Nan Suyat Pablo An Tito
Nan Mipangkop Sannaja Suyat
Sa'ad as Tito wha'on kus Hudyu as sija gway namati an Hesus gway nangngachan aterwhasuwan ja atuyungan Pablo san mansilsilwhiyana an Apudyus. Sa'ad nan suyat Pablo umoy an Tito gway mernusay atuyungana ad Creta gway nataynan gway mangiila sasan namati ad aschi. Tuyu nan pijaona ukuchon nannaja suyat.
Nan umuna, nipasmo' an Tito nan mipangkop san ukaliyay maserpu agwad sasan mangipangpangu sasan maayuayusay namati an Apudyus. Nan umasi, natudtuchugwan as Tito nu ininonaay suyuwan chanan namati, chanan aamma, iinna (gway chicha nan manuyu sasan man'amernusay hubhuwhai), chanan man'amernusay lallaya'i ja chanan mudchachu. Nan anungusna, insuyat Pablo an Tito nan tudtuchu mipangkop san kidkichun chanan namati amamod san whayu gway manghuhuyunancha, achicha kodchong as isil, ma'asinsinnungwhat ja mansississijanan chanan namati.
Chanan Hu'yona
Nan Lugyukin Nan Suyat (1:1-4)
Chanan Mangipangpangu Sasan Namati (1:5-9)
Mipangkop Sasan Mangisussuyu San Wha'wha''on (1:10-16)
Nan Ustuway Sussuyu (2:1-10)
Whayugwon Apudyus Gway Mataku Nan Losanay Taku (2:11-15)
Nan Ustuway Oon Nan Namati (3:1-8)
Nan Tudtuchu San Ininon Chanan Namatiyay Mawhijag (3:9-11)
Nan Mangudchiyay Whilin Pablo An Tito (3:12-15)
1
1 As Pablo na gway mansilsilwhi an Apudyus ja osaa'ay apostol Hesu Kristu. Niwhauna' as humachang san pumigsaan nan pammatin chanan takuway pinilin Apudyus ja mangisuyu an chicha tot maagwatancha as amod nan atuttugwaan gway mangichayan an chicha san ininonchaay mawhijag san masoman Apudyus. 2 San amaschi namnamaoncha nan ma'awhijakancha as ingkaingkana an Apudyus gway achi kun mantuli. Sijana nan ingwhawhagkana san chaan ma'gwa nan luhung. 3 Ad sa'ad nan chimpuway chinutu'an Apudyus impaakammuna nan Whayuway Chamag gway nitayo' an sa'on kun insuyu' kapu san whilin Apudyus gway Manaku an chita'u.
4 Nanuyata' an si'a Tito gway ingwhilang'u as kadto'ay ana''u kapu tan manisu nan pammatita.
Ilugwayu' gway ipailan Apudyus gway Ama ta'u ja as Kristu Hesus gway Manaku an chita'u nan inawhayucha ja pawhayugwoncha nan whijagju.
Chanan Mangipangpangu Sasan Namati
(1 Timoteo 3:1-13)
5 Annaja nan kapun nan nanaynana' an si'a ad asnatay Creta tot ituyuynuway mangurnus san losan gway ma'gwa ad chummutu''as mangipangpangu an chichaay maayuayus gway namati san gwaschi osa ili gway isun chay ingwhaka' an si'aay oom. 6 Ad sa'ad nan chutu'am, chay maid kun ma'gwaniyana ja osa nan asagwana. Ad sa'ad chanan anana'na maserpuway mamaticha hos an Hesu Kristu ja maid kun anan nan takuwon, “Sudchigworcha ja achicha chumngor”. 7 Tan sa'ad nan mangipangpangu sasan maayuayus gway namati gway nitayo'an nan terwhasun Apudyus, maserpuway maid kun ma'gwaniyana. Wha'on kus nayastug as sija ja wha'on kuhos as mabmahuchu'. Wha'on kus huttongan, angatan gwinnu mansasamsam. 8 Ad maserpuway tijangnga ja sija whayugwona nan whayu. Naangsan as sija ancha oona nu ngachan nan pa'gwan Apudyus an sija. Atchona nan whijagna as mansilwhi an Apudyus ja naattom. 9 Maserpuway popotpotana nan Whayuway Chamag gway mantayo'an gway nerpu san kadto'ay sussuyu tot whadngana chanan uchum san ustuway sussuyu ja tot i'erngagna nan lagwingay oon chanan mangchi sina.
Mipangkop Sasan Mangisussuyu San Wha'wha''on
10 Amaschi nan oon chanan mangipangpangu tan angsan chanan achi kun chumngor san ustuway sussuyu. Maid kun kutu' nan iwhakawhakacha ad alallilagwoncha nan uchumay taku. Aachugwanay manggwamanggwa sina chanan Hudyu gway namati an Hesus gway ipapilitcha nan suglit. 11 Maserpu paijakaynu an chanat tan kuyugwoncha nan ahumerhumerjan kapu san wha'wha''onay sussuyucha gway wha'on otjan as lobhongnaay misuyu. Awhawhain nan pangkopcha gway manggwa sina tan mamila'ancha ekay. 12 Nan inatuttugwaana osa sasan ailijancha profeta gway iCreta nan mismuway manggwana, “Patinajunay tuliyan chanan iCreta. Isucha nan nayangkatay ajam. Lagwotanchaay masachut.” 13 Tuttuwa nan sachiyay ingwhakana. Ad kapu sannaja achi'a umogjatay mangamuju' amod an chicha tot humayu nan pammaticha 14 ja akaychaay manchongor san uullit ekay gway inggwan chanan Hudyu ja chachay whilin gway nerpu sasan takuway nallagwing san atuttugwaan.
15 Ad sa'ad chanan takuway maid kun lagwing as pangkopcha, whayu nan losan an chicha. Gwon sa'ad chachay lagwing nan somsomo'cha ja achi kun mamati an Hesus, maid kun whayu an chicha tan achicha kun maimatunan nu ngachan nan whayu ja lagwing. 16 Ananchaon akammucha as Apudyus gwon mama''ila san kidkichuchaay achicha kun puyus akammu as Apudyus. A'u'uynit nan ooncha ja achicha kun puyus chumngor ancha achajuchas manggwa san whayu.