1 Sisaria kumatera mago nera Koniliasi'e nehaza ne'mo, Italie hu'za nehaza 100ti'a Roma Sondia vahete ugagota kva nera, 2 megi'a nagapinti monoku agesa nentahino, noma'afi nemaniza naga'ane, Anumzamofo kore hunenteno, zamunte omane vahera ne'zane, kukena muse huno nezamino, Anumzantega nunamuna huvava nehia nere. 3 Mago kinaga ferura 3 kilokinaza higeno, agra kefatgo huno ava'nagna'za kegeno, Anumzamofo ankeromo efreno anage hu'ne, Koniliasio! higeno, 4 tusi kore huno uruha negeno anage hu'ne, Ramoka, na'ahie. Higeno agra anage huno asami'ne, nunamu ka'ane, zamunte omane vahe'ma zamaza nehana kavukvara Anumzamo'a ko antahino keno hu'ne. 5 Menina mago'a vahera huzamantege'za Saimoni'e nehu'za, mago agi'a Pita'e hu'za nehaza netega Jopa vu'za ome kehinkeno eno. 6 Mago nera Saimoni'e hu'za nehaza nera, afu akruteti hanave'za tro nehia ne'mo, hageri ankenare noma'a me'nefi anampi Pita'a mani'ne. 7 Kema humia ankeroma atreno vigeno, agrite eri'za erinenta'a netre'ne, mago sondia ne'mo monoku agesa antahintahi nehuno agri tvaonte nemni'a ne' ene kehige'za e'naze. 8 Mika kema zamasmiteno huzmantege'za, Jopa vu'naze.

9 Anante kna zupa kantega vu'za ranku'ma tvaonte'ma vzageno'a zgemo'ma feru asegeno, Pita'a no agofetu nunamu hunaku mareri'ne. 10 Huteno aga'zamo higeno ne'za nenaku nehige'za ne'zama retroma nehazageno'a, avu evuevu higeno nemaseno ava'na keankna huno, 11 kegeno monamo'a hagaro higeno, mago'zana, tusi'a tavarave'gnaza 4'a atupare atupare azerino mopafi atrageno erami'ne. 12 Anampina ruzahu ruzahu 4'a agazane zgarmi'ne, ama mopafi zge havu nehia zgane, zahopi hareno vono nehia nama zgagi hu'za mani'naze. 13 Anama higeno'a mago ageru'mo agrite eno Pitaga, otinka ahenka no! 14 Anage hianagi Pita'a huno i'o Ramoka, na'ankure nagra magore hu'na onetfa hu'noe. Vahe'mo'zama nonaza kfane, avusese osuno ruotage osu'nea zgagfa onegahue. 15 Higeno mago'ene eteno ana ageru'mo agrite eno, ina kna'zama Anumzamo'ma azeri avusese hu'nesia zankura, avusese osu'ne hunka osuo. 16 Anahu'zana 3'a zupa fore hutegeno, anazana ame huno erino monafinka mreri'ne.

17 Pita'a agu'afi nentahino, nazafore hige'na koeha huno agesa omeantahi emeantahi nehigeno, Koniliasi'ma huzmantege'za aza nagamo'za Saimoni nonku zamantahigeke hu'za, kegina kafante eme oti'ne'za, 18 kezati'za Saimoniku mago'agi'a Pita'ema hu'za nehaza agine nera amifina mani'neo hu'za zamantahige'naze. 19 Ava'na kna'zama ke'nea zanku Pita'a agesa nentahigeno, Avamu'mo asami'no, Ko, 3'a nagamo'za kagriku nehakaze. 20 Hianagi kagesa ontahinka otinka uraminka zamagrane vuo, na'ankure Nagra hu'zmantoge'za e'naze. 21 Pita'a ana nagate uramino anage huno zamasmi'ne, antahiho, ama nagritfanku nehakraze, nagafare tamagra e'naze? 22 Hige'za zamagra anage hu'naze, mago sondia vahe kva nera, Koniliasi'e megi'a ne'mo fatgo huno Anumzamofonku kore nehia nekino, mika Jiu vahe krerafamo knare nere hu'za nehaza ne'mofo Ruotge hu'nea ankeromo asamigeno, kagriku noniarega eno keaga eme nasminkena antahineno huno hurantegeta e'none. 23 Higeno Pita'a zamarenompi zamantege'za masete'za, ko ati'geno otino zamagrane nevige'za Jopatira ruga'a zamentinti nehaza afuhe'za agrane vu'naze. 24 Hute'za anante knazupa, Sisaria uhanati'naze. Koniliasi'a egahaze nehuno, naga'ane tragoteno nemania knampa'aramina kehutru hu'ne. 25 Pita'a noma'afi e'fregeno'a, Koniliasi'a negeno, agafi rena omereno mono hunte'ne. 26 Pita'a avazuhu o'netino anage hu'ne, Otio! Nagra amama hanaza hu'na vahetfa mni'noe. 27 Nehuno agranema keaga hume nevu'ne, nompima ufreno omegeana rama'a vahe krerafa atru hu'za mani'naze. 28 Pita'a omenezmageno amanage huno zamasmi'ne, Tamagratmi ko kasegea antahitma ketma hu'naze, megi'a vahepinti mago'mo'a Jiu vahe'ene tragotezano, nantuma antente zakuma i'o hu'za hampo'na kasegema ante'nazana antahi'nazanagi, Anumzamo'a naverino, mago'mofonkura haviza hu'ne huge, avusese osu'ne hu'na osugahue. 29 E'ina hu'negu nagriku'ma kema hu'nana ke antahina e'noana, ke huhaviza hurmantezani'a omane'ne, higena nagra kantahinegoe, na'amofo agafare nagrikura huzmantanke'za vu'naze? Huno antahigegeno, 30 Koneliasi'a kenona'a anage hu'ne, 4'a knama evia knafina noni'afi mani'nena, amanahu knare tri kilokia nunamu nehu'na, koana ame huno mago nera msa'nentake kukena hu'nea ne'mo navuga eme o'netino, 31 anage hu'ne, Koniliasiga nunamu nehunka, zamunte omane vahe'ma zamaza nehana kavukvara Anumzamo'a ko antahino keno hu'ne. 32 E'izanku vahera huzmantege'za Jopa vu'za Saimoninku, mago'agi'a Pita'e hu'za nehaza nera ke humisageno eno. Zgagfa akruteti hampo'naza tro nehia nera, Saimoni'e nehia ne'mofo nompi hageri ankenare mani'ne. 33 Hige'na avega ontena ko huzmantoge'za kagritega vazagenka knare'za hunka e'nane. E'inahu'ma hu'negu menina, mika'mota Anumzamofo avurera emeritru hu'none. Ramo'ma tagriku'ma ome zamasmio huno hugantegenka e'nana nanekea tasmio.

34 Higeno Pita'a amanage hu'ne, tamagerafa hu'na menina antahue, Anumzamo'a rukna rukna huno vahera zamesi nozmanteanki, magoke avamente avesinezmante. 35 Hianagi mika kotegati vahe'mo'za (nation) Agri'ma koro hunte'za, fatgoma hu'neazama nehaza vahera, Agra avesi nezmanteno, Agrarega zamarenente. 36 Nagra antah'inoe, tamagra ko knare musenkema Israeli vahe'ma zamasmi'neana antahi'naze. Anumzamofo rimpa fruzana Jisasi Kraisimpi efore hu'ne, Agra mika zamofo Rane. 37 Tamagratmi ko antahita ketma hu'naze, Judia kokampi Galiliti erigafa hu'ne, henka Joni'a mono tima frenezmante kea huama hu'ne. 38 Tamagra ko antahi'naze Nazareti Jisasina inankna huno Anumzamo'a Ruotge Avamuteti'ene hanave areti'ene huhamprinte'ne. Ana higeno Jisasi'a vano huno knare hunezmanteno, Sata'ma knama nezmia vahera zamazeri so'e huzmante'ne, na'ankure Anumzamo'a Agrane mani'negeno ana hu'ne. 39 Tagra mika'zama Judia mopafine Jerusalema hiazama tvuma keta antahita hu'nona vahere. Zamagra anazanke hu'za avare'za keka zafare hantite'za ahe fri'naze. 40 Hu'neanagi ama ana Nera, Anumzamo'a taregi magoki knazupa azeri otino, azeri anteama hu'ne. 41 Mika vahe'mo'za onke'nazanagi, tagra ke'none, Anumzamo ko'ma huhampri tante'nea vahe'mota ke'none, Agrama fripinti'ma otigeta, ne'zane tinema ne'nona vahere. 42 Mono kea vahera ome zamasmiho huno huhanavetino huranteno, kore ke huzmanteta, Anumzamo azeri antesga huno fri vahete'ene mani vahetera keaga Jisasi'ke refko huzmantegahie. 43 Agrikura korapa mika kasnampa (profeti) vahe'mo'za kea hunte'za, miko'mo'ma Agri agire'ma amentinti hanimofona, kumi'a atrentegahie hu'naze.

44 Pita'ma ana naneke nehigeno'a, Ruotge Avamu'mo ana mika nanekema nentahiza vahete e'ramine. 45 Hige'za zamufama tagahu'nea vahe'pinti zamentintima nehaza vahe'ma Pita'enema e'naza vahe'mo'za, megi'a vahete'enena Ruotge Avamu'mofo muse zamo'a herafiramie hu'za tusi antari nehu'za rama'a antahintahi hu'naze. 46 Na'ankure zamagra nentahizage'za, ruzahu ruzahu zamagerupinti Anumzamofo muse hunte'za Agi'a hesga hu'naze. Anante Pita'a huama huno, 47 tamagerafa huno, magomo'a timpima vahe'mo'ma mono tima fre'zankura i'o osugahie. Menima Ruotge Avamu'ma tagra erunakna hu'za eri'nazankita, mono tima frezamante zampina iza i'o hurantegahie? 48 Anante Jisas Kraisi agire mono ti freho huno hampo'nanentake ke zamasmi'ne. Mago'agna tagrane manitenka, vugahane hu'za agrira antahige'naze.