1 Aisik, Deikap i yoge, i kavisuvisu bi i giuwena gado, “Keinan waivinina mote kuma naḡi. 2 Kwa nawa Padan Alanmo bi ḡome itam Betuwel ena vanuwemo, ḡome ḡavum Leiban natuna guguinina ḡemota kwa naḡi. 3 Maimaituwa wailewapani guletina ya kavisuvisum bi kwai natunatuna te em tubulelesa sa wapa bi tam lava wapewapedi tamedi. 4  ✡ Pak 17:4-8Maimaituwa bainewa Eiblaḡam i kakavisuvisuna mainana, tam bi em tubulelesa yà kavisuvisumi. Bi tam tautavatava niga doḡanemo kwa miyamiyana, Maimaituwa Eiblaḡam i vitevitena kaka kwa vai.”

10 Deikap Biyasiba i gose bi Alan yawaninaḡa i nawa. 11 Tana i nawanawana eete aubiga ota bi dobu ḡesaunemo i tava. Kamaina bi ḡome ena ḡalavu i voiye. Bi ḡakima ḡemota i vai i sako bi i guliyovo te i wai kunuwanaye bi i kena. 12 Tana i kenakena te i laubonina ba wawana malamo i kita bi isuna doḡamo i gwaliḡe. Bi aneya i kitedi wawana modonaḡa a saḡasaḡa bi a yovoyovo.

13  ✡ Pak 13:14,15Bi wawana kavalinemo Bada i moimoito. Kamaina bi i giuna gado, “Tagu Bada, tamam Eiblaḡam bi Aisik edi Maimaituwa. Niga doḡana dabanemo kwa kenakena, kaka tam bi em tubulelesa yà vitemi. 14  ✡ Pak 12:3, 22:18Bi tam em tubulelesa kaka sa wapana mai ḡobusa doḡamo, bi edi doḡa kaka yà kadidigi bi tedi lalasi, aibeu, aibadabada bi yalousa yawandiḡa sa miya nawa bi dobu sai wanavu. Tam bilebilem lisidiḡa kaka lava wapewapedi kavisuvisu sa vai. 15 Tagu mote yàma gosem bi baiḡa kwa nawanawana ba tagu vaitem bi yà labem te yà natome munaḡem Keinanmo bi bai lisimmo e giugiuwapaena yà voiye.”

16 Deikap laḡannemo i kenakena moito ba i giuna gado, “Bada gode niga ḡome ya miyamiya bi tagu mote e sibe.” 17 Tana i naila bi i giuna gado, “Niga gabu wainuwa nainailina, giukauwa te niga Maimaituwa ena vanuwa bi mala mataetina.”

18 Olaolala kaikana Deikap i kena moito bi ḡakima i wai kunuwanayena i vai bi mataila i waigwaliḡe bi masi i vai te dabanemo i ḡini, te mba gabuna i waila waiyawa, Maimaituwa taunaḡa aubaina. 19 Deikap mba gabuna i wai isana Betel,* Isa Betel banina ba Maimaituwa ena vanuwa. wala a wai isana Lus.

20 Kamaina bi Deikap Maimaituwa lisinemo i giuwapana gado, “Bamoda tam tagu vaitegu bi egu babalemo kwa labe kauwegu bi kani kwa vitegu yà kani bi gala kwa vitegu yà kote, 21 bi kota tam kwa labegu bi yawayawasanigu tamagu lisinemo yà tava munaḡana, ba tam tagu egu Maimaituwa. 22 Bi niga ḡakimina mataila ei moitona ba tam Maimaituwa em vanuwa.† Buka ḡesaudi a giu te anilaudune gabuna. ‡ Niga ḡakimina lava sa kita bi sa noḡoti te Maimaituwa Deikap lisinemo i laumaḡata. Bi tam bai matabudi kwa viteviteguna yà laidubudi te dubu 10 bi dubu ḡemota tam yà vitem.”