1  Bada Eiblaḡam lisinemo i laumaḡata Mamle ena kai nananakidi pakedimo. Niga taunana ena titikuna.

Suwala modomo Eiblaḡam ena palai mataetinemo i miyamiya. 2 Bi i wai kita saḡa te olooloto faiona a moimoito, i kitekitedi te i velaubeyedi bi tuwapekana i wai tupagwaliḡe bi i laudulu doḡamo.

3 Bi i giuna gado, “Aee egu babada bamoda kona kita te tagu kamaina ba koma vawaitauligu. 4 Gauba yà vai natome bi kaḡemi ko koḡedi bi kai pakanemo koi wagulu. 5 Kani ḡotona yà vai natome, ko kani bagibagi kaka bi nawa koi tubu munaḡe. Emi taupaula kona noḡotigu te kona tava egu vanuwemo, kamaina te kani yà voiye te ko kani.”

Tedi a giuwena gado, “Kamaina bai kuna giugiuwena ku voiye.”

6 Eiblaḡam i velau makai ena palaimo bi mwanena i egelina gado, “Kwa nawa te falawa kauwa kwa vai bi buledi tabetabedi kwa gabudi.” 7 Bi Eiblaḡam i velau i nawa bulumakau dubunemo bi bulumakau natuna pwatapwatana i vunuvai bi ena taupaula i vite bi i kanonoḡi.

8 Eiblaḡam kani bulumakau susubwadina vaitena vitavitalena,* Mba taunana bata (butter). musala bi susubwadina anitego, i natomedi matedimo i wai dubudi, te a kanikani bi tana diyedimo kai pakanemo i moito i labelabedi. 9 Tedi ai talayena gado, “Mwanem Sela bamo?”

Bi Eiblaḡam i giuwedina gado, “Tana palai noponemo.”

10 Edi tau ḡemota Eiblaḡam i giuwena gado, “Yà giugiu kauwem te niga mai laḡannemo yà munaḡa, bokina kwalabunemo bi mwanem Sela gomana olotona ya bewa.”

Sela tana mulinemo, palai mataetinemo i moito i wai beyavaiye. 11 Sela bi Eiblaḡam tedi ba a magula kauwa bi Sela ena nawanawalai i kovi. 12 Sela nuwana i waigwaigwai bi i giuna gado, “Tagu egu bada vaitena kei magula kauwa bi ke ḡoḡosi. Bi ḡemoḡemotina kai natuna, ee?”

13  Bada Eiblaḡam i wai talayena gado, “Bai aubaina Sela i gwai bi i giuna gado, ‘Tagu ei magula bi ḡemoḡemotina yai natuna?’ 14 Mwali bai i pilipili gulata lisigumo te yà voiye? Kage mainana e giugiuna, tagu yà nato munaḡa, niga mainana laḡannemo bokina kwalabunemo bi mwanem Sela gomana olotona ya bewa.”

15 Sela i naila bi i valelena gado, “Tagu mote e gwai.”

Tana i giuna gado, “Geḡa, tam kuna gwai.”

16 Kamaina bi olooloto faiona a miya moito bi Sodom yawaninaḡa ai kita yovo bi Eiblaḡam vaitena a nawa. 17 Bi Bada taunaḡa i giu munaḡena gado, “Bai yà voiyena mote i visu te Eiblaḡam yai malimaliuwe. Bi kamaina te yà tainuwatau. 18 Tana ena tubulelesa ya didiga bi dam ḡaiḡailisina bi tana dabanemo dobu matabudi yà kavisuvisudi. 19 E vine te tana natunatuna bi ena tubulelesa ya giuwedi te egu waiḡake bi didimana sa kaiwatedi bi kota lava sa komaniyedi. Ḡome kaka Eiblaḡam lisinemo e giugiuwapana yà voiye.”

20 Kamaina bi Bada i moito vitale bi Eiblaḡam i giuwena gado, “Tagu e vaiye te waiwavu dididiga Sodom bi Gomola lisidimo. 21 Tagu yà yovo yà nawa bi yà kitedi, niga waiwavuna giu kauwa ee kaiyovu.”

22 Ḡome oloto labu a gosedi bi Sodom yawaninaḡa a nawa bi Bada Eiblaḡam matanemo i moimoito. 23 Eiblaḡam i nawa Bada diyaotinemo bi i giuwena gado, “Giu kauwa te lava visuvisudi bi gebogebodi vaitedi kwa kovoḡidi? 24 Bamoda lava 50 didimanidi malagai dididiginemo, tam male kwa kovoḡi bi mote kuma nuwa munaḡedi? 25 Mba mote i visu. Mote kuma voiye. Tam mote lava visuvisudi bi gebogebodi vaitedi kumai pekidi, kauwina ḡemotina kwa voiye, lava didimanidi bi balebaledi lisidimo. Geḡa. Tam bena taulaididimana dobu matabunemo, ee? Tam bena kwa etale kauwemai.”

26  Bada i giuna gado, “Bamoda lava visuvisudi wapedi 50 Sodom malagainemo yà banavidina, malagaina matabuna mote yàma kovoḡi.”

27 Eiblaḡam i giuwena gado, “O bada, tagu maibena yoḡiyoḡi mote yà visu gulata bi geḡa, te kaikana giu lisimmo ei tubu taunana aubaina te, yai tala munaḡa. 28 Bamoda lava 45 visuvisudi malagaina dididiginemo, tam male matabuna kwa kovoḡi?”

Kamaina bi Bada i giuna gado, “Bamoda ḡome 45 visuvisudi e banavidina ba mote yàma kovoḡidi.”

29 Eiblaḡam i waitala munaḡana gado, “Bamoda ḡome 40 visuvisudi kuna banavidina ba bainewa?”

Bi Bada i giuna gado, “Ḡome bi 40 e banavidina ba mote yàma voiye.”

30 Eiblaḡam i giuna gado, “Aee, egu bada, kuma mediyegu, avedi bi yà tala munaḡa bamoda 30 ota kuna banavidina ba bainewa?”

Bi Bada i giuna gado, “30 ota e banavidina ba mote yàma voiye.”

31 Eiblaḡam i giuna gado, “Aee bada, egu laudabatola kwa noḡotikamaḡe bamoda 20 ota kuna banavidina ba bainewa?”

Bada i giuna gado, “Bamoda 20 ota e banavidina, mote yàma kovoḡidi.”

32 Eiblaḡam i giuna gado, “Aee egu bada, kuma mediyegu, avedi te maḡemota yà giu munaḡa bamoda 10 ota kuna banavidina ba bainewa?”

Bada i giuna gado, “Bamoda 10 ota e banavidina ba tagu mote yàma kovoḡidi.”

33 Kamaina bi Bada Eiblaḡam i gose bi Eiblaḡam i munaḡa ena palaimo.