9
Chanan Pinilin Apudyus Gway Takuna
(Roma 2:28-29)
1 Nannaja iwhaka' an cha'aju tuttuwa kapu tan na'aosossaana' an Kristu. Achiya' kun mantuli tan ta'choyana' san somsomo''u gway ituyajan nan Ispilitun Apudyus gway achiya' kun mantutulli 2 san manggwanaa'on amod nan sasanga' ja achi kun mapungpungay sikab nan somsomo''u kapu san ailija'ay Hudyu. 3 Nu mawhalwhalin otjan whayugwo'ay sa'on ekay nan machijus ja misiyan an Kristu as humayugwan chanan susunud'u ja chanan ailija' gway achi kun mamati. 4 IjIsraelcha gway pinilin Apudyus chicha as manana'na ja impailana nan ina'apudyusna an chicha. Chicha nan na'atuyakan Apudyus ja inatodna an chicha nan Lintog. Sinuyuwana chicha san ustu ininonay manchajaw ja chicha nan nangiwhagan Apudyus san ingwhawhagkanaay atchona. 5 Sa'ad chanan nerpugwancha pinilin Apudyus chicha ad chicha nan nerpugwan nan nerpugwan Kristu nu mipangkop san inatatakuna. Sija as Apudyus gway mangituyay san losan gway machajaw as ingkaingkana. Amen.
6 Ta'on nu aachugwan sasan ijIsrael nan achi kun namati an Kristu, wha'on kus ana'on achi kun natungper nan ingwhawhagkan Apudyus gway atchona an chicha. Tan wha'on kus losanay ijIsrael takun Apudyus. 7 Wha'on kuhos as losanay kana' Abraham kadto'ay kana'na. Tan anan Apudyus an Abraham, “As Isaac ekay nan merpugwan nan kana'nu gway atcho' an si'a.”* 9:7 Mawhasa san Genesis 21:12. 8 Nan pijaon nina anan wha'on kus losanay ijana' Abraham nan miwhilang as anana' Apudyus. Gwon ahus chanan nijana' kapu san namatiyancha san ingwhawhagkan Apudyus as miwhilang as kana'na. 9 Tan annaja nan ingwhawhagkan Apudyus gway anana, “San amasnaay chimpu san umaliyay tagwon, managkulina' ad ummana' as Sara as laya'i.”† 9:9 Mawhasa san Genesis 18:10, 14.
10 Wha'on ekas ahus nan sachi as mangipaila san i'aman Apudyus gway mampili gwon amaschi ahos nan na'gwa san nanapa' gway ana' Rebecca gway as Isaac nan amacha gway nerpugwan ta'u. 11-12 Uyay san chaancha mijana'an ja manggwaan san whayu gwinnu lagwing, anan Apudyus an Rebecca, “Sa'ad nan mamangu mijana' mansilwhi san mangudchi.”‡ 9:11-12 Mawhasa san Genesis 25:23. Ingwhakana na tot mipailaay sa'ad nan namiliyana san osa taku, sissija kapu san pangkopna gway wha'on kus kapu san inggwan nan taku. 13 Tan nilista san Ukud Apudyus gway anana, “Sa'ad as Jacob impatog'u gwon sa'ad as Esau nilagwing'u.”§ 9:13 Mawhasa san Malakias 1:2-3.
14 Anan nin nan uchumay takuwon wha'on kus ustu nan inggwan Apudyus. Achi kun mawhalin! 15 Tan anana an Moses,
“Achakugwa' nan whayugwo'ay achakugwan.”* 9:15 Mawhasa san Exodo 33:19.
16 Nu amaschi, sa'ad nan mamiliyan Apudyus san taku wha'on kus kapu san whayugwon nan taku gwinnu manggwaana san whayu gwon kapu san achakun Apudyus. 17 Tan nilista san Ukud Apudyus gway anan Apudyus san Ali ad Egipto, “Nan'aliyo' si'a tot ipaila' kapu an si'a nan ayobhonga' ja tot mipaakammu nan ngachan'u san losanay taku san luta.”† 9:17 Mawhasa san Exodo 9.16. 18 Sija nan achakugwana nan whayugwona achakugwan ja pawhatugwona nan somsomo' nan whayugwona pawhatugwon.
19 Ad nu agwad osa an cha'aju as manggwana an sa'onon, “Nu amasnat as Apudyus, kaman sissijaay pawhasuyona nan taku san o'oona? Maid kun mawhalin as mangijachi san pangkopna.” 20 Gwon as si'a gway taku ekay, ngachan'a man gway sumungwhat an Apudyus? Wha'on kus mawhalinay anan nan nabser san namser an sija, “Kamman amonsina an sa'on?” 21 Jo'o maid ayobhongan nan manghohoser san whangana gway mangodgwa san lita ta hosayona as chugwaay ayasin nan whanga, nan osa napatog nan mausayana ja nan osa kakangayna ekay mausayana?
