Ⅰ Kpe ame ga mɔꞌɔ ye ne, iꞌdike kɔmɔye kandi laka, bɔ kumë lende dɔ kïndëndë ma konzi itaꞌba ꞌdeni kote mï dɔliŋɔ. Kina kinza kiꞌdike dɔye dë ŋgï welo gɔ lende ꞌba bɔtɔ ame ga pili këdï kiya te lïjë ëdï ti Nyï Kɔtɔ Laka ꞌba Bɔkoꞌba mïnnï ne. Tine ziye titi tiyɔzɔ mo ꞌdɔ kikalike ɔdɔ këdï ŋgï rɔ ꞌba Bɔkoꞌba. Ⅱ Tikali mo na kɔzɔ a nime te, lïjë ame ga këdï kiya te Yësu Kurïsïtö ako ꞌdeni dɔliŋɔ bine rɔ bilaka lesi ne lïjë na rɔ ꞌba Bɔkoꞌba. Ⅲ Ne lïjë mɔtɔ ama ga pili kowasa lende nime kiya te Kurïsïtö ako dë su dɔliŋɔ bine rɔ kïnë bilaka lesi ne lïjë inza rɔ ꞌba Bɔkoꞌba. Lïjë ꞌbënnï ꞌba bɔ ndoꞌji bɔ ya ꞌba Kurïsïtö tönë na. Uwöke ꞌdeni mɔlo bine iya te bɔ ndoꞌji nima ëdï kako mï dɔliŋɔ kina me bo kömö ꞌdeni.

Ⅳ Kole ma ga, kpe na rɔ kole ꞌba Bɔkoꞌba kina aꞌdake bɔ kumë lende dɔ kïndëndë naga nima ꞌdeni. Römöyï bo Bɔkoꞌba ame mïye ne bo na mbiri di dɔ Satani nima mïnnï lïjë bilaka ꞌba dɔyayi nime ne. Ⅴ Kina ma bɔ kumë lende dɔ kïndëndë naga nima lïjë ꞌbënnï rɔ bilaka ꞌba mï dɔyayi nime. Kina lende ꞌbënnï ga pili rɔ ꞌba dɔyayi nime gɔ köꞌdu mo na ma bilaka ꞌba dɔyayi nime këdï kuwö dɔ lende ꞌbënnï ne. Ⅵ Ne ze ꞌbeze ma ze tiye nime ze ꞌdeni rɔ kole ꞌba Bɔkoꞌba. Kina ame ga pili kikali Bɔkoꞌba ne na ti kuwö dɔ lende ma ꞌbeze. Tine lïjë ame ga pili kinza rɔ kole ꞌba Bɔkoꞌba ne lïjë uwö dɔ lende ze dë. Kina me bɔ ame ɔdɔ doŋgɔ bo kuwö dɔ lende ze nima, omba bo na rɔ bɔ ame Nyï Kɔtɔ Laka ꞌba lende kodɔrɔ ꞌba Bɔkoꞌba këdï mï bo ne. Tine ma kinza kuwö dɔ lende ze dë naga nima ti dikali lïjë ŋgï rɔ ma laka rɔ ꞌba Satani bɔ bëtï.

Ⅶ Kpe ame ga mɔꞌɔ ye ne, döꞌböke ti nduwë tɔꞌɔ rɔze. Römöyï akɔꞌɔ na rɔ ꞌba Bɔkoꞌba. Kina me ze ame ga pili ti akɔꞌɔ mïze ne ze na rɔ kole abo ꞌba Bɔkoꞌba kina ze na gbï rɔ bilaka ame ga kikali bo ne. Ⅷ Tine lïjë ame ga ꞌbënnï kinza akɔꞌɔ mïnnï lïjë kɔꞌɔ lëpï nnï ga dë ne, lïjë ikali Bɔkoꞌba dë du te römöyï Bɔkoꞌba bo na rɔ mï zana ꞌba akɔꞌɔ. Ⅸ Bɔkoꞌba ileme akɔꞌɔ abo ꞌdeni zize ti toja kole kɔtɔ kpökï abo kako mï dɔliŋɔ ame ti bo na dëdïke ꞌdeni ti dïdï ma ŋburuŋburu ne. Ⅹ Akɔꞌɔ ame rɔ ma laka ne inza rɔ ma dɔꞌɔke bo Bɔkoꞌba. Akɔꞌɔ ma laka mo na rɔ ame bo kɔꞌɔ ze bo koja kole kɔtɔ abo kako kombi laŋba ꞌba lende kënyë ze ga ti tölë abo ne.

Ⅺ Kpe ame ga mɔꞌɔ ye ne, kɔzɔ ame Bɔkoꞌba kɔꞌɔ ze ꞌdeni kulöwö ne zize gbï ꞌdɔ tɔꞌɔ lëpï ze ga. Ⅻ Bɔtɔ mɔtɔ inza kɔtɔ te ame koꞌja kïnë Bɔkoꞌba. Tine ɔdɔ dɔꞌɔke lëpï ze ga ꞌdeni Bɔkoꞌba ꞌdeni rɔ akɔtɔ tize, akɔꞌɔ abo ëdï ꞌdeni ŋgï koꞌdɔ ndɔbɔ laka mïze.

ⅩⅢ Dikalike ꞌdeni ze rɔ akɔtɔ ti Bɔkoꞌba kina bo gbï rɔ akɔtɔ tize gɔ Nyï Kɔtɔ Laka abo nime bo kiꞌdi ꞌdeni mïze ne. ⅩⅣ Kina gbï doꞌja ꞌdeni Bɔkoꞌba ꞌbu ꞌba Yësu Kurïsïtö oja kole abo dɔliŋɔ bine tɔmɔ bilaka di mï tölë na me dëdï duwöwö ꞌdeni ti. ⅩⅤ Kina me lïjë ame ga pili kutï gɔmo Yësu na ŋgï rɔ kole ꞌba Bɔkoꞌba ne lïjë na köꞌbö ꞌdeni rɔ akɔtɔ ti Bɔkoꞌba kina Bɔkoꞌba gbï rɔ akɔtɔ tïnnï. ⅩⅥ Dikalike laka ꞌba akɔꞌɔ ꞌba Bɔkoꞌba gɔze ꞌdeni. Bo na rɔ mï zana ꞌba akɔꞌɔ. Kina lïjë ame ga pili köꞌbö tɔꞌɔ lëpï nnï ga ne lïjë na ꞌdeni rɔ akɔtɔ ti Bɔkoꞌba kina bo gbï rɔ akɔtɔ tïnnï.

ⅩⅦ Kina ɔdɔ akɔꞌɔ ꞌba Bɔkoꞌba këdï ꞌdeni ŋgï koꞌdɔ ndɔbɔ mïze rɔ ma laka ti dëdïke ŋgï rɔ dɔ kïtëwu mï kada ꞌba burë löbu nima këdï kako ne. Dɔ kïtëwu ze ti këdï ŋgï gɔ loma ze mï dɔliŋɔ bine ame ꞌdeni gbï ko kɔzɔ ꞌba Kurïsïtö tara ne. ⅩⅧ Tikere ni ti akɔꞌɔ odɔꞌbɔ dönnï dë bi kɔtɔ. Kina me ɔdɔ kiya te akɔꞌɔ ꞌba Bɔkoꞌba këdï ꞌdeni koꞌdɔ ndɔbɔ rɔ ma laka mïze ti koga tikere ŋgï ŋbö yaga. Römöyï tikere ëdï koloma mï bilaka gɔ lende ꞌba karama nime Bɔkoꞌba këdï kodɔ dɔ bilaka ne. Kina me lïjë ame ga rɔ tikere ne akɔꞌɔ ꞌba Bɔkoꞌba oꞌdɔ ndɔbɔ dë du te laka mïnnï.

ⅩⅨ Bɔkoꞌba na kɔꞌɔ ze ꞌdeni dɔgba kina gɔ köꞌdu mo ꞌdɔ dɔꞌɔke bilaka gbï. ⅩⅩ Nï bɔ ame koꞌji löndö yï ne ɔdɔ kiya te ɔꞌɔ Bɔkoꞌba nï bɔ bëtï na. Römöyï ɔdɔ kɔꞌɔ löndö yï ame këddï koꞌja kïnë mo ne dë, ti kɔꞌɔ Bɔkoꞌba ame kinza koꞌja kïnë mo dë ne totondo ga? ⅩⅪ Kina gbï köꞌdu kiꞌdi ame Kurïsïtö kiꞌdi zize na me lïjë ame ga pili kɔꞌɔ Bɔkoꞌba ne gɔ lïjë kɔꞌɔ löndö nnï ga gbï.