1 Mago zupa, Pita'ene Jonikea, ra mono nontega nunamuhu knare, mago kiniga 3 kiloki higeke marerike nevakeno, 2 mago nera, nerera agu'afinti agia frinea ksente'nea nera zafa hu'za vazaza'mo'za ra mono nomofo kasana, knare so'e kasane hu'za agia nehare ome ante'naze. Mika zupa anante ome ante'nageno mani'neno, mono nompima umreriza vahekura, azama hanagu meme nehiane. 3 Ana nemo'a znagege'ne Pita'ene Jonikea ra mono nompi umreri'snuanki nehakeno, ana ne'mo'a zgogu znantahige'ne. 4 Hianagi Pitake Jonikea avufi kefatago huke negeke, kma tagrira tago! Huno Pita'a hu'ne. 5 Higeno, ana ne'mo mago'a zana zanagritegati erigahue huno agu'agesa antahi'ne. 6 Hianagi Pita'a anage hu'ne, silvane, kolinena e'ori'noanki, nagrama eri'noazana kamigahue. Jisas Kraisi Nazareti ne'mofo agifi, otinka vuo! 7 Nehuno Pita'a azantmaga'a ana nera azerino azerioti'ne. Anama nehigeno'a ame' huno agia avozamo'ene, agia avu'a zaferinamo'a hanaveti'ne. 8 Higeno agra haru huno marerino tamino nehuno, agia reno vu'ne. Pita'ene Joni'ene magoka ra mono'nompi nevuno, haru huno marerino tamino huno nevuno, musenkase huno Anumzamofo agi erisaga hu'ne. 9 Ana hige'za miko vahe'mo'za negageno nevuno, Anumzamofo agia hesga hu'ne, 10 hige'za mika vahe'mo'za nege'za, ra mono (tempol) nomofo knare so'e kasante mani'neno zagogu meme nehia ne'mo amanahura nehianagi, nankna hu'neha hu'za tusi'a antri nehu'za zamagogogu hu'naze.

11 Pitane Joni kizni ana ne'mo zanazeri'negeke, mika vahe krerfamo'za magoka zamagare'za zamagritega Solomonine hu'za humegi atre'naza nompi, vano nehaza kante tusi zamagogogu nehu'za e'naze. 12 Hianagi anama hazaza Pita'a negeno, anage huno ana vahe'zga zamasmi'ne, Israeli vahe'motma nahigeta amanahu zankura antri nehutma, tamagogogura nehuta, tagrira uruhara neragaze? Tagritia hanaveretiro, Anumzamofo avu'ava hu'azamo azeri otigeno kana vifi? I'o, 13 Abrahamune, Aisakine, Jekopu Anumzana tafahe'i Anumzamo kesga nehia eri'za Ne'a Jisasina, Paeroti atrenigeno vunaku nehigeta, tamagra ma azeritma ha' vahe azampi ahenogu nenteta, Paeroti ne'mofo avufi tamefi humi'naze. 14 Hianagi tamagra fatgo huno ruotge hu'nea Nera, tamefi humitma vahe'ma ahenefria neku avare atreho, hazage'za avare'za tamami'naze. 15 Hagi tamagra Asimu'mofo agafa ahe fri'nazanagi, Anumzamo azerioti nemofo, tagra tamage huta tavufinti ke'no'a zanku nehu'e. 16 Hagi Jisasi, Agri agire tamentinti hu'azamo, e'i ama ana agimo amama negaza nera azeri knare hu'ne. Hagi Jisasinte amentinti hu'nea zamo, mika vahe'moka kavufina agrira azeri so'e hu'ne.

17 Menina nafuhete, nagra tamantahi'noe, ontahinetma Jisasima tamavutamavama hunte'nazana, kva tamimo'za nehazankna hutma ontahi'netma hu'naze. 18 Hagi korapa Anumzamo'a, Kasnampa vahepima runtaninoma, Kraisia ata hoza erigahie hu'noma hunte'neazamo, ana kante efore hu'ne. 19 E'i zanku, kasunku hunka kagu'a rukarehe hunka, Anumzamofonte egeno, kumika'a eri atregantegahie. 20 Ana knafi Rantimofo avateti kahefa hanave ne'e sigeno, hagi ko'ma Agra'ma huramante'nea nera Kraisina huntesigeno egahie. E'i Jisasi'e. 21 Ama ana Nera monamo avare'anagamu tenesigeno umani'nenigeno, Anumzamo'a mika zana azeri kasefa hugahie, Anumzamo ko' huama hu'ne, korapa knafima ruotge kasnampa vahe'mofo zamagipi huvempa hu'naze. 22 Mosese'a huno, Ra Anumzamo'a kasnampa nera nagrikna huno tamagri nagapinti azeri otigahie. Agrama na'ane kema haniana, ke'a erizafa hunka amage anto. 23  Mika vahe'mo'za ana kasnampa ne'mofo kema ontahisnamo'kizmia, zamahe nefrino, vahe'afintira zamahenati tregahie. 24 Anahu kante maka Samuelinteti'ma eno erami'naza kasnampa vahe'moza, ke nehu'za huama hu'nazana, ama knagu hu'naze. (Diu-Kas 18:15-19) 25 Tamagra kasnampa vahe'mokizmi mofavre, Anumzamo'ma tmafahe'zanema huvempa huno huhagerafinea kemofo mofavre mani'naze, Abrahamunku'ma huno, Kagri ka'a mofavrefinti, hakare kogna, famomo'a ama mopafina asomura erigahaze hu'ne. (Jen-Agf 22:18) 26 Na'ankure Anumzamo'a pusante eri'za Ne'a azeri otigeno tagrite e'ne, havi zampintira magoke magoke'mota, tazeri rukarahe huno asomu hurante'ne.