15
Mousis ena Sale
1 Ḡome Mousis bi Islael lavedi Bada lisinemo a salena gado,
“Tagu yà sale Bada lisinemo
banina tana saḡasaḡa guletina.
Taunana aubaina osi bi seliot tauvelauyedi
nisamo i waitonedi.
2 Bada tana egu ḡailisi,
tagu tana yà saleye.
Tana egu Maimaituwa tana taunana
i wai yawasanigu.
Bi kota tamatamagu edi Maimaituwa
kamaina te tagu yà kasaḡesaḡe ena ḡailisi aubaina.
3 Bada tana tauwaiḡaviya,
bi tana taunana isana Bada.
4 Ḡalibona ena tauwaiḡaviya bi edi seliot nisamo i waitonedi,
bi kota ena waibabada laukaidi nisa sabasabanemo i waitonedi.
5 Te nisa dubadubana i suma tawedi,
bi a buluna mai ḡakima ya daudaululuna nisa dibunemo.
6 Oo Bada, tam kataiyam i ḡailisi gulata,
Oo Bada, kataiyam tauwaiḡaviyem i lau yovoḡedi.
7 Tam giukauwa te kuna ḡailisi gulata,
taunana aubaina te tauwaiḡaviyem kuna lauyovoḡedi.
Em medi i waikalaḡosedi maibena
kai leḡi pokinemo ya kalakalakabina mainana.
8 Tam kuna lausuve te nisa i nuwadaili,
bi i laimoitona maibena bilibili.
Bi nisa dibuna i laitabu.
9 Bi ḡaviya i laubaḡabaḡana gado, ‘Yà kwaviwatedi
bi yà kaidididi, te edi pulapula bi bai e ḡoeḡoena yà kwayavaidi.
Egu kepata manimanina yà solu vai te yài pekidi.’
10 Bi geḡa te tam yawasimmo kuna lausuve te nisa i sumatawidi,
bi a buluna maibena ḡakima nisa bagibaginemo.
11 ‘Oo Bada bamo mote diyammo maimaituwa ḡesau mai tam?
Geḡa, geḡa ota!
Oo Bada tam giukauwa
te namalim waiyawa i ḡailisi gulata
bi anisove kauwidi kwa voivoiyedi.
12 Tam kataiyam kuna tuḡu
te em ḡaviya doḡa i gudedi.
13 Bi em ḡoe kenakena nonoḡinemo em lava kunai yawasanidi
bi kunai etadoliyedi.
Bi kota em ḡailisimo kuna labe nawedi
ee te em animiya waiyawemo kuna tavaitedi.
14 Bi dobu ḡesaudi a vaiye bi a naila gulata,
bi kota Filistiya lavedi nuwedi i kuluva.
15 Bi Edom waibabadidi a naila gulagulata,
Bi Mowab lavedi edi babada nananakidi
naila i ka gusugusudi.
Bi Keinan lavedi a naila mwatimwatiti.
16 Matabudi naila i wai wanavudi,
banina tam em ḡailisimo kuna voiyedi
te a moitona mai koikoitau,
bi em lava a velauteiyaḡim.
Oo Bada, em lava panipanimo
kuna wai yawasanidina taudidi a velauteiyaḡim.
17 Bi kuna saḡedi em oyamo kunai dubudi
te ḡome sa miya.
Oo Bada, em ani miya kunai logo wainono,
em oya waiyawemo kwa tavaitemai
te ḡome ka miya nonoḡa.
18 Oo Bada tam em waibadana
em lava lisidimo ya kena nonoḡa.”
19 Bi Islael lavedi nisa modonaḡa doḡa ḡasaḡasalinaḡa a damana. Bi Idip ḡalibonana ena osi, seliot bi osi tauvelauedi nisamo a bulu biBada nisa i natome munaḡe te i wai kwesi tawidi.
Miliyam ena Sale
20 Bi taugiuwatana Miliyam, Elon nuvuna, ena kelekelele i vai bi waivini ḡesaudi a kaiwata te kelekelele a kwadiyedi bi a bigabiga. 21 Ḡome Miliyam i salena gado,
“Oo, Bada ta kasaḡesaḡe banina tana ena ḡaviya i lauyovoḡedi,
tana osi tauvelauedi nisamo i kabuludi.”
Gauba waiḡolana i visuvisu
22 Kamaina bi Mousis Islael lavedi i wai dolidi nisa sabasabana a gose bi a nawa kalakalalele, dobu isana Sula. Ḡome laḡan faiona a babala kalakalaleleḡa bi gauba mote bamo a banavi. 23 Bi tedi dobu isana Mala* Ḡibulu kalinedimo Mala banina ba waiḡola. ḡome a tava bi gauba waiḡolana a banavi bi mote luvana te maso a tego 24 Bi lava a wawalu Mousis lisinemo bi a giuna gado, “Bai ka tego?”
25 Taunana aubaina Mousis Bada lisinemo i laupali bi Bada kai selipapina i wailove. Kamaina bi Mousis i vai bi gaubemo i pwalaḡe nawe, te gauba tegona i visu.
Mba ḡome Bada waiḡake i vitedi bi i wailaulubudi te sa kaiwata e geḡa. 26 Bi i giuwedina gado, “Bamoda Bada Maimaituwa kalinana ko vaiye kauwena, ena ḡowana ko voiyena bi kota waiḡake ko kaiwatedina ba tagu mote sida yàma vitemi maibena Idip lavedi e vitevitedina. Tagu Bada, tauwaiyawasanimi.”
27 Bi tedi a tava dobu isana Elim, ḡome tovosa wapedi 12 doḡa noponemo a laulaupusuwali saḡa bi gogoka kaidi wapedi 70 pakedimo gauba diyanemo a lauḡalavu.