Mo꞉fo꞉s we Fol eyo꞉
Taitus
emo꞉ sa꞉sa꞉liga꞉fo꞉.
To we tamina agelema
Mo꞉fo꞉s we Fol eyo꞉ Taitusbo꞉wo꞉ sa꞉sa꞉liga꞉fo꞉. Tamin amio꞉ Fol o꞉lia꞉ Taitus o꞉lia꞉ ha꞉na꞉sa꞉ga꞉, ho꞉na꞉lo꞉ hegefa꞉ hen nowo꞉ Kilit, a꞉la꞉yo꞉ a꞉na ane. A꞉la꞉yo꞉ to nafayo꞉ wida꞉sa꞉ga꞉, Fol e hen nowa ha꞉nakiyo꞉, Taitus e Kilit sa꞉s ho꞉giyo꞉ bo꞉fo꞉melea꞉ki, a꞉na ta꞉fo꞉. A꞉la꞉fo꞉ko꞉lo꞉ Fol eyo꞉ Taitusbo꞉wo꞉ asulo꞉ dimiakiyo꞉, Kilit sa꞉so꞉ halaido꞉ doma꞉ki, mo꞉fo꞉s we a꞉na sa꞉sa꞉liga꞉fo꞉.
Mo꞉fo꞉s sa꞉sa꞉lo꞉ us wenamio꞉ to ha꞉g nolo꞉ da꞉lab. Nowo꞉ Taitus eyo꞉ Keliso kaluka꞉isale ini mano꞉ dibebea꞉sa꞉ga꞉, sa꞉s misa꞉ kaluka꞉isaleyo꞉ da꞉fema꞉ki, Fol eyo꞉ wido꞉. Nowo꞉ Taitus e ko꞉go꞉do꞉ kaluka꞉isale o꞉lia꞉ kaluka꞉isale so꞉wa o꞉lia꞉ a꞉la꞉ta꞉ga꞉ madali nanogdo꞉ dian kaluka꞉isale imo꞉wo꞉ mano꞉ walama꞉ki, Fol eyo꞉ wido꞉. Nowo꞉ Kilit Keliso kaluka꞉isaleyo꞉ mano꞉ nafale dimidaki, nolbo꞉wo꞉ ha꞉fo꞉ disa꞉laki towa꞉yo꞉ mo꞉kegema꞉ki, Fol eyo꞉ to we a꞉na sa꞉sa꞉liga꞉fo꞉.
1
1 Ne Fol, Godeya꞉ ene nanog dian kalu nowo꞉ ne. Ya꞉su Kelisowa꞉lo꞉ iliga꞉felo꞉ kalu nowo꞉ ne. A꞉la꞉fo꞉ko꞉lo꞉ Godeya꞉lo꞉ da꞉fe alifelo꞉ kaluka꞉isale nolba꞉ tilidabu a꞉no꞉ ko꞉lo꞉ halale alitakiyo꞉, Godeya꞉ to man hendele a꞉no꞉ fanda asula꞉ melea꞉kiyo꞉, ne nanog a꞉na dimidama꞉ki da꞉feyo꞉. 2 A꞉la꞉go꞉ko꞉lo꞉ tilidabu a꞉no꞉lia꞉ asulo꞉ a꞉no꞉lia꞉yo꞉ dialikiyo꞉, iyo꞉ mela꞉no꞉ mela꞉no꞉ sagala꞉liki yasilima꞉ib. Mo꞉wo꞉ Gode e mo꞉dikili sa꞉lan ko꞉lo꞉ e taminde amio꞉ mela꞉no꞉ mela꞉no꞉wo꞉ dia꞉ib a꞉la꞉liki saefa꞉. 3 A꞉la꞉ saefa꞉ ko꞉lo꞉ ho꞉lendeyo꞉ fa꞉la꞉dowabiki, Godeya꞉yo꞉ ene to a꞉no꞉ kalaba fa꞉la꞉dowo꞉ alifa꞉. To a꞉no꞉ kalaba fa꞉la꞉doma꞉kiyo꞉, Gode nilo꞉ gasili a꞉ma꞉yo꞉ to a꞉no꞉ nolbo꞉wo꞉ walama꞉ki nemo꞉ dimi.
