Nan Whayuway Chamag Gway Illistan Mateo
Nan Mipangkop Sannaja Nibyu
Sa'ad nan Whayuway Chamag gway illistan Mateo, ipaakammuna gway sa'ad as Hesus sija nan Mesias gway pinilin Apudyus gway mantuyay gway manaku sasan Hudyu ja sija ahos nan manaku san losanay takuway mamati an sija. Sa'ad nan aachugwan gway nangilistaan Mateo chanan Hudyu, sija nan impano'no'naay ustu gway sa'ad nan ingwhakawhakan Apudyus sasan takuna Hudyu san Chachaanay Tuyag, tummuttuwa kapu an Hesus.
Sa'ad nannaja nibyu ipailana gway sa'ad as Hesus sija nan angatuwanay mistuyu gway impaalin Apudyus. Sija nan anna nan ayobhonganaay mangipaagwat san lintog Apudyus ja mangisuyu san mipangkop san mantuyajana. Sa'ad nan aachugwanay insuyuna gway nilista sannaja, inamamungnas lima.
1. Nan tudtuchun Hesus san agwachana san whilig mipangkop san ininonay mawhijag, terwhasu, nan whijangon san terwhasu ja kanahon chanan mitapi sasan takuway ituyajan Apudyus (Kapitulu 5-7).
2. Nan intudtuchun Hesus sasan nasagwayan as chugwaay pasuyutna ja nan nangiwhaunana an chichaay umoy mangisuyu san ukudna (Kapitulu 10).
3. Nan agwat gway mipangkop san mangituyajan Apudyus sasan takuna (Kapitulu 13).
4. Nan insuyun Hesus sasan pasuyutna mipangkop san ukalicha ja whijangonchaay oon (Kapitulu 18).
5. Nan insuyun Hesus mipangkop san anungus nan luhung ja nan mantuyajan Apudyus san umaliyay chimpu (Kapitulu 24-25).
Chanan Hu'yona
Nan Listaan Chanan Nerpugwan Hesu Kristu Ja Nan Nijana'ana 1:1–2:23
Nan Nansuyuwan Juan Gway Manghohonjag 3:1-2
Nan Nahonjakan Hesus Ja Nan Nanulisukan Satanas An Sija 3:13–4:11
Nan Nansuyusuyuwan Hesus Ad Galili 4:12–18:35
Nan Inggwa'inggwan Hesus Manipud Ad Galili Ingkana Ad Jerusalem 19:1–20:34
Nan Mangudchiyay Chumingkun Hesus Ja Nan Natojana 21:1–27:66
Nan Natakuwan Hesus Ja Nan Nampaipailana Sasan Taku 28:1-20
1
Nan Nerpugwan Hesu Kristu
(Lukas 3:23-28)
1 Annachaja nan listaan nan nerpugwan Hesu Kristu gway nerpu san kana' Ali Dabid gway nerpu ahos san kana' Abraham.
2 Sa'ad as Abraham aman Isaac,
as Isaac aman Jacob,
as Jacob aman Juda ja chanan susunudna.
3 Sa'ad as Juda aman cha Fares an Zara gway as Tamar nan inacha,
as Fares aman Esrom,
ad as Esrom aman Aram.
4 Sa'ad as Aram aman Aminadab,
ad as Aminadab aman Naason.
Sa'ad as Naason aman Salmon,
5 as Salmon gway asagwan Rahab aman Boaz,
as Boaz gway asagwan Ruth aman Obed,
as Obed aman Jesse.
6 Ad sa'ad as Jesse aman Ali Dabid.
Sa'ad as Dabid aman Solomon gway sa'ad nan inana Batsiba gway sikuchay asagwan Urias.
7 Sa'ad as Solomon aman Roboam,
as Roboam aman Abias
ad as Abias aman Asa.
8 Sa'ad as Asa aman Jehosafat,
as Jehosafat aman Joram* 1:8 Sa'ad as Joram maagwakan ahos as Jehoram. Mawhasa san 1 Ar-Ari 22:50.
ad as Joram† 1:8 Sa'ad as Joram wha'on kus aman Ozias gwon sunud nan nerpugwana. Mawhasa san 1 Ar-Ari 22:50. nerpugwan Ozias.
9 Sa'ad as Ozias aman Jotam,
as Jotam aman Acaz,
ad as Acaz aman Hezekias.
10 Sa'ad as Hezekias aman Manases,
as Manases aman Amon
ad as Amon aman Josias.
11 Sa'ad as Josias apun cha Jeconias ja chanan susunudnaay lallaya'i gway nijana' san chimpun nan napapilit niijoy chanan ijIsrael ad Babilonia.
12 Nappung ad niijoy chanan ijIsrael ad Babilonia,
nijana' as Sealtiel gway Jeconias nan amana,
ad as Sealtiel apun Zerubabel.
13 Sa'ad as Zerubabel aman Abiud,
as Abiud aman Eliakim,
ad as Eliakim aman Azor.
14 Sa'ad as Azor aman Zadoc,
as Zadoc aman Akim,
ad as Akim aman Eliud.
15 Sa'ad as Eliud aman Eliazar,
as Eliazar aman Matan,
ad as Matan aman Jacob.
16 Ad sa'ad as Jacob aman Josep gway asagwan Maria.
Sa'ad as Maria inan Hesus gway maagwakan as Kristu.
17 Sija nan nasagwayan as opat nan lunap gway malluki an Abraham ingkana an Dabid. Ad malluki ad an Dabid ingkana san chimpuway napapilit niijoy chanan ijIsrael ad Babilonia, agwad nan nasagwayan as opatay lunap. Ad malluki ad ahos san nappungcha niijoy ad Babilonia ingkanas nijana'an Kristu, agwad nan nasagwayan as opatay lunap.
Nan Nijana'an Hesu Kristu
(Lukas 2:1-7)
18 Amasna nan ininon Hesu Kristu gway nijana': Ni'awherjan kun as Maria gway inan Hesus an Josep gway chaancha man'atum, naakammugwanay mahukis Maria kapu san ayobhongan nan Ispilitun Apudyus. 19 Sa'ad as Josep gway ni'awherjanana, kapu tan nalintokay taku lagwingonaay miwhawhain as Maria kun simsimmo'naay achina asawwon as Maria gway achina kun impaakammu sasan taku. 20 Gwon sa'ad san manom'asom'ana san annaja, nampaila nan anghel Apudyus an sija san ininop gway anana, “Josep gway kana' Dabid, achi'a umogjatay mangasagwa an Maria tan nan nahukiyana kapu san Ispilitun Apudyus. 21 Ijana'na nan laya'i ad nginadnam as sija as Hesus tan takuwona chanan takuna sasan whersucha.”
22 Na'gwa nan annaja tot matungper nan ingwhakan Apudyus an profeta Isaias gway anana,
23 “Chongyonju, sa'ad nan osa whawhallasay chaan pabog mahuki
ad ijana'na nan osa laya'i,
ad mangadnan as Immanuel
gway sa'ad nan pijaona anan, ‘Anna as Apudyus an chita'u.’ ”‡ 1:23 Mawhasa san Isaias 7:17.
24 Gwot humangon kus Josep, pinatina nan ingwhakan nan anghel Apudyus kun inasagwana as Maria. 25 Gwon achina kun ini''ibog as sija ingkanas iyana'na nan ana'. Kun nginadnan Josep nan ana' as Hesus.