1 Hanki huvgare nanekea, nenafugata nunamu hunerantenkeno, tamagripima hu'neazana huno Ramofo nanekemo'a, maka kokantega ame huno vuno e'no nehina, ragi amiho. 2 Ana nehanageno, tagrira fatgo osu vahe'ene havi vahepintira tahokeno tavregahie. Na'ankure zmagra maka'mo'za zamentinti osu vahe mni'naze. 3 Hianagi Ramo'a hugahuema haniaza hu'nekino, havi avu'avazama hu ne'moma tamazeri haviza huzankura kegva huramantegahie. 4 Tagra, tamagrikura hugahaze huta Ramofompina antahineramunankita, tamagrama nehazazana mago'ene nehutma, hihoma hutama huramante'nonazana hugahaze. 5 Ramo'a tamagrira Anumzamofo avesizana tamagu'afina eriama nehina, Kraisi'ma hu'neaza hutma kazigazi hutma vugahaze.

6 Menina nenafugata anage huta hanave kea neramasamune, Ranti Jisasi Kraisi agifina, erizama eri naneke rempima hunezamunke'za novaririza, feru nemaniza tafuhe'ina zmatretma ogantu maniho. 7 Na'ankure tamagra antahinaze, tagrama rempima hurami'nona avu'avazamofo negetma avaririho. Na'ankure tagra amu'nontamifima tavesrama osu, 8 magomofo bretia amanea erita o'nenonanki mizaseta neneta, tamagrima knama tamizankura maraguzatita hanine zgenena erizana e'nerune. 9 Hianagi tagra mago'a neza taminageta e'rinakura nosunanagi, tagra knare tavutavama huza tamaveri hanunketma, tamagra ana tavu'tavaza avaririhogu nehune. 10 Na'ankure tamagranema manineta, amanahu avu'avaza hugahaze huta hanave kea tamasami'none. Mago vahe'mo'ma erizama e'orinakuma hania vahe'mo'a, nezana onegahie. 11 Na'ankure tagrama antahunana amu'nontamifina mago'amo'za erizana e'noriza, vahe'mofo zanku zamagenke nehu'za, eriza e'ori feru vahe nemanize. 12 Menina e'inahu vahe'mofona, Ramofo Jisas Kraisimpina hanavege huta zmazeri hanave'netita, akohe'za mni'ne'za zamagrazmi zamazampinti erizana eri'za, nomanizazmia retro hu'za maniho huta nehune. 13 Hianagi tamagra nerafugata, knare tamavu'tmavama huzankura tamavesra osino huta nehune. 14 Iza'o ama avompima kre'nona kemofoma amagema ontesimofona, anamofona kenihunetma, agranena tragoteta omaninkeno agra agazegu hino. 15 Hugahianagi, ha vahetamignara anamofona huonteho, hianagi nerafuga haviza hunane hutma azeri fatgo hiho.

16 Menina rimpa fru Ramo, Agra'a maka knama hakare'zama hanafina, tamarimpa frua tamigahie. Ramo'a makamotane manisie. 17 Nagra'a Polina ama musenkea nazanko avona nentena, e'inahukna hu'na krenoankita kegahaze. 18 Rantimofo Jisasi Kraisi asunkuzamo'a makamotma tamagrane mesie.