1 Anumzamofo agihanta vazi'zana pusaza me'ne. Nunamu huta agihanta nevzita, tagrima tvesi'nia zanku antahinegeta, muse hunenteta, maka vahe zamagi erita zamaza hanigu antahige'snune, 2 Kini vaheku'ene maka kva krinerantaza vaheku'ene nunamu huzmante'sune, ana nehnunke'za kva huso'e nehnageta, agzone huta, fruzampi Anumza avu'avate ene fatgo mani'zampi so'e huta magoke'pi manigahune. 3 E'inahu zamo'a Anumza Tzahu ne'mofo (Savior) avufina knare nehigeno musena nehie. 4 Kefo zampinti tahoke he'nea ne'mo, maka vahemo'za tamage naneke antahi'za zamasimu erisazegu avenesie. 5 Na'ankure Anumzana magoke mani'ne. Anumzane, vahe'mota amu'nompina, anazanke huno amu'no nera magoke mani'ne, ana nera Krais Jisasi'e. 6 Tusi'a mizanteti Agra'a avufga atreteno, maka veara miza seranteno, Anumzamo huhampri ante'nea kna eri ama hu'ne. 7 Ana zanteku huno nagrira nazeri oti'ne, Anumzamofo mono naneke zamasmi'nena antahisnagu, nazeri oti'nea aposol ne'mo'na, nagra tamage nehue, havigea nosue. Zamufga tga osu vahe (gentiles) rempi huzminena zamentinti hu'za tamage nanekea antahihogu huama nehue.

8 E'ina hu'negu nagri'ma nave'nesiana hakare'a kumate vene'nemo'za, ruotage zamazana antesga hu'za nunamuna nehu'za, kevu hu'neza fra vazi'za ke hakare osiho.

9 Nagri'ma navesiana, anahu'kna a'nemo'za zamavasese hanafina hugahaze, kukena knare'za hu'za masigahaze, kukena hanazana vahe'mo'za kezmasane hu'zane, zamanu zamazoka hane'zane, kolire trohuntenaza avasase zane, hage rimpinti zane (pearl), marerisa kukena osiho. 10 Hu'neanagi Anumzamofo amage' nentonema hanaza a'nemo'za, knare avu'ava nehu'za, ana avu'avateti knare avasese hiaza hu'za hugahaze. 11 A'mo'a akohe'no rempi humisia ke erizafa nehuno, ke amage' anteno, agzone huno manigahie. 12 Hu'neanagi nagra a'nemo'za vene'ne rempi huzmi zankuro, kva mani'zankura navenosie, e'igu agzone hu'za mani'snaze. 13 Na'ankure koteno ve Adamu tro huteno, henka'a ara, Ivina tro hu'ne. 14 Adamuntera revatga zana fore osu'ne, hagi a'mofo revatga higeno, kumi'pina traka hu'ne. 15 Hu'neanagi a'nemo'za mofavrema kse nezmante'za, zamentinti nehu'za, ovesinte avesinte nehu'za, mani ruotage hu'za nemni'za, zamagu'ane zamagi'ene, kva hanaza zamo knare mani'za erigahaze.