1  Bada Deivida i moito galame te kana ḡaviya matabudi i lauyovoḡedi. Mulinemo ḡalibona vanuwinemo manuwaubana i miya i waiyawasi. 2 Deivida i miya moito bi taugiuwatana Neitan i giuwena gado, “Tagu ba vanuwa visuvisunemo kai isana seda, a ḡalaḡalanemo yà miyamiya. Bi bainewa te Maimaituwa ena waianina bogesina ba palai noponemo ya kenakena?”

3 Neitan ḡalibona ena giu i wai munena gado, “Bada tam lisimmo, taunana aubaina kwa nawa bi bai kuna noḡonoḡotina kwa voiye.”

4 Mba dudubalinemo Bada Neitan i giuwena gado,

5 “Kwa nawa bi egu taupaula Deivida kwa giuwena gado, ‘Bada niga mainana i giu: Tam mote taunana egu vanuwa kuma ḡala bi noponemo yàma miya.”

8  Bada, Neitan i giuwena gado, “Egu taupaula Deivida niga mainana kwa giuwe, Bada saḡasaḡa guletina i giu: Tam wala ba waigeḡa otim bi sipu edi aniyaba gabunemo, sipu kuna labelabedi bi tagu e vinem bi e sako saḡem te egu lava Islael kwai badaedi. 9 Tam em ani nawamo ba tagu vaitem bi em ḡaviya matabudi matammo e lauyovoḡedi. Bi niganana isam yà voiye te ya didiga, maibena waibabada isanawenawedi dobumo. 10-11 Tagu kaka egu lava Islael edi doḡa otina yà vitedi bi dobu wai nuwaubanemo yà sivudi bi sa miya. Gebogebo lavedi a laulaukivi gebogeboyemina ba mote sima voiye munaḡe. Bi ḡome mote bai kaka ima ka pilipilimi. Bi em ḡaviya mote yàmai aninedi bi sima kapilipili munaḡemi.

“Tagu Bada bai e giugiuwemna ba yà voiye te tam em tubulelesemo ḡalibona sa tubuḡa. 12  ✡ Giu 2:30Tagu kaka em tubulelesemo natuotim ḡemota yà vine, te gabum ya vai. Bi em laḡan i kovina ba em magula edi ani kenamo sa sakom. Tagu kaka ena waibada yà voiye te ya ḡailisi. 13 Bi tana taunana kaka vanuwa ya ḡala isagu anilauduneyena aubaina bi tagu yà voiye te ena waibada ya kena nonoḡa. 14 Tagu tana yài natune bi tana tagu yai tamanegu. Laḡannemo bai i voiye waigebona ba tagu yà kovoḡina maibena gomana tamana ya kovokovoḡina. 15 Bi tagu egu ḡoe tana lisinemo mote kaka yàma kaikamaḡe, maibena ḡalibona Sol lisinemo e kaikaikamaḡena bi epaiyanina ba tam e sakom. 16 Em dam lelesina ya tuwawata bi em tubulelesa sai ḡalibona bi sa lauetadoli nonoḡa.”

17 Kamaina bi Neitan wailove i kita biBada bai matabuna i wai wailovena Deivida i giuvite.