22 Isuna hos an Apudyus gway anna nan alintokana manggwa san whayugwona oon. Nu mampay whayugwon Apudyus gway ipaila nan linguna ja ipaakammu nan ayobhongana, inaannusana' amod gway achina jan chusaon chanan takuway lobhongcha matangkaan. 23 Inggwana nan amasna tot ipaakammuna sasan inachakugwana nan ina'apudyusna gway insakanana san agwi sasan mitapi an sija ad langit. 24 Chita'u ahos nan pinilina gway wha'on kus ahus as chita'uway Hudyu gwon ama ahos chanan wha'on kus Hudyu. 25 Isun ahos nan ingwhakan Apudyus san nibyun Hosea gway anana,
“Agwaka' chanan wha'on kus taku' as ‘Taku'’
ja sa'ad chanan wha'on kus impatog'u, agwaka' as ‘Ipatpatog'u.’‡ 9:25 Mawhasa san Hosea 2:23.
26 Ad sa'ad san iliyay niwhaka an chicha nan, ‘Wha'on kus taku' cha'aju,’
maagwakancha as ‘anana' nan mawhiwhijakay Apudyus.’ ”§ 9:26 Mawhasa san Hosea 1:10.
27 Annaja hos nan impa'upa'uy Profeta Isaias san mipangkop san Israel gway anana,
“Ta'on nu isun nan aachun nan kallis san whaywhay nan whilang chanan kana' Israel,
ahus ekay a'it an chicha as mataku.
28 Tan sa'ad nan anan Apudyus gway oona,
kanasona ja mamingpingsanay u'umona chanan taku san luta.”* 9:28 Mawhasa san Isaias 10:22-23.
29 Isun nan ingwhakan Isaias san agwi gway anana,
“Nu achin Apudyus gway Apigsaan san losan inghunan nan uchum sasan kana' ta'u gway mataku,
namin ta'u matangkaan gway isun nan na'gwa san iliyay Sodoma ja Gomora.”† 9:29 Mawhasa san Genesis 19:1-29.‡ 9:29 Mawhasa san Isaias 1:9.
Nan Achin Ku Chanan IjIsrael Mamatiyan An Kristu
30 Ad nan mungimungna amasna: Ta'o mampay nu achin chanan wha'on kus Hudyu impapatiyay nanganap san ininoncha miwhilang as ustu san mangilan Apudyus, ingwhilang Apudyus chicha as ustu san mangilana kapu san pammaticha. 31 Gwon sa'ad chanan ijIsrael gway nangipapati manuyut san lintog ta miwhilangcha as ustu san mangilan Apudyus, achicha kun na'gwa gway naanapan nan niwhilangancha as ustu san mangilan Apudyus. 32 Kaman? Kapu tan sa'ad nan inggwacha wha'on kus kapu san pammati gwon kapu san whayuway o'ooncha. Nila'sigcha as Kristu gway mijalig san whatuway michungpuyan chanan taku. 33 Tan nilista san Ukud Apudyus gway anana,
“Chongyonju na, isaad'u ad Sion§ 9:33 Sa'ad nan “Sion”, Jerusalem nan sawhali ngachanna. nan osa takuway mijalig san whatuway michungpuyan chanan taku.
Nan oona palingugwona chanan taku.
Gwon ta'on nu amaschi, sa'ad chanan mamati an sija
achicha kun miwhawhain.”* 9:33 Mawhasa san Isaias 8:14; 28:16 ja 1 Pedro 2:6-8.
*9:7 9:7 Mawhasa san Genesis 21:12.
†9:9 9:9 Mawhasa san Genesis 18:10, 14.
‡9:11-12 9:11-12 Mawhasa san Genesis 25:23.
§9:13 9:13 Mawhasa san Malakias 1:2-3.
*9:15 9:15 Mawhasa san Exodo 33:19.
†9:17 9:17 Mawhasa san Exodo 9.16.
‡9:25 9:25 Mawhasa san Hosea 2:23.
§9:26 9:26 Mawhasa san Hosea 1:10.
*9:28 9:28 Mawhasa san Isaias 10:22-23.
†9:29 9:29 Mawhasa san Genesis 19:1-29.
‡9:29 9:29 Mawhasa san Isaias 1:9.
§9:33 9:33 Sa'ad nan “Sion”, Jerusalem nan sawhali ngachanna.
*9:33 9:33 Mawhasa san Isaias 8:14; 28:16 ja 1 Pedro 2:6-8.