2
Nuwavisu kwa tavuḡena bi banina geḡa
1 Tagu nopogumo ei noḡotana gado, “Tagu yà voiye munaḡegu te yà yasisi.” Bi e voivoiye te banina geḡa. 2 Taunana aubaina e giuna gado, “Soi yabayababa bi elawa yabayababa ba banidi geḡa.” 3 Tagu egu nuwauyauya bena kage waen ya voiyegu te yài nuwavisu bi yà kauwa yabayababa te yà sibe kauwe te bamo taunana nuwavisu lava edi miya watiḡena niga dobunemo.
4 Tagu noya dididiga e voiye. Egu vanuwa e galadi bi waen daibidi e wadidi. 5 Tagu kai votevotedi ani kani tabudi bi tabudi e wadidi. 6 Bi doba e voiye egu kai wapewapedi ani wai utuvidi aubaidi. 7 Tagu egu taupaulayababa wapawapa, waivini bi oloto e gimala bi taupaulayababa waivinidi ai natuna te taupaulayababa wapawapa a bewedi egu vanuwemo. Bi egu kau bi sipu dubudi wapewapedi, wala mote mainana ḡaliḡalibona dolidolidi Yelusalemmo. 8 Tagu silva, gold bi ḡaliḡalibona edi waiguyau ḡoneḡonedi e legaudi dobu ḡesaudiḡa. Tagu olooloto bi waiwaivini tausale bi kota vesavesala mulemuleledi wapewapedi e legaudi bi sa voiyegu te yài nuwavisu. 9 Bi ei ḡonaḡona gulata mote aiyai mainana wala Yelusalem malagainemo. Bi niga kauwidimo egu nuwauyauya lisigumo i kena.
10 Bai matabudi e kitedi
bi e ḡoeḡoedina e legaudi, ani wainuwavisugu aubaina.
Bi mote bai ḡesauna e daboke.
Tagu egu noyamo e wainuwavisu
bi mba taunana egu noya maiina.
11 Mwali e voivoiyedina e noḡotiwatedi
te e noya gulata.
Bi matabudi e kita kovidi
te banidi geḡa.
Mba maibena yavala e kwavikwavi.
Bi niga dobunemo mote bai ḡesauna yàma vai.
Nuwauyauya miyaena ba kavakavana
12 Nuwauyauya bi mote noḡota kauwa lavedi e noḡoti waitetedi.
Lava aiyai muliḡa bi yai ḡalibonana
ba bai e voivoiyena mainana ya voiye.
13 Bi e banavi te nuwauyauya i visuna kaka noḡota balebaledi,
mba mainana yanayana i visuna kaka boimatuwa.
14 Lava nuwauyauyana ba manoḡotina ya nawanawa,
bi lava ena kauwa mai bu'uwa,
ba ena nawa maibena boimatuwaḡa ya nawanawa.
Bi e sibe te niga kauwidi ḡemotidi
kota labuidi lisidimo ya tubuḡa.
15 Bi nopogumo ei noḡotana gado,
“Bai bu'uwa lisinemo i tubutubuḡana,
male mainana lisigumo ya tubuḡa,
bi e banavi munaḡegu,
te egu nuwauyauya banina geḡa.
16 Bi laḡan muliḡa nuwauyauya,
bi bu'uwa lavedi mote aiyai ima noḡoti watedi.
Banina nuwauyauya lavana ya pekina
mainana kota bu'uwa lavana ya peki.”
Noya gulata banina geḡa
17 Taunana aubaina yawasana e tunidaboke banina bai matabuna niga dobunemo yà voivoiyedina ba pilipili sa vitevitegu maibena yavala kwavikwavi. 18 Tagu yà pekina ba mwali matabudi e voivoiyedina yà gose kamaḡedi lava ḡesau lisinemo. Taunana aubaina niga dobunemo egu noya e daboke. 19-21 Tagu egu nuwauyauyamo e noya gulata te mwali matabudi niga dobunemo e legaudi. Bi e kita te mote ei nuwavisu banina lava ḡesau mote i noyae bi waiguyauna ya vai bi ya labe kauwe e geḡa. Mba lavana nuwanuwauyauyana e bu'ubu'uwina, taunana aubaina mote ei nuwavisu, niga kauwa kavekavedi. 22 Lava dobunemo ya noyanoya gulata bi ya wainuwaboya bi mote bai ima banabanavi. 23 Mba lavana laḡan matabuna ena noyamo ya laulautuniyavi bi ya medimedi bi kota dudubalemo mote imai yawasi kauwa, niga kota banina geḡa.
24 I visu kauwa te lava ena noya maiina ya kani, ya tego bi yai nuwavisu bi e kita te niga ba Maimaituwa nimana. 25 Maimaituwa geḡa, maso mote aiyai i kani, i tego bi i wainuwavisu. 26 Tedi mabai Maimaituwa sa wai nuwavisuna tana nuwauyauya, anapu bi yasisi ya vitevitedi bi gebogebo lavedi ḡonaḡona sa legalegaudina ba tedi mabai Maimaituwa tauwai nuwavisuna aubaidi. Niga kota banina geḡa bi maibena yavala ta kwavikwavina.