4 Taitus, na꞉no꞉ tilidabuwo꞉ imilig dowo꞉ ko꞉lo꞉, ge no꞉no꞉n so꞉wale dowabiki, niyo꞉ mo꞉fo꞉s we gemo꞉ sa꞉sa꞉liga꞉to꞉l. Kanulan mano꞉ a꞉la꞉ta꞉ga꞉ ha꞉sa dowan man a꞉no꞉ gi o꞉lia꞉ melea꞉ki, niyo꞉ Do Gode o꞉lia꞉ nilo꞉ a꞉ma꞉la꞉ gasili Ya꞉su Keliso o꞉lia꞉mo꞉wo꞉ dulugu sio꞉.
Sa꞉s amilo꞉ misa꞉ kaluwa꞉ man dibibiakilo꞉ da꞉feano꞉ we
5 Niyo꞉ ge Kilit ho꞉na꞉lo꞉ hegefa꞉ hen a꞉namilo꞉ ta꞉fo꞉wo꞉ mo꞉wo꞉ we. Nanogo꞉ mo꞉kedefo꞉ a꞉no꞉ gi dimidaki a꞉la꞉ta꞉ga꞉ Kilit amisa꞉no꞉ tambo amio꞉ nilo꞉ gemo꞉lo꞉ sio꞉ aumbo꞉, sa꞉s misa꞉ kaluwo꞉ da꞉fema꞉ki, a꞉na ta꞉fo꞉. 6 Giyo꞉ sa꞉s misa꞉ kaluwo꞉ da꞉fema꞉nikiyo꞉, kalu we o꞉ngo꞉ ko꞉lo꞉ da꞉fea꞉bi. Eyo꞉ man digalo꞉le kudu ha꞉naki, kalu nolba꞉yo꞉ e hala dimidab a꞉la꞉bo꞉ mo꞉asula꞉sen. E gayo꞉ imilig di. A꞉la꞉ta꞉ga꞉ kalu ene so꞉wagalin a꞉no꞉ Kelisowa tilida꞉da꞉sa꞉ga꞉, kaluka꞉isale siwa꞉l amio꞉ iyo꞉ mo꞉a꞉la꞉iyaki, iya o꞉lia꞉ ano o꞉lia꞉ma꞉ towo꞉ kudu ha꞉na꞉sen a꞉no꞉ ko꞉lo꞉ da꞉fea꞉bi. 7 Sa꞉sdo꞉ bo꞉fo꞉lowan kalu eyo꞉, Godeya꞉ nanog dimidama꞉kiyo꞉ ene ta꞉fo꞉ ko꞉lo꞉ da꞉feakiyo꞉, kalu we o꞉ngo꞉ ko꞉lo꞉ da꞉fea꞉bi. Eyo꞉ man digalo꞉le kudu ha꞉naki, kalu nolba꞉yo꞉ e hala dimidab a꞉la꞉bo꞉ mo꞉asula꞉sen. A꞉la꞉ta꞉ga꞉ e kalu alan a꞉lakiyo꞉, kaluka꞉isaleyo꞉ mo꞉wa꞉la꞉sa꞉ndan. E bo꞉ibo꞉ mo꞉gadian. E aluna꞉ ho꞉no꞉ modo꞉ nakiyo꞉, mo꞉no꞉nolan. A꞉la꞉ta꞉ga꞉ nol o꞉lia꞉yo꞉ mo꞉buban. E mole alan dia꞉no꞉wo꞉ mo꞉meselan.
8 Man o꞉leo꞉ngo꞉wo꞉ mo꞉dimidaki, e mageso꞉ kaluwo꞉ dinafa tilidowan. E man nafale dimidama꞉no꞉ asulan. E asulo꞉ nafalelo꞉ kudu ha꞉nan. Ene man digalo꞉le, Godeya꞉lo꞉ asulab a꞉no꞉lo꞉ kudu ha꞉na꞉sen. Ene asulo꞉wo꞉ dinafa tilidowan. 9 To hendele emo꞉lo꞉ wido꞉ a꞉no꞉, eyo꞉ dinafa halale ta꞉li silikiyo꞉, kaluka꞉isale nolba꞉ tilidabuwo꞉ halaido꞉ doma꞉ki man a꞉no꞉ widan. A꞉la꞉ta꞉ga꞉ Godeya꞉ tolo꞉ gola ba꞉da꞉sen kaluka꞉isale i a꞉no꞉ to we hendelelo꞉b a꞉la꞉bo꞉ fanda asuluma꞉ki, man a꞉no꞉ wida꞉sen.
