3
Nwanyị ono achọ
onye o yeru obu
onye o yeru obu
1 L'ẹnyashi bẹ mu azẹkotaje
l'iphe azẹ mu gude egomunggo
achọ onye mu yeru obu;
ọle mu chọru iya nta
chọo imo;
ọphu mu ahụmaduru iya.
2 Mu sụ: “Nta bẹ mu a-gbẹshi
tsoru ọma mkpụkpu;
mbụ tụko ọma gbororo;
mẹ edupfu jekọta;
achọ onye ono,
mu yeru obu ono.”
Ọ bụru nno bụ gẹ mu
lekọtaru ẹnya iya;
ọphu mu ahụmaduru iya.
3 Anyi lẹ ndu nche ẹnyashi
dzuda;
teke ẹphe tsoru ọma
mkpụkpu ejephe.
Mu jịa phẹ sụ: “?Unu
levukpọru mu onye
mu yeru obu?”
4 Mu gharịbeeru phẹ phọ
nwanshịi;
mu hụma onye ono,
mu yeru obu ono.
Mu tụ iya gburumu;
ọphu mu
ekweẹdu iya ahaha.
Mu kpụa ya gbiriri jasụ mu
kpụ-rwuta iya ụlo ne mu;
mbụ kpụ-rwuta iya mkpuru
onye tsụru ime mu.
5 Unubẹ ụnwada Jierúsalẹmu;
unu kwee mu ukwe
l'unu taa kpatsudu
n-yemobu mu;
ọphu unu emetedu iya
lẹ mgbẹnya jasụ l'ọ
bya l'onwiya;
kẹle n-yemobu bụkwa
g'eedoje ọkpa anịgo;
mẹ k'ele-a bụ
g'eedoje ọkpa iya.
Alwalwa onye eze ono
6 ?Bụ onye shi l'echiẹgu eje
abya phọ;
dụ g'ẹka ẹnwuru-ọku akpụ
tụutuutuu phọ?
Mbụ onye a wụru mẹru mẹ
isẹnsu, e gude iphe,
eshi kwẹekweekwee,
ndu agba nghọ,
ere ire mee.
7 Lenu-o! Ọ kwa iphe,
Sólomọnu zẹ bẹ a pa
abya phọ!
Ndu edu iya nụ dụ ụkporo
ndu ojọgu ẹto,
a gụtaru l'iphe,
bụ ndu kachaa abụru
mkparawa lẹ Ízurẹlu.
8 Ẹphe tụkoru turu
ogu-echi phẹ l'upfu;
tẹme ẹphe bụkotaru ndu
k'ọgu doru ẹnya.
Mbụ l'ẹphe tụkoru turu
ogu-echi phẹ l'upfu;
kwabẹru ẹjo-iphe a-nwụ
l'ẹnyashi.
9 Eze Sólomọnu metaru onwiya
iphe, e gude apa eze.
Oshi, o gude mee ya bụ
oshi, shi l'úbvú úbvú
Lébanọnu.
10 Ọkpa iya bụ mkpọla-ọchaa
bẹ o gude mekọta iya.
Oshi-ẹhu iya, ẹka aadakobeje
adakobe bẹ e gude
mkpọla-ododo wụa.
Ẹka aanọduje anọo bẹ e
kwekọtaru ẹkwa,
eji g'ube.
Ime iya bẹ a phụshikotaru
ẹkwa, amakọta mma;
mbụ ẹkwa,
ụnwada Jierúsalẹmu
kpashịru gude
goshi n-yemobu phẹ.
11 Unu wụfuta-o;
unubẹ ụnwada Zayọnu;
unu bya ahụma ẹka
eze Sólomọnu kpu
okpu-eze iya;
mbụ okpu-eze ono,
ne iya kpuberu iya
mbọku ono,
ọ lụru nwanyị ono;
bụ mbọku,
ẹhu tsọru iya ụtso ono!