90
Maimaituwa ena taupaula Mousis niga palina i gilumi.
1 Oo Bada, tubulelesa onena, tam taunana ema vanuwa.
2 Maimaituwa tam wala, niḡanana bi yaḡolo mainana miyamiya nonoḡim,
muliḡa kaka oya
bi dobu matabuna kuna voiyedi.
3 Tam lava kuna giuwemaina gado, “Ko munaḡa doḡamo!
Bi doḡamo kuna voivoiyemaina kota kamunaḡa.”
4 Tam matammo, kwalabu 1,000 ba maibena laḡan ḡemota,
bi kota maibena ka sula kena te laḡan ya sakosakona.
5 Tam lava edi yawasana kwa kaikaikamaḡe makaiyedi,
maibena lauboni wainuwakaukauleyana.
Lava ba maibena belana,
6 olaolalemo ya duga kauwa te ya buso,
bi aubigamo ya welai te ya peki.
7 Mainana tama em medi dididiga ya yovona ba ka launeḡaneḡa,
tama ke naile gulatem.
8 Tam ema gebogebo matabudi taukitedi,
tama kasivusivu waidavonedi bi geḡa te tam matabudi kwa kitekitedi.
9 Tam em medi, tama ema miya dobumo
ya bwalibwali ḡavuki.
Bi ema yawasana kwa kaikaikamaḡe makaiyedi,
maibena lava nuwana peki bi yawasina ya tautau guduna mainana.
10 Bi tama dobumo ka miyana kwalabu 70,
bamoda lava i miya ḡaiḡailisina ba 80 ya vai,
bi nopodimo yavi bi wainuwatoi ka banabanvidi,
bi mote kama miya wailofa te ka pekipeki.
11 Bi em medi dididiga mote aiyai mayana i vai,
augunai em medi mayana ka vai, maso ba ke vivile kauwem.
12 Kwai lovemai te bainewa lofana ka miya te noḡota didimanidi lisimmo ka legaudi,
banina niga dobunemo ema miya mote ima lofa.
13 Oo Bada kwa nato munaḡa! Tama em taupaula,
kwa launuwatoitoiyemai.
Lisimaimo mote kuma medi gulata.
14 Bi em nuwavaina kenakena nonoḡinemo kwai wanavumai kaka olaolala matabuna,
ka sale bi kainuwavisu nonoḡa.
15 Tam bainewa pilipilimo kuna sivumai ke miyamiyana, mainana kota nuwavisu kwa vitemai.
Bi emai nuwatoi kwa kaikamaḡe bi miya visuvisuna kwa vitemai.
16 Tama em taupaula bi em ḡailisi kwa kamaḡati lisimaimo,
bi ema tubulelesa sa kita te tam ḡaiḡailisi guletim.
17 Bada, tam ema Maimaituwa kwa launuwatoitoiyemai,
kwa sagumai te ema noya ya visu.
Bi kwa sagumai te noya ka voiye kauwedi te banidi sa tubuḡa.