15
Kolomongo Awili 15 Yesusi Ulu Pulu Keri Teli Yemboma Kinie Taki Teki Molorumu Mele Juda Yembomanga Tapu Yemane Kanoko Keri Kanoringimunge Pilipelie Yesusini Pulu Yemo Kanu Yembo Kerime Konopu Mondorumu Mele Nimbe Simbendo Ungu Iko Yepoko Torumu Ungu Ikoma
15:1-7 Kongi Sipisipi Te Talopa Lierimumunge Ungu Ikomo* akumunge 15:4-7 Mateyu 18:12-14.
1 Kou takisi lili yema kinie ulu pulu kerime teli ye wema kinie eno pali Yesusinge ungu pilingendo yu molorumune nondoko oringi. 2 Parisi yema kinie Pulu Yemonga ungu manemanga pulume pilku mane siringi yema kinie† bokumunge alsena anjokondo “11. Farisi”, “41. saveman”. enone aku teringi mele kanokolie konokono ningu ningendo: “I yemo yu tepa kenjikimu. Ulu pulu kerime ambololi yemboma “Pea molamili waa.” nimbelie, langi alieli eno pea nongo molemelela.” niringi.
3 Yesusini eno aku siku niringi pilipelie ⸤iungu ikoma eno topa sirimu.⸥ Ungu iko imu topalie nimbendo:
4 “Enonga ye tene kongi sipisipi‡ bokumunge alsena anjokondo “44.2. sipsip”. pape paono mondolka kinie te talopa lelkanje yuni sipisipi po paono tene kelepa nani wema kolea ku lieline molangi siye kolopa pupe, talopa lelka sipisipimu kanopa limbendo korolipe naa pulkeye? ⸤Korolipe pulke.⸥ 5 Pe kanopa lipelie yuni konopu sipe apu topa lkondo memba pulke. 6 Kanu kinie lkondo ombalie yemone yunge pulu lemo yembomando kinie yunge ulke kere pongolo yembomando kinie walsipelie nimbendo: “Nanga kongi sipisipi§ bokumunge alsena anjokondo “44.2. sipsip”. talopa liemumu kanopo lindu kene pea konopu sipu molamili waa.” nilke.” ⸤nirimu.⸥
7 ⸤Nimbelie ungu ikomonga pulumu nimbe para sipelie nimbendo:⸥ “Nane eno ungu te nimbu sikirumu: Yembo konopu sumbi nimbe pepili molemele yemboma aku siku molemele-na eno ulu pulu kerime munduku siye kolko konopu alowa tenge aulke te naa lemo kanumu,* Inie 15:10,32. Judayembomanga ye nomi mare eno enono aku siku moloringi konopu lieringi nalo Romo 3:23 nimbe molemo mele kana! Aisaya 64:6 nimbe molemo mele isipe: ‘Olio mana yembomanga ulu pulu peangama paa mulumbale keri kalaro awisili molemo mulumbale mele.’ Iungumunge ungu tela inie anjokondo 18:10-14. kanu yemboma mulu koleana angellomane konopu we silimele. Nalo sipisipi nokoli yemone yunge sipisipi talopa lielimu kanopa lipelie paa olandopa konopu silke mele aku sipe ulu pulu keri ambololi yembo te yunge ulu pulu keri telemoma pilipe keri pilipe mundupe siye kolopa konopu alowa tembamonga angellomane paa olandopa konopu singe.” ⸤nirimu.⸥
8 ⸤Nimbelie kelepa ungu iko te pea topalie nimbendo:⸥† ungu pulumu inie yakondo Kolomongo awili 15 munge ungu pengémo kinie, 15:1-2 kinie.
“Te iwalsikirula: Ambo te kou mone suroli mele engaki rureponga talo nosipelie nilkemone, pe kanu kou suroli mele te manie pulkenje yu tepe llame kandopa ulke puri memba kanopa limbendo naa korolkaye? ⸤Paa korolkamo.⸥ 9 Kanu kinie kanu koumu kanopa lipelie yunge pulu lemo yemboma kinie yunge ulke kere pongolo yemboma kinie walsipelie nimbendo: “Nanga kou mone suroli manie pumumu kanopo lindu kene pea konopu sipu molamili waa.” nilke.
10 “Nane eno nimbu sikirumu: Kanu ambomo konopu silke mele aku sipe ulu pulu keri ambololi yembo te yunge ulu pulu keri telemoma pilipe keri pilipe mundupe siye kolopa konopu alowa tembamonga Pulu Yemonga angellomane konopu singe.” nirimu.‡ inie 15:7,32.
