1 Kamaina bi niga kauwidi mulidimo, Idip ḡalibonana ena waen tautegolubuna* Nigilisimo i giuna gado, cup bearer tana ena noya ba ḡalibona ena waen tautego lubuna, muliḡa kaka ḡalibona ya vite te ya tego. bi ena buledi taugabuna tedi ḡalibona nuwana a ka gebo. 2 Taunana aubaina ḡalibona nuwana i medi ena taupaula labu lisidimo 3 bi tedi i panidi bi tauyava edi bada nimanemo i sivudi bi tauyava i legaudi te Diyousep bamo biliwelokonemo i miyamiyana ḡome i sivu nawedi. 4 Bi biliweloko tauyavena edi bada Diyousep noya i vite te mba lavedi ya labedi. Tedi biliwelokomo a miya gulata.

5 Bi dudubala ḡemota, ḡalibona ena waen tautegolubuna bi ena buledi taugabuna a lauboni ḡemota. Bi edi lauboni banidi ba tabudi bi tabudi.

6 Laḡan i sako olaolalemo Diyousep i tava lisidimo bi i kitedi te tedi manuwaboyedi a miyamiya. 7 Kamaina bi Diyousep i waitalayedina gado, “Bai aubaina niganana matemi a kuluva?”

8 Bi tedi ena giu ai munena gado, “Tama ke lauboni bi aiyai ema lauboni banidi yaka maḡatidi?”

Bi Diyousep i giuna gado, “Maimaituwa lisinemo ba ḡemoḡemotina te mba laubonidi banidi ya giuwaimaḡatidi. Emi lauboni ko giuwegu.”

9 Kamaina bi waen tautegolubuna ena lauboni i gei giuwe Diyousep lisinemo, “Tagu egu laubonimo ba waen kaina e kita. 10 Bi kaina lagalagana ba faiona, laḡannemo a nimanimagala ba, a buso bi a latapaledi. Bi kota waenidi ai laka te matabudi a ḡou kovi. 11 Bi tagu ḡalibona ena ledu nimagumo bi guleipi banidi e legaudi bi ena ledumo e buyodi bi nimanemo e sako.”

12 Kamaina bi Diyousep tana i giuwena gado, “Em laubonina banina ba niga mainana: Kai lagalagana faiona kuna kitedina ba laḡan faiona. 13 Laḡan faiona nopodimo, tam kaka ḡalibona biliwelokomo ya kaikamaḡem bi em noyamo ya sako munaḡem bi ena ledu nimanemo kwa sako munaḡe, maibena dolinemo kuna voivoiyena mainana. 14 Laḡannemo bai matabuna lisimmo sa visuna, kwa noḡotigu bi kwa lau kivivisuvisuḡegu. Bi ḡalibona lisinemo isagu kwa vato bi kwa giuwe te tagu biliwelokomo ya kaikamaḡegu. 15 Banina Ḡibulu lavedi edi dobumo tagu e miyamiya bi lava tagu egalemo a pani tavaitegu niga ḡome. Bi tagu mote bai gebona yà voiye bi biliwelokomo a sakogu.”

16 Laḡannemo taulaugabu i vaiye te Diyousep waen tautegolubuna ena lauboni banina i kamaḡati bi i vaiye te i visu kauwa ba tana Diyousep i giuwena gado, “Tagu kota e lauboni, te dabagumo ba buledi poedi faiona e ava'avala. 17 Bi po'a dabanemo noponemo kani gabugabudi, tabudi bi tabudi a kenakena ḡalibona aubaina. Bi mwanuwa a tava bi po'ana noponemo kani a kanikanidi.”

18 Bi Diyousep i giuwena gado, “Po'a faiona kuna kitedina banina ba laḡan faiona. 19 Laḡan faiona nopodimo ḡalibona kaka tam ya kaikamaḡem bi gadom ya koiḡavuki bi tubuḡim kai laganemo yai dawe bi mwanuwa sa kani.”

20 Kamaina bi laḡan waifaioninemo, ḡalibona ena tubuḡa laḡanna i tava bi tana soi i voiye ena tauwaibabada aubaidi. Mba laḡannemo waen tautegolubuna bi buledi taugabuna biliwelokomo i kaikamaḡedi bi i nawedi ena tauwaibabada matedimo. 21 Bi ḡome ḡalibona waena tautegolubuna ena noya wadubonemo i sako munaḡe. Bi ena noya i waitubu munaḡe. 22 Bi buledi taugabuna tana i wai peki, maibena Diyousep lauboni i giugiuwena.

23 Bi mba laḡannemo waen tautegolubuna Diyousep ena waibaḡa nuwana i yavuḡa bi mote i noḡoti lubu.