10 Mo꞉wo꞉ Kilit sa꞉s us a꞉namio꞉, tolo꞉ saditan man o꞉lia꞉ madali tolo꞉ sa꞉lan man o꞉lia꞉ dikili sa꞉lan man o꞉lia꞉ a꞉no꞉ kaluka꞉isale modo꞉wo꞉ kudu ha꞉na꞉lab. A꞉la꞉ta꞉ga꞉ Yu Keliso kaluka꞉isale, Yuwa꞉ elelo꞉ o꞉kudu ha꞉nab a꞉no꞉lo꞉ man a꞉no꞉ alan dimida꞉lab. 11 Iliyo꞉ mole afale dia꞉no꞉ a꞉la꞉liki, nililo꞉ mo꞉dimidan man a꞉no꞉ wida꞉lab ko꞉lo꞉ kaluka꞉isale nol o꞉lia꞉ ini so꞉lo꞉ o꞉lia꞉yo꞉ asulo꞉wo꞉ no꞉nolo꞉ alitaki, ili tilidabuwo꞉ ta꞉tab. A꞉la꞉fo꞉ko꞉lo꞉ iliyo꞉ to man a꞉no꞉ wa꞉kabiyo꞉ widabena꞉ki ka꞉la꞉bi.
12 Tamin amio꞉ asulo꞉lo꞉ di kalu nowo꞉ Kilit hen a꞉na ilikiyo꞉, towo꞉ a꞉la꞉ sa꞉sa꞉lo꞉, “Kilit kaluka꞉isaleyo꞉ madali towo꞉ sa꞉la꞉sen. Iyo꞉ saila gasayo꞉ o꞉ngo꞉ dowa꞉sen. Iyo꞉ bo꞉sulakiyo꞉, ma꞉no꞉wo꞉ besagali na꞉sen.” 13-14 To we mada hendele sa꞉sa꞉lo꞉. A꞉la꞉fo꞉ko꞉lo꞉ kaluka꞉isale ili tilidabu a꞉no꞉ halaido꞉ doma꞉ki, a꞉la꞉ta꞉ga꞉ iliyo꞉ Yuwa꞉ kandayo꞉ malolab a꞉namida꞉yo꞉ mo꞉iligi dabuma꞉ki, a꞉la꞉ta꞉ga꞉ to hendelelo꞉ mo꞉kudu ha꞉nab kaluwa꞉lo꞉ ele difa꞉ a꞉no꞉, mo꞉kudu hamana꞉kiyo꞉, giyo꞉ halale sa꞉laki, i a꞉no꞉ digalaki wida꞉bi. 15 Kalu abeyo꞉ Godeya꞉ siwa꞉la amio꞉ asugo꞉ go꞉go꞉do꞉ a꞉lab a꞉no꞉, Godeya꞉ siwa꞉la amio꞉ kelego꞉ tambo nafale dowab. Ko꞉sega kalu abeyo꞉ Ya꞉suwo꞉ mo꞉tilida꞉dakilo꞉, asulo꞉wo꞉ mogago꞉ a꞉lab a꞉no꞉, ililo꞉ dimido꞉ a꞉no꞉ tambo mogago꞉le dowab. Kalu i a꞉no꞉ ili asulo꞉wa꞉lo꞉ nafale aloba꞉dan a꞉no꞉ mogagila꞉ ko꞉lo꞉lab. 16 Iliyo꞉ ne Godeyo꞉ mada asulo꞉ a꞉la꞉ sa꞉la꞉lab ko꞉sega, ililo꞉ man dimidab a꞉ma꞉yo꞉, iyo꞉ Godeyo꞉ mo꞉ba꞉dan a꞉la꞉ widakigab. A꞉la꞉fo꞉ko꞉lo꞉ Godeya꞉yo꞉ kalu o꞉mo꞉wo꞉ mada mogago꞉ ba꞉da꞉sa꞉ga꞉ mo꞉beab. Iyo꞉ Godeya꞉lo꞉ sio꞉ aumbo꞉ mo꞉kuduha꞉nakiyo꞉, man nafa dimidama꞉no꞉wo꞉ mo꞉lilo꞉.