15:11-32 Kangomone Tepa Kenjerimu Nalo Lapane Yu We Konopu Mondorumu Mele Ungu Ikomo (15 pali kanani.)
11 ⸤Aku nimbelie⸥ Yesusini kelepa ⸤ungu iko yepoko sipemo pea topa ye awilime mane sipelie⸥§ ungu pulumu inie yakondo Kolomongo awili 15 munge ungu pengémo kinie, 15:1-2 kinie. nimbendo:
“Ye te, yunge kango talo moloringili. 12 Walse akiliomone lapando nimbendo: “Tata, nu kolonimunge moya melema isili ou moke teko na sini mele sieni.” nirimu kinie kanu yemone yunge noserimu melema moke tepalie yunge kangoselo sirimu lsingili.
13 Kanu melema elo sirimu kinie akiliomo wale pokore mindi molopalie, pe mele sirimume pali lipe memba aulke sulu tenga purumu. Aulke sulu pupelie nirimumuni, kolea tenga pupe molopalie yu ‘Langi peangama nambo.’ nimbe, ‘Mulumbale peangama pakambo.’ nimbe kou mone awili tepa pulimo melema topo topa lipe panjipelie, ‘No nambo.’ nimbe topo topa lipe, ‘Amboma pea peamili.’ nimbe kou-mone sipe, aku telipe purumu kinie yunge kou mone melema pali pora nirimu.
14 Yunge melema kinie kou mone kinie pora nirimu kinie yu paa koropa purumu. Kanu kinie yu molorumu koleana engele awili tepa lierimu kinie yu melema pali molo torumu kinie yu paa engelene kolorumu. 15 Yu engele terimu kulu yu kanu kolea pulu ye te molorumune pupe “Kou kongono te teambo si.” nimbe mawa terimu kinie yuni nimbendo: “Kapola, nanga kongi tapu tendeko langi nurupulume ‘Nangi.’ ningu liku si.” nirimu. 16 Ga kilume kinie konapa bulume kinie kongi sirimume ‘Nambo.’ nimbe pilipe molorumu nalo yu te naa siringi.
17 Kanu kinie pe yu konopu lipe mundupe pilipelie yu yuyu nimbendo: ‘Tatanga kongono tendelemele yemboma ga awisili nongo olo telemo nalo na ya engelene kolopolie kamu kolombo tekero. 18 Akumunge na pupu Tata molemona pupulie yundu nimbondo: “Tata, nu kinie Mulu Koleana Molemo Yemo kinie nane tepo kenjerindu. 19 Na kango kerimu kene nunge marena molombo kapola naa temba kene nunge kongono ye te molambo.” nimbo.’ nimbe pilierimu. 20 Aku nimbe pilipelie yu molorumu koleamo mundupe siye kolopa, lapa molorumune pumbe purumu.
Yu lkondo pumbe purumu kinie yunge lapane yu sulu tepa orumu kanopalie yu kondo kolopa lkisipe pupe yu kangulorumu.
21 Kanu kinie kangomone lapando nimbendo: “Tata, nu kinie Mulu Koleana Molemo Yemo kinie nane tepo kenjerindu. Na kango kerimu kene nunge marena molombo kapola naa temba kene nunge kongono ye te molambo.” nirimu.
22 Aku sipe nimbe molorumu kinie lapane yunge kongono tenderingi kendemande yemando nimbendo: “Welea puku nanga mulumbale peangamo liku mengo ongo yu pakondoko, ki ongi te liku yunge kíne mondondoko, kimbu su liku yunge kimbune mondondayo. 23-24 Aku tekolie kongi kao walo awilimu toko kalondoko molombolona mengo waa.” nirimu. “Nanga kangomo yu koronga ou purumu, ‘Yu kolorumunje.’ nimbu pilierindu nalo kinié yukelepa okomo. Yu ou pupe tepa nema lsimu nalo kinié altopa okomo kanopo likimulu kene konopu sipu kongi kao nombo molamili.” nirimu kinie eno aku siku konopu siku kongi nongo moloringi.
25 Nalo yunge kango komomo poniena kongono tepa molopalie pe ipupene ulkendo ombá orumu kinie eno konopu siku musiki toko denisi teko moloringi ungumu pilipelie 26 yuni kongono kendemande ye tendo “Ungu te niembo ou.” nimbelie nirimumuni, yundu walsipelie nimbendo: “Ulu tekemelemo nambemune tekemeleye?” nimbe walserimu.
27 Kanu kongono kendemande yemone yundu topondopa nimbendo: “Angena omu-ne laniene kanopa yu manda mele molopa ulu te naa tepa omu-ne kanopalie konopu sipe “Kongi kao walo awilimu namili.” nimbe topa kalomu.” nirimu.
28 Aku sipe nirimu pilipelie komomo yu mumindili kolopalie “Na ulkena suku paa naa pumbo!” nirimu.
Aku nirimu pilipelie lapane wendo omba yundu nimbendo: “Olio pea konopu sipu molamili ou.” nimbe mawa terimu kinie
29 lapando topondopa nimbendo: “Pílie! Na alieli, ponie awisili, nunge kongono tendepo molopolie nu nilino ungume alieli pilipu lipu tenge panjipu, walse kepe nunge ungu te karaye naa tepo molio nalo nuni nando walse kepe kongi-meme walo te ‘Kangoma kinie pea konopu siku nongo molangi.’ ningu naa silino. 30 Nalo kinié nunge kango te omba, yuni ambomando “Na pea peambili kou mone siembo.” nimbe nunge kou mone eno sipe pora sirimu, kanu kangomo omu kinie nu konopu siku ‘Kongi kao walo awilimu namili.’ ningu tonu lepamo.” nirimu.
31 Lapane yundu topondopa nimbendo: “Kangomo, nu kinie na pea alieli molembolo kinie nanga melema pali oltonga. 32 Nalo kinié angena kolorumu kanumu altopa omu. Yu ou pupe tepa nema lsimu, kinié kelepa omu kanopo likimulu kene olio papu konopu sipu musiki topo langi nombo molkomolo.” nirimu.” ⸤nimbe Yesusini⸥ nirimu.* “Lapa” nirimu Pulu Yemondo nirimu; “Kango akiliomo” nirimu ulu pulu keri telemele mele kanoko keri kanoko konopu alowa telemele yembomando nirimu; “Kango komomo” nirimu Juda yembomanga ye nomime. Ye nomi akume Parisi yema kinie, Pulu Yemonga ungu manemanga pulume mane siringi yema kinie, Pulu Yemo popo tondoringi ye awilime kinie, Juda yembomanga ye nomi wema kinie, kanu yemane ‘Olio ulu pulu keri naa tepo, mongo naa lipu, PuluYemonga ungu manema sumbi sipu tepo molemolo.’ niringi yemando nirimu. Ye nomime ningu pilieringi mele ya 15:1-2, inie yakondo 5:29-30, 7:30,34.
*^ akumunge 15:4-7 Mateyu 18:12-14.
†15:2: bokumunge alsena anjokondo “11. Farisi”, “41. saveman”.
‡15:4: bokumunge alsena anjokondo “44.2. sipsip”.
§15:6: bokumunge alsena anjokondo “44.2. sipsip”.
*15:7: Inie 15:10,32. Judayembomanga ye nomi mare eno enono aku siku moloringi konopu lieringi nalo Romo 3:23 nimbe molemo mele kana! Aisaya 64:6 nimbe molemo mele isipe: ‘Olio mana yembomanga ulu pulu peangama paa mulumbale keri kalaro awisili molemo mulumbale mele.’ Iungumunge ungu tela inie anjokondo 18:10-14.
†15:8: ungu pulumu inie yakondo Kolomongo awili 15 munge ungu pengémo kinie, 15:1-2 kinie.
‡15:10: inie 15:7,32.
§15:11: ungu pulumu inie yakondo Kolomongo awili 15 munge ungu pengémo kinie, 15:1-2 kinie.
*15:32: “Lapa” nirimu Pulu Yemondo nirimu; “Kango akiliomo” nirimu ulu pulu keri telemele mele kanoko keri kanoko konopu alowa telemele yembomando nirimu; “Kango komomo” nirimu Juda yembomanga ye nomime. Ye nomi akume Parisi yema kinie, Pulu Yemonga ungu manemanga pulume mane siringi yema kinie, Pulu Yemo popo tondoringi ye awilime kinie, Juda yembomanga ye nomi wema kinie, kanu yemane ‘Olio ulu pulu keri naa tepo, mongo naa lipu, PuluYemonga ungu manema sumbi sipu tepo molemolo.’ niringi yemando nirimu. Ye nomime ningu pilieringi mele ya 15:1-2, inie yakondo 5:29-30, 7:30,34.