Ⅰ-Ⅱ Nyï Kɔtɔ Laka ꞌba Bɔkoꞌba ileme ꞌdeni njo mï kada ma ŋburuŋburu ꞌba dɔliŋɔ nime bilaka ti koga kpënnï gɔ lende ꞌba Bɔkoꞌba. Lïjë ti kiꞌdi dönnï gɔ akiyandi ꞌba Satani ame bo kiꞌdi nökï abo ga ꞌdeni tïndëndë bilaka timo. Nökï abo ga na kiꞌdi ya ma rɔ bɔ bëtï naga ꞌdeni tuꞌbölu wa ti akiyandi abo nime römöyï lïjë ꞌbënnï ikali dë kpe toza wa ma laka di rɔ ma kënyë. Ⅲ Ya naga nime lïjë ebe tiyandi bilaka tëgë kinza kogbe ꞌja dë, kina gbï tëgë kinza konyo wa mɔtɔ ga dë. Tine Bɔkoꞌba oꞌdɔkɔ ꞌdɔ ya ame ga kiꞌdi dönnï ꞌdeni gɔ laja kodɔrɔ abo nime kikali ꞌdeni laka ne, gɔ koꞌdɔ yëëꞌdï mo zi bo kina gɔ lïjë konyo wa naga nima bo koꞌba ne.

Ⅳ Wa naga nime Bɔkoꞌba koꞌba ne pili rɔ ma laka. A mɔtɔ inza ame gɔ dilagike di rɔmo. Tine zize tutï gɔmo ti toꞌdɔ yëëꞌdï mo zi bo. Ⅴ Römöyï lende ꞌba Bɔkoꞌba ti yëëꞌdï koꞌdɔ ze iꞌdi wa naga nime ꞌdeni laka rɔ a ꞌba Bɔkoꞌba.

Ⅵ Ndose nime ɔdɔ koto ŋgï zi bilaka ꞌba kanisa ti këddï ŋgï rɔ bɔ laja ma laka ꞌba Yësu Kurïsïtö. Römöyï nï iyandi yi ꞌdeni laka ti lende ꞌba Bɔkoꞌba këddï ꞌdeni gbï toꞌdɔ mo laka kiꞌdi tigɔ zïyï mï ndɔbɔ nime. Ⅶ Kina ꞌdɔ kilagi yaga di rɔ lende ma yawa ꞌba bulöbu ma mɔlo naga, ame ŋge rɔ lende ꞌba dɔliŋɔ nime ne. Tine ma laka mo ꞌdɔ kutu röyï toꞌdɔ lende ꞌba Bɔkoꞌba. Ⅷ Lïjë ma kutu rönnï kitigɔ mï yida rɔ, okɔnyi rönnï mbowa. Tine ze ma dutuke rɔze ꞌdeni mï lende ꞌba Bɔkoꞌba nime ti dokɔnyike rɔze ŋgï rɔ mbëmbë. Römöyï dikalike ꞌdeni dëdïke ti dïdï ma laka gïrï nime kina gbï rɔ ŋburuŋburu. Ⅸ-Ⅹ Kina me doꞌdɔke ndɔbɔ ꞌdeni ti tigɔ ze ga gbï ti tende ꞌba rɔze, gɔ ame dikalike ꞌdeni Bɔkoꞌba ëdï kokɔnyi ze. Bo na rɔ bɔ ame ti dïdï ma ŋburuŋburu ne. Bo na kɔꞌbɔ tokɔnyi bilaka pili di mï tölë, tine pele bo okɔnyi ya ma kiꞌdi dönnï gɔ lende abo naga ꞌdeni mɔlo. Lende nime na rɔ ma laka kina ꞌdɔ bilaka pili kiꞌdi dönnï gɔmo.

Ⅺ Kina oto ndose nime zi bilaka ꞌba kanisa ꞌdɔ kiyandi lïjë timo. Ⅻ Kinza kiꞌdi bɔtɔ kudölï yi dë gɔ titi ꞌba röyï. Tine loma ꞌbï na ꞌdɔ kiꞌdi köꞌbö rɔ ma laka ꞌdɔ bilaka ꞌba kanisa kogba görö ꞌba wa ma këddï koꞌdɔ ti ma këddï kiya kina gbï ti akɔꞌɔ ꞌbï ma gɔ lëpï yï ga. Kina ꞌdɔ lïjë kiꞌdi dönnï gɔ lende ꞌba Bɔkoꞌba toꞌdɔ mo gbï ŋge kinza a ma kënyë mɔtɔ kɔzɔ ꞌbëyï tara. ⅩⅢ Kina ꞌdɔ kiꞌdi röyï gbï tïdëkï buku ꞌba Bɔkoꞌba zi bilaka. Kina ꞌdɔ kuwöwö laja nime zïnnï gɔ kiyandi lïjë toꞌdɔ mo ŋbö mako. ⅩⅣ Kinza kuburu bi ꞌba tigɔ nime Bɔkoꞌba kiꞌdi zïyï ne dë, ame kiꞌdi ꞌdeni zïyï mï kada ma tönë bɔ kumë lende abo mɔtɔ ga kumë lende gɔ köꞌdu ꞌbï kina löbu ꞌba dɔ kanisa kiꞌdi közï ꞌdeni döyï ꞌdɔ toꞌdɔ ndɔbɔ nime ne. ⅩⅤ Kina ꞌdɔ kiꞌdi röyï ti toꞌdɔ ndɔbɔ nime gɔ bɔtɔ pili koŋgɔ ma këddï koꞌdɔ rɔ ma laka. ⅩⅥ Tine iꞌdi kömöyï kandi laka di mï wa ame ga këddï koꞌdɔ ne, gbï ti ma këddï kiyandi. Öꞌbö nduwë toꞌdɔ wa naga nime miya ꞌdeni zïyï ne. Toꞌdɔ mo te na ti kiꞌdi yi gbï ti ya ame ga këdï kuwö lende ꞌbï ne kɔmɔ di mï tölë.