1 Hianagi kagra Timotiga antahi ani' huo, mona mopa vgaresia knama upa'ma hanigeno'a, tusi'a knaza fore hugahie. 2 Na'ankure ana knama fore hanige'za, vahe'mo'za zamagraguke zamagesa nentahi'za, zgogu zamesinente'za, zamagra zamufga ra nehu'za, vahe zamage henkami netre'za, urinkege nehu'za, zamarera zamafa naneke erizafa osu'za, vahera muse kea huozmante'za, agru hu'za omnigahaze. 3 Vaheku zamasunku osu'za, mago zamarimpa hu'za eri fatgo osu'za, vahe zamarimpa nere'za, vahe zamefiga'a ke nehu'za, manirva ohe'za, vahe zamata zamizanku'ke nehu'za, knare'zama hu'zankura zameosigahie. 4 Komoru (betray) hunezmante'za, vaheku antahiozmi'za, osu'naza zante havige hu'za zmavufga ra nehu'za, mopafi mani'zante zamesinente'za, Anumzama avesi antega kana atregahaze. 5 Zamagra Anumzamofo avu'avara amega zamufareti nehu'za, zamagra tusi'a hanave Anumzamofompi me'neana zamefi hunemize. E'inama nehaza vahera nezmatrenka mani rure hunka manio. 6 Na'ankure amu'no zamifina mago'a vahe'mo'za vahe nompi antagrige antagrige hu'za mreneri'za, zamagu'amo hanave otigeno kumipi kna zamisige'za mani'naza a'nemokizmi, kereti zamazeri havia hazage'za, naneke'zmi erizafa nehu'za zamavemanesia zante hakare'a havizana erifore nehaze. 7 Mika'zupa ana a'nea rempi huzamige'za netahizanagi, tamage nanekea antahi ama nosaze. 8 Janesi'ene Jambresikea korapara Mosesena ke ha'rentena'e, ana zanke hu'za rempi huzmi vahe'mo'za ke tamagemofona ha'renentaze. Antahintahi zamimo'a savri hige'za, zamentintimo'a haviza hu'ne. 9 Hu'neanagi zamagra magore hu'za tagateoregahaze. Maka vahe'mo'za kesazana antahintahi'zamimo'a neginagi hu'naze. Janesi'ene Jambresike negi nena'a kna hugahaze.

10 Timotiga rempi hunezmua kere nevaririne, nagri mani'zane, mago'za hunaku nagesa antahuane, namentinti huane, kfegfa osu'na ako nehena, navesi nezmante'na, knafi nemni'na anazanku osu kazigzi nehua zante nevaririne. 11 Nazanva ante'za nahe'zanasuza nehu'za, nataza nenami'za neganke'za Antioku kumate'ma hu'nazana, Ikonium kumate ene Listra kumate enema, nazanva hu'za nahe'za nasu'za nehzage'na kna zampina mse'na oti'na nehue. Ana hzanagi ana miko zampintira Ra Anumzamo nahokeheno nazeri natre'ne! 12 Tamage, aza'o Krais Jisasimpi hagerfino Anumzamofo avu'avate mani'naku hanimofona, vahe'mo'za knara zamante'za zamazeri haviza hugahaze. 13 Hianagi havi vahe'mo'zane krunage nehza vahemo'zanena, haviza nehaza zampintira agtere'za tusi'a havizampi ufregahaze. Vahe'ma rezmatga nehza'zantera, ana zanke hu'za zamagri'enena rezmatga hugahaze. 14 Ana hugahzanagi kagra, kazigzi hunka ko'ma rempima hunka antahinana kea azeri hanavetio. tagrama rempima hugami'nonazana kagra antahinka kenka hu'nane. 15 Osi'moka otage avon tafepima me'nea nanekea antahime enka e'nane, e'i ana nanekemo knare kagukagesa negamina kmentinti nehunka, Krais Jisasipinti kahokeno kagu'vazizana erigahane. 16 Anumzamo huzamasmige'za maka ruotage avontafepi me'nea nanekea kre'nazankino, huzmi'sanana knare azahuzana me'neankino zamazeri fatgo nehuno, kazaki'zana eri fatgo nehuno, huzmeri hanige'za fatgo avu'ava hu'zankuke zamagesa antahigahaze. 17 Na'ankure Anumzamofo vahe'mo'za atupa'ma hu'zankura ana nanekemo vite'zmante'nena, maka knare'za zamia erigahaze.