1  Bada, Mousis i giuwena gado, 2 “Dam 12 Islael nopodimo babada ḡemoḡemotaḡa kwa vinedi bi kwa giukamaḡedi te Keinan dobuna sa tigane. Niga taunana doḡana temi Islael kaka yà vitemi.”

3 Taunana aubaina Palan kalakalalelenemo ḡalavumo Bada bai i giugiuwena mainana Mousis dam 12 nopodimo babada ḡemoḡemotaḡa i vinedi bi i giukamaḡedi.

17 Laḡannemo Mousis i giukamaḡedi te Keinan dobuna tiganena aubaina ba niga mainana i giuwedi, “Ko nawa Negevmo aibadabada yawaninemo oya keikeilikidimo 18 bi ḡome dobuna ko tigane te ko kita te lava wapawapa ee visa ota sa miyamiya. Tedi ḡaiḡailisidi ee gwaḡegwaḡedi? 19 Bi edi doḡa ko kita te visuvisuna ee gebogebona. Bi kota edi taun ko kita, a ganakuku ee geḡa? 20 Bi doḡa ko kita, maumaulina ee gomegomelina? Kai ḡome sa moimoito ee geḡa? Bamoda sa moimoito ba votedi vaitedi ko legau natomedi te ka kitedi.” (Mba guleipi ena vota laḡanina.) 21 Kamaina bi Din kalakalalelenemo aibadabada yawaninaḡa a saḡa a nawa bi dobu a tiganena eete beubeu yawaninemo Leḡobmo a tava, Lebo-Amat diyanemo.

25 Laḡan 40 mulidimo Keinan dobuna a tigane kovi bi a tava munaḡa, 26 Kades Palan kalakalalelemo, Mousis, Elon bi Islael lavedi lisidimo. Tedi bai matabuna a kitakitana lava a giuvitedi. Bi kai votedi mba dobunemo a legalegaudina ai lovedi. 27 Kamaina bi tautigana tedi a giuwedina gado, “Temi kona giukamaḡemai te dobuna ke tigane bi ke kita te dobu maumaulina bi doḡa visuvisuna. Kai votedi niga ko kitedi. 28 Geḡa te lava ḡome miyemiyedi ba lava ḡaiḡailisidi bi edi taun ba nananakidi bi a ganakuku kauwedi. Bi kota Anak ena tubulelesa ke kitedi, lava kaikaidakidi. 29 Bi Amelek lavedi ba Negev dobunemo sa miyamiya. Bi Ḡiti, Debus bi Amoli lavedi ba oya dabediḡa sa miyamiya nawa. Bi Keinan lavedi ba gelemo bi Diyoudan gaubina diyana a miya wata.”

30 Laḡannemo lava Mousis a moito kwavivili bi tautigana kalinedi a vaivaiye ba a naila bi ai talapili. Kamaina bi Keleb i giuwedi te a miya moimoisili bi i giuwedina gado, “Tada ḡemoḡemotida mba lavedi ta lauyovoḡedi bi doḡana ta vai.”

31 Bi kota olooloto mabai Keleb vaitena a nawanawana ena giu a lauyovoḡe bi a giuna gado, “Geḡa, mba dobuna lavedi a ḡailisi kauwa mote mai tada. Tada mote ḡemoḡemotida ta nawa bi vaitedi tai ḡasiḡasi.” 32 Tautigana taudiḡa mba dobuna ena giu kaikaiyovuna ai tubu bi Islael matabudi a giu nawedi. Bi kota a giuna gado, “Tama ke nawa bi bai ke kitana ba lava aiyai ḡome ya tavana ba tana pekipekina. Banina lava ḡome ke kitedina ba ḡaiḡailisidi bi kaikaidakidi. 33 Lava nananaka bi waikakaubiledi. Tedi taudidi Nefili* Pakanemo 6:4 Lava ḡesaudi ai sumaḡa te Nefili pakana nigaḡome. lavedi, Anak ena tubulelesa. Tedi ke kitedi bi tama ke kitamaina maibena kapau.”