1 Kwalabu pakanemo nawalai dolidolinemo Islael lavedi matabudi Din kalakalalelenemo a tava, Kadesmo palai a solu bi a miya. Ḡome Miliyam i peki bi a dobo.

2  ✡ Pot 17:1-7Bi mba dobunemo gauba geḡa taunana aubaina Islael lavedi a tava ai ḡemotidi bi Mousis bi Elon a giuvitavitaledi, 3 Tedi Mousis a giuvitavitalena gado, “Tama maso nove Bada mayavaina palaina mataetinemo laḡannmo ema lava a pekipeki maso matabumai ḡome ke peki kovi! 4 Bai aubaina Bada ena lava kunai doli tavaitemai niga kalakalalelemo? Te tama bi ema ḡamoḡamo vaitedi ka peki. 5 Bai aubaina Idipmo kuna kapotiyovomai, te niga dobuna tatakalinemo kuna tavaitemai? Niga ḡome mote bai sima moimoito, mote witi, mote damaya, mote guleipi, mote pomeguleneti bi mote bai ḡesaudi. Bi mote bamo gauba te maso ka tego yawasana.”

6 Mousis bi Elon a moito lava a gosedi bi a nawa tabudimo palai waiyawa mataetinemo a moito. Bi a laudulu doḡamo bi Bada namalina waimatakanikanina lisidimo i laumaḡata. 7  Bada, Mousis i giuwena gado, 8 “Kwa nawa em diḡona kwa vai natome bi em tau Elon vaitena Islael lavedi matabudi koi ḡemotidi. Kamaina bi matedimo lakudabadaba kwa giuwe te modenemo gauba ya laupusuwali bi lava edi ḡamoḡamo vaitedi sa tego.” 9  ✡ Nam 17:10Kamaina bi Mousis i nawa diḡona i vai bi Bada i giugiuwena mainana i voiye.

10 Mousis bi Elon Islael lavedi matabudi lakudabadaba diyanemo a natomedi ai ḡemotidi bi i giuwedina gado, “Temi taugiuvitavitala koi beyavaiya. Tama gauba ka vitemi.”

11 Kamaina bi Mousis diḡona i lageti bi lakudabadaba malabu i kwapu bi gauba dididiga i laupusuwali, te lava bi edi ḡamoḡamo vaitedi a tego.

12 Bi geḡa te Bada, Mousis bi Elon i giuwedina gado, “Banina temi mote lisigumo koi sumaḡadidi te tagu waiyawa maso egu ḡailisi Islael lavedi konai lovedi. Taunana aubaina temi mote kaka lava komai dolinawedi dobu e giugiuwenemo.”

23 Islael lavedi dobu kades a gose bi a nawa dobu Edom, i natonatona palatinemo oya Ḡo diyanemo tava. Ḡome Bada, Mousis bi Elon i giuwedina gado, 24 “Tagu Islael e saugedi te dobu maso e vitedi, ḡome kaka Elon mote ima tava. Tana kaka niga ḡome ya peki. Banina temi labu Melibamo bai e giugiuwemina mote mainana ko voiye. 25 Elon bi natuna Eliyesa kwai dolidi bi kwa saḡedi oya Go dabanemo, 26 bi ḡome Elon ena waipilisi galedi kwa kaikamaḡedi bi Eliyesa kwai kote. Bi Elon kaka oyanemo ya peki.”

27 Bi Mousis Bada bai i giugiuwena mainana i voiye, Islael lavedi a kitekitedi bi a saḡa a nawa oya Ḡo dabanemo. 28 Ḡome Mousis Elon ena gala i kaikamaḡedi bi Eliyesa i waikote bi Elon i peki. Bi Mousis bi Eliyesa a munaḡa yovo lava lisidimo.

29 Lava ḡome a vaiye te Elon i peki, kamaina bi lava ai nuwa poyaye bi laḡan 30 nopodimo a ḡaba gulata.