifi hageri tkaheno Siria nevigeke Prisila'ene Akuilake agrane vu'na'e. Na'ankure Anumzamofo avure'ma huvempama hu'negu, Sensarea kumate Poli'a anuzokara vagateno erivo'vo hu'ne. 19 Efesasi uhanatite'za, anante Poli'a Prisila'ne, Akuilagizni'a ome nezanetreno, agra osi mono nompi umarerino, Jiu vahe'ene naneke hugantugma hu'za antahi'naze. 20 Antahige'za za'zakna tagrane manisane nehazageno, knarere huno osu'ne. 21 Hianagi hufru hunezmanteno anage hu'ne, Anumzamofo avesi'zama me'nenige'na, ete'na tamagritega egahue. Anage nehuno Efesasiti'ma votifi,

22 vuno Saeseria unehanatino, Jerusalem umarerino mono vahera musenke hunezmanteno, anantetira Antioku urami'ne. 23 Antioku'ma mago'a knama maniteno, ana kumara atreno mago'mago kumate Galasiane Fezianena vano huno Jisasi amage nentaza disaipol nagara zamazeri hampo'na hu'ne.

24 Mago Jiu nera, agi'a Apolosi'e, Aleksandria kumate kasente'naza nera, knare keaga nehuno avontafera antahi ankere'nea ne'mo Efesasi e'ne. 25 Agri'ma Ramofo Jisasi kanku rempi humizageno, hampo'natino huzmenerino keaga nehuno, Joni'ma tima frezmante'nea zantfa antahi'neanagi, Jisasi avu'ava'mofo nanekea fatgo huno huzamasmi'ne. 26 Agra korora osuno, agafa huno osi mono nompina hu'ama huno mono nompina keaga hu'neanagi, zanagrama agri kema nentahikea, Prisilake, Akuilakea avareke va'azamoke Anumzamofo avu'avara mago'ene huhagro huke fatgo kante asami'na'e. 27 Akaea vuku Apolosi'a nentahige'za, mono (kristen) naga'mo'za azeri hanavetike nesamiza huso'e sa'e hunente'za, Jisasi amage nentaza disaipol nagatega azeri so'e hiho hu'za avonkretrenaze. Anante'ma unehanatino'a, Anumzamofo asunku'zamo zamaza hige'za zamentinti nehaza nagara tusi'a zampi zamaza hu'ne. 28 Na'ankure agra hampo'natino Jiu vahera zamazeri hagro huno, mika vahe zamufi avontafepinti eriama huno Jisasi'a Tazahu Nere (Kraisi'e) hu'ne.