1 Stiveni'ma ahe friza zankura Solina rimpamo'a so'e hu'ne. Jerusale kumapina mono vahe'ma zamahe'zamo'a tusiza huno ana knarera avitege'za, maka vahe zgamo'za panini hu'za fre'za Judia kaziga nevazage'za, Samaria kaziga nevzage'za aposol vahe'age mani'naze. 2 Knare hu'za fatgoma hu'naza vahe'amo'za Stiveni asenente'za, tusi zamasunku hu'za zavike agriku hu'naze. 3 Hianagi Soli'a, mono vahe zamazeri haviza nehuno, mago'mago nompina vuno eno huno vene'nene, a'nene zamazuhu zmavazu hu megi nezmatreno zamavreno kina ome huzmante'ne.

4 Anante e'ima zamahe pananima hige'za fre'naza vahe'mo'za, maka kumate kumate vutere hu'za mono kea hu'naze. 5 Filipi'a, Sameria rankumate viazamo, Kraisinku zamagrite huama ome hu'ne. 6 Filipi'ma hia nanekema tusi'a vahe'mo'za nentahiza, avame'zama hiazante'ma nege'za nentahiza, magoke antahintahire mika vahe krerafamo'za zamagesa ante'za antahi'naze. 7 Na'ankure havi avamu'tamima zamagu'afima mani'naza vahe'pintira, havi avamutmimo'a tusi'a kezati'za krafa nehu'za atirami'naze. Hagi mika zamufa fri'nea vahe'ene, kama vano nosaza vahera kri zamimo'a knare huzmante'ne. 8 Higeno ana rankumapina tusi'a museza fore hu'ne.

9 Ana rankumatera, Saimoni'e nehaza ne'mo, afa' vahe'mofo avu'ava'za eri fore huvava nehia nera mani'neakino, Sameria vahera huzamerige'za tusi'a zamagogogu nehu'za antri nehageno, agra ra ne' mani'noe huno hu'ne. 10 Ositetima vuno rante'ma vu'nea vahe'mo'za, ke'ankere'za nege'za ana mika vahe'mo'za agri ke nentahi'za anage hu'naze, Ama nera, Ra Anumzamofo hanavegino, tusi'a hanave hu'za hu'naze. 11 Hige'za agri ke'are antahi'za amage hu'naze. Na'ankure agrama zaza knafi havige nehuno, zagoreno eri fore hu'neazanku ana hu'naze. 12 Ana hu'nazanagi Anumzamofo kumamofo avu'avaku'ene, Jisas Kraisi agire knare musenkema Filipi huama nehige'za zamentintima nehu'za, vene'nene, a'nemo'zanena erigafa hu'za monoti fre'naze. 13 Saimoni'enena amentinti nehuno henka mono tina nefreno eteno ovu'are Filipi'ene mani'ne. Hagi mika ruzahu zane ra avame'zama hiaza fore higeno negeno tusi agogogu nehuno antri hu'ne.

14 Jerusale mani'naza aposol vahe'mo'za antahizama Samaria vahe'mo'za Anumzamofo naneke erize kema nentahi'za, Pitane Joni kizni huznante'naze. 15 Zanagrama uramina'ana nunamu huzmante'sake'za Ruotge Avamu'ma erisnagu urami'na'e. 16 Na'ankure mago mago'mofontera Ruotge Avamumo ome'nege'za, ko Ramofo Jisasi agire mono tinke fre'naze. 17 Anante Pita'ene Jonikea agafa huke zanazama ana Sameria vahe'mokizmi zamufare antake'za Ruotge Avamura eri'naze. 18 Hianagi Saimoni'ma kegeno Aposol vahe tfamo'zama zamazatfama antaza zante'ma Ruotge Avamu'ma zamigeno'a, agra zagoma zanamikema nehuno'a, 19 anage hu'ne, amana hanave'a nagri'enena nami'nenkena ina vahe'tema nazama antesugeza anahu'za Ruotge Avamura eriho. 20 Hianagi Pita'a, agrikura anage hu'ne, zago ka'ane kagranena haviza hugahie. Na'ankure kagrama kagesama antahinana zagoreti Anumzamofo muse'zana miza hugahue hunka nehane. 21 Kagrira ama erizampina mago erizanka'a omanetfa hu'ne. Na'ankure Anumzamofo avurera, tumoka'amo'a knarera osu'tfa hu'ne. 22 E'i zanku kefo kavukva zanka'a neterenka, kagu'a rukarehe hunka havizama nehana zana atrenka, Ramofonte nunamu nehugeno, kagu'amo'a knarema hanigeno'a kumi ka'a atregantegahie. 23 Na'ankure nagrama navuma kagoana, kagra kanive nerenka, kumi'mo kegina hugantegenka mani'nane, huno Pita'a higeno, 24 Saimoni'a ke nona anage hu'ne, nagrikura, tanagra Ramofontega nunamuna hikeno, kema hu'na'a zamo'a nagritera ometfa hino hu'ne.

25 Anante'ma Pita'ene Jonikema hamponatine, Ramofo nanekema huama'ma hutekea, ete Jerusale vunaku nevuke, Sameria vahe'mokizmi nonkumapi mono naneke hume vuna'e.

26 Anante mago Ramofo ankeromo Filipina asamino, Sameriatira otinka Jerusale kaziga Gaza urami'nea kantega kavugosa huntenka vuo. E'i, hagage ka'ma kopi vuo huno asamigeno, 27 nevigeno magora agonkna'za hari'nea Itiopia nera, kantesi'e nehaza Itiopia kuini a'mofo zagore kegavama hu'nea ne'mo, Jerusale mono eme huteno eteno kuma'arega nevigeno, 28 hosimo renteno avazu huno vano nehia karisifi manino nevuno, kasnampa ne' Aisaia krente'nea avontafera hamprime nevigeno, 29 Avamumo'a Filipina asami'no, vunka antuma hosimo renteno avazuma hu'nea karisire urava'o huo higeno, 30 Filipi'a agiareno agrite viazamo ome antahiana, Aisaia kasnampa ne'mofo naneke nehamprigeno nentahino, amama nehamprina nanekea, kagra antahiama nehano? Huno antahige'geno, 31 Agra huno mago'mo'ma huonasamisigena, inankna hu'na antahi amara hugahue? Nehuno Filipina ke higeno umarerino agrane umani'ne. 32 Ana ne'mo'ma hampri'nea avontafemo'a, amanahu ke hu'ne, Sipisipi afu'ma ananke taga hunaku avare'za nevazankna hu'za nevu'za, sipisipi afu anenta azoka taga hunaku nehazageno, agira aka huno krafa osu'nea kna huno, Agra agira aka osu'ne. 33  Agrira azeri agaze hu'za knare fatgo zamuzmara huonte'naze. Na'ankure ko'ma Agri asimura ama mopafintira eri'nazana, nankna huno Agra mofavre antegahie? (Aisa 53:7-8) 34 Anante ke'nonama hifina, agonkna'zama hari'nea ne'mo'a anage huno, Filipinkura hu'ne, muse hugantoanki (plis) azanku kasnampa ne'mo'a ama kea hu'ne, agri'agu hu'nefi, hipi ruga'a vaheku hu'ne? 35 Filipi'a anama hampri'nea avontafepinti nanekea agafa huno, Jisasi knare musenkea ana nera asmi'ne. 36 Anama hu'za karankama nevu'za mago'a ti me'nere ageno, agonkna'zama hari'nea ne'mo'a, Keho! Ti me'neaki! Na'amo mono tima frezanifina nazerigahie? huno nehigeno, 37 [Filipi amanage huno hu'ne, tamage hunka maka kagu'areti Jisasinku kmentinti hanunka tina fregahane nehigeno ozo hu'ne. Anumzamofo nemofo Jisasi Kraisi'a mani'ne, hu'na nentahue, huno hu'ne,] * 37 Mago'a antahintahi krerfane vahemo'za zamagesama antahi'zana, ese avontafepina teti sevenifima me'nea kea omnene hu'za onkre'naze. 38 ana hosimo renteno avazu nehia karisia ana ne'mo kehigeno azerigeno, anantarega'moke uramike tinte vuke, Filipi'a agonkna'za hari'nea nera mono tina tigua repanogino frente'ne. 39 Anama huteke timpinti'ma megi'a akeno'a, Ramofo Avamumo Filipina avaresga huno vigeno, agonkna'zama hari'nea ne'mo'a mago'ane nonkeno, tusi muse hume karanka vu'ne. 40 Hianagi Filipi'a Azotasi kumate mani'neno nankna hu'na e'noeha huno agra'a keno erifore hu'ne. Ana kazigama nevuno'a mika ranra kumatera mono kea hutere hume nevuno Sisaria kumate uhanati